ខេត្តរតនគិរី ៖ ឃាតករសម្លាប់អ្នកឆ្លើយឆ្លងព័ត៌មានឱ្យកាសែតវរជនខ្មែរ លោកហង្ស សេរីឧត្តម បានធ្វើឱ្យមានការព្រួយបារម្ភជាទូទៅសម្រាប់អ្នកសារព័ត៌មាននានាដែលកំពុងបំពេញការងារទៅតាមវិជ្ជាជីវៈរបស់ខ្លួន ទោះបីជាការសម្លាប់នេះមិនទាន់ត្រូវបានបង្ហាញថា បណ្តាលមកពីមូលហេតុអ្វីជាផ្លូវការក្តី ។ ទាក់ទិននឹងការសម្លាប់នេះ ក្លិបអ្នកកាសែតកម្ពុជា និងសមាគមជំនាញបានចេញសេចក្តីថ្លែងការណ៍ជាបន្តបន្ទាប់ សម្តែងនូវការព្រួយបារម្ភ ជាមួយនឹងការអំពាវនាវឱ្យអាជ្ញាធរស៊ើបអង្កេតជុំវិញករណីនេះដើម្បីចាប់ខ្លួនជនដៃដល់មកផ្តន្ទាទោស ។ សពលោកហង្ស សេរីឧត្តម ត្រូវបានប្រទះឃើញ៣ថ្ងៃក្រោយការបាត់ខ្លួនតាំងពីយប់ថ្ងៃទី៩ កញ្ញាមក។
លោកហង្ស សេរីឧត្តម ត្រូវបានឃាតករដែលទំនងជាមានគ្នាច្រើននាក់សម្លាប់យ៉ាងព្រៃផ្សៃដោយកាប់ចិញ្ច្រំាផ្ទៃមុខនិងខ្លួនប្រាណ ហើយយកសពទៅញាត់ចូលក្នុងឃ្លុបគូទរថយន្តរបស់លោក រួចយកទៅប្លុងចោលក្នុងចម្ការស្វាយចន្ទីជាមួយនឹងរថយន្តរបស់លោក ។ ទោះបីជាបែបណា កាលពីព្រឹកថ្ងៃទី១៣ កញ្ញា នៅទីតាំងហាងផឹកស៊ីមួយកន្លែងយីហោ «ម្លប់ដូង »ដែលស្ថិតនៅខាងត្បូងកីឡដ្ឋានជិតវិមានសពក្នុងភូមិទេសអន្លង់ សង្កាត់បឹងកន្សែង ក្រុងបានលុង គឺជាទីតាំងជាប់សង្ស័យក្នុងសំណុំរឿងសម្លាប់អ្នកកាសែតនេះ ។ ក្រុមសមត្ថកិច្ចចម្រុះដឹកនាំដោយព្រះរាជអាជ្ញារង លោកជា សុភ័ក្ត្រ បានអនុវត្តដីកាឆែកឆេរ មួយនៅក្នុងបរិវេណហាងម្លប់់ដូងនោះ ។ ការឆែកឆេរបានផ្តល់ជាពន្លឺសម្រាប់ការឈាននៅ វែកមុខក្រុមជនដៃដល់ក្នុងឃាតកម្ម គួរឱ្យភ្ញាក់ផ្អើលនេះហើយ ។
ទាក់ទិននឹងករណីចុះឆែកឆេរលំនៅឋានជាទីតាំងហាងផឹកស៊ីនេះ ប្រភពព័ត៌មានបានឱ្យដឹងថា នៅពេលសមត្ថកិច្ចចុះទៅដល់គេសង្កេតឃើញសម្ភាររបស់របរ និងអីវ៉ាន់មួយចំនួនត្រូវបានវេចខ្ចប់ហាក់ដូចជា ត្រៀមលក្ខណៈចាកចេញពីទីនោះ ។ ក្រៅពីរបស់របរត្រូវបានវេចខ្ចប់ ក៏គេឃើញយុវជនជំទង់អាយុ១៦ទៅ១៧ឆ្នាំ២នាក់នៅចាំទីតាំងនោះ ។ យុវជនទាំង២នាក់នេះបានប្រាប់ថា សមាជិកនៅក្នុងហាងបានយករបស់របរផ្ទាល់ខ្លួនមួយចំនួនចាកចេញមុននេះ២ម៉ោងមកហើយ តាមរយៈរថយន្តកាមរីបាឡែន ឯពួកខ្លួនត្រូវគេឱ្យមកចាំនៅព្រឹកនេះប៉ុណ្ណោះ ។
មន្ត្រីប៉ូលិសឱ្យដឹងថា លំនៅឋាននិងធ្វើជាហាងផឹកស៊ីនេះ គឺម្ចាស់បានជួលបន្តឱ្យឈ្មោះអ៊ាន ប៊ុនហេង ហៅអេង ដែលជាមន្ត្រីកងរាជអាវុធហត្ថខេត្ត ។ មន្ត្រីសមត្ថកិច្ចឱ្យដឹងថា ឈ្មោះអេង បានជួលទីតាំងនេះបើកហាង និងផ្ទះស្នាក់នៅ ។ សមត្ថកិច្ចបានហៅម្ចាស់ហាងនេះគឺប្រពន្ធរបស់ឈ្មោះអេង មកស្តាប់ដីកាឆែកឆេរលំនៅឋាន ហើយក៏បានធ្វើការឆែកឆេររកវត្ថុតាង ប៉ុន្តែពុំឃើញអ្វីក្រៅរបស់របរមួយចំនួនដែលត្រូវវេចខ្ចប់រួចនោះទេ តែបានឃើញកម្រាលពួកមួយផ្ទាំងត្រាំទឹកចានដែកមានធុំក្លិនស្អុយអសោចិ៍គួរឱ្យចាប់អារម្មណ៍ ប៉ុន្តែពុំមានស្នាមប្រឡាក់ឈាមនោះទេ ហើយសមត្ថកិច្ចក៏មិនអាចដាក់ការសង្ស័យបាន ព្រោះរយៈពេលច្រើនថ្ងៃមកហើយ ដែលអ្វីនៅក្នុងផ្ទះ និងនៅជុំវិញត្រូវបានរៀបរយ ។ ម្យ៉ាងវិញទៀត ប៉ុន្មានថ្ងៃនោះមេឃភ្លៀងជោកជាំខ្លាំងស្ទើររាល់ថ្ងៃធ្វើឱ្យរលុបស្លាកស្នាមផងដែរ ។
ប៉ុន្តែទោះជាយ៉ាងនេះក្តី សមត្ថកិច្ចបានបង្ហើបថា ថ្វីបើរុករកមិនឃើញ តែសមត្ថកិច្ចបានរកឃើញស្បែកជើងមួយគូជារបស់ជនរងគ្រោះនៅក្រៅរបង កាលពីថ្ងៃទី១២ កញ្ញា មុនពេលចុះមកឆែកឆេរ ដែលនោះជាពន្លឺរួចទៅហើយ និងរកឃើញកូនកាំបិតប្រឡាក់ឈាមមួយផងដែរ ក្នុងថ្ងៃឆែកឆេរនោះ ។
ប្រភពពីមន្ត្រីប៉ូលិសព្រហ្មទណ្ឌឱ្យដឹងថា សមត្ថកិច្ច បានចេញដីកាកោះហៅមនុស្សជាច្រើននាក់មកសាកសួរនៅការិយាល័យព្រហ្មទណ្ឌកម្រិតធ្ងន់ នៅព្រឹកថ្ងៃទី១៣ កញ្ញា ដែលសុទ្ធ សឹង ជាមន្ត្រីកងរាជអាវុធហត្ថ រួមទាំងឈ្មោះ អ៊ាន ប៊ុនហេង ហៅ អេង ម្ចាស់ហាងម្លប់ដូងផងដែរ ប៉ុន្តែអ្នកដទៃឱ្យវិលទៅផ្ទះវិញទុកតែឈ្មោះ អេង និងប្រពន្ធ ។
ក្នុងការឃាត់ខ្លួនឈ្មោះខាងលើនេះ ទោះបីមន្ត្រីនានាមិនបានផ្តល់ព័ត៌មានលម្អិតបែបណាក្តី ក៏គេបានដឹងថា ការឈានដល់ដំណាក់កាលដាក់ការសង្ស័យនេះ ដោយសារតែទូរស័ព្ទ ហៅហង្ស សេរីឧត្តម កាលពីយប់នោះគឺជាលេខទូរស័ព្ទរបស់ជនសង្ស័យឈ្មោះអេងនេះ ។
ឃាតកម្មលើអ្នកកាសែត ហង្ស សេរីឧត្តម កាលពីយប់ថ្ងៃទី៩ កញ្ញា និងរហូតដល់ថ្ងៃទី១១ កញ្ញា បង្ហាញថា សមត្ថកិច្ចពិតជាបានខិតខំប្រឹងប្រែងយ៉ាងសកម្ម និងកំពុងឈានទៅវែកមុខឃាតករពិតប្រាកដ ប៉ុន្តែសមត្ថកិច្ចពុំទាន់ ទម្លាយឱ្យដឹងនៅឡើយទេ គឺរង់ចាំប្រមូលភស្តុតាង និងចាប់ខ្លួនជនដៃដល់និងមេខ្លោង បានសិន ព្រោះឃាតករអាចមានគ្នាច្រើននាក់ ។
លោក រិន រតនៈ និពន្ធនាយកអ្នកកាសែតវរជនខ្មែរបានប្រាប់ទីភ្នាក់ងារAFP ថា សហការីរបស់លោកនេះបានសរសេរអត្ថបទច្រើនអំពីការកាប់ព្រៃឈើប្រណីតខុសច្បាប់ដែលទាក់ទិនដល់ក្រុមមន្ត្រីប្រដាប់អាវុធខ្លះនៅក្នុងខេត្តរតនគិរី ។
គួររំលឹកថា មុនពេលសមត្ថកិច្ចរកឃើញសព គឺមានអ្នកភូមិជនជាតិភាគតិចក្នុងភូមិធួយអំពិល បានផ្តល់ដំណឹងដល់ក្រុមអ្នកកាសែត និងសមត្ថកិច្ចថា បានឃើញរថយន្តកាមរីមួយគ្រឿងចតចោលនៅក្នុងចម្ការស្វាយចន្ទី ហើយក្រុមអ្នកតាមរកក៏បានទៅកាន់ទីនោះទើបស្គាល់ថា ជារថយន្តរបស់លោក ហង្ស សេរីឧត្តម ជាអ្នកកាសែតដែលបាត់ខ្លួននោះមែន ហើយក៏រាយការណ៍ដល់សមត្ថកិច្ច ។ ការពិនិត្យរថយន្តបានប្រឈមនឹងក្លិនស្អុយអសោចិ៍បានជះចេញពីក្នុងរថយន្ត ពិសេសនៅឃ្លុបគូទរថយន្តមានស្រក់ទឹក និងរុយរោមឡើងខ្មៅ ហើយការគាស់ទ្វាររថយន្តត្រូវបានប្រើរយៈពេលយ៉ាងយូរទើបបើកសោបាន ។
បន្ទាប់ពីបើកសោរថយន្តបាន ទើបពិនិត្យឃើញសពមានស្ថានភាពរលួយក្នុងគូទរថយន្ត ដោយសាកសពត្រូវក្រុមឃាតករដាក់ឱ្យដេកផ្កាប់មុខ ។ មន្ត្រីប៉ូលិសជំនាញបច្ចេកទេសដែលធ្វើការពិនិត្យសពបានដឹងច្បាស់ថា គឺជាសពលោកហង្ស សេរីឧត្តម ជនជាតិខ្មែរ អាយុប្រហែល៤៥ឆ្នាំ ស្នាក់នៅភូមិ១ សង្កាត់ឡាបានសៀក ក្រុងបានលុង ជាភ្នាក់ងារកាសែតវរជនខ្មែរ ត្រូវបានឃាតករសម្លាប់ញាត់ក្នុងគូទរថយន្តរបស់ខ្លួនម៉ាកកាមរីស៊េរី៩៦ ពណ៌ស្លែចាស់ ចង្កូតឆ្វេងពាក់ស្លាកលេខភ្នំពេញ2A-5905 ។ ជនរងគ្រោះត្រូវជនដៃដល់កាប់ដោយកាំបិត និងពូថៅ តែពុំមានការបាញ់នឹងកាំភ្លើងទេ គឺកាប់ចិញ្ច្រាំលើផ្ទៃមុខ និងក្បាលសុសសាច់មើលស្ទើរពុំស្គាល់ ។ មន្ត្រីប៉ូលិសផ្នែកបច្ចេកទេសបានសន្និដ្ឋានថា ពុំមែនជាករណីប្លន់ទេ គឺជារឿងគំនុំការងារ និងការរកស៊ី ដោយរបស់របរសម្ភារ ឧបករណ៍មាននៅក្នុងរថយន្តទាំងអស់ ។ ប៉ូលិសបានសន្និដ្ឋានថា ក្រុមឃាតករអាចមានគ្នាច្រើននាក់ចាប់ពី៤នាក់ឡើងទៅ ហើយការសម្លាប់នេះគឺសម្លាប់នៅក្នុងផ្ទះដីឡូត៍ណាមួយដាច់ពីគេ ឬនៅក្នុងបន្ទប់ស្ងាត់ ហើយយកសពដាក់ក្នុងគូទរថយន្តបើករថយន្តមកប្លុងចោលក្នុងចម្ការស្វាយចន្ទីនោះ ។
ប្រពន្ធរបស់ជនរងគ្រោះអ្នកស្រីចន្ធី អាយុ២៨ឆ្នាំ ដែលមានផ្ទៃពោះ៧ខែបានអង្គុយយំសោកក្បែរកូនប្រុសម្នាក់ជាកូនប្រពន្ធមុនរបស់ជនរងគ្រោះអាយុប្រហែល២២ឆ្នាំផងដែរ ។ ប្រពន្ធជនរងគ្រោះបានឱ្យដឹងថា មុនពេលប្តីគាត់បាត់ខ្លួននៅយប់ថ្ងៃទី៩ កញ្ញា បានប្រាប់ថា ទៅជួបគេដែលបានណាត់ជួបហៅតាមទូរស័ព្ទ ហើយប្រហែលមួយម៉ោងក្រោយមកគាត់ជាប្រពន្ធបានទូរស័ព្ទទៅសួរ តែមិនលើក ។ លុះទូរស័ព្ទជាលើកទីពីរចូលហើយ ចុចទទួលតែមិនឮនិយាយតបទេ បែរជាឮសំឡេងគំហកខ្លាំងៗ ហើយក៏ដាច់ធ្វើឱ្យមានការសង្ស័យ ប៉ុន្តែពុំបានប្តឹងសមត្ថកិច្ចភ្លាមៗទេ និងតាមរកសួរមិត្តភក្តិប្តីគាត់នៅថ្ងៃបន្ទាប់ តែពុំមានទទួលដំណឹងរហូតបីថ្ងៃទើបប្តឹងប៉ូលិសហើយក៏ឈានដល់ប្រទះឃើញសព ។
ក្លិបអ្នកកាសែតកម្ពុជាអត្ថាធិប្បាយថា នេះគឺជាការគំរាមកំហែងធ្ងន់ធ្ងរដល់ស្មារតីអ្នកសារព័ត៌មាន ដែលកំពុងបំពេញបេសកកម្មតាមវិជ្ជាជីវៈហើយថា នេះក៏ជាចេតនារារាំង និងបន្ទច់បង្អាក់ដំណើរការនៃការអនុវត្តសិទ្ធិសេរីភាពសារព័ត៌មាន ការបញ្ចេញមតិនិងការអនុវត្តលទ្ធិប្រជាធិបតេយ្យនៅកម្ពុជាផងដែរ ។ ក្លិបអ្នកកាសែតកម្ពុជា បានថ្កោលទោសឃាតករដែលសម្លាប់លោក ហង្ស សេរីឧត្តម និងអំពាវនាវដល់អាជ្ញាធរខេត្តរតនគិរី និងខេត្តកំពតឱ្យស្រាវជ្រាវរកជនល្មើសទាំងពីរករណី ដើម្បីនាំយកពួកគេមកផ្តន្ទាទោស ។
ការជួញដូរឈើប្រណីត បើទោះវាជាបទល្មើសឧក្រិដ្ឋក៏ដោយ ក៏សកម្មភាពជួញដូរនេះកំពុងកើតមានយ៉ាងគគ្រឹកគគ្រេងពេញផ្ទៃប្រទេស ។ រាល់ថ្ងៃសារព័ត៌មានបានចេញផ្សាយករណីបង្រ្កាបការជួញដូរឈើប្រណីត ដែលជនល្មើសបានប្រើប្រាស់មធ្យោបាយផ្សេងៗជាច្រើនមិនគួរឱ្យជឿ ដើម្បីលាក់បាំងពីភ្នែកសមត្ថកិច្ច ៕
ចែករំលែកព័តមាននេះ