ខេត្តប៉ៃលិន ៖ មានកិច្ចប្រជុំផែនការផ្សព្វផ្សាយ និងរឹតបន្តឹងស្តីពីច្បាប់ចរាចរណ៍ផ្លូវគោកមួយនៅការិយាល័យចរាចរណ៍ផ្លូវគោក ក្នុងបរិវេណស្នងការដ្ឋាននគរបាលខេត្ត ក្រោមវត្តមានលោកទូច សាវន នាយការិយាល័យចរាចរណ៍ផ្លូវគោក និងមានការចូលរួមពីមន្ត្រីនគរបាលចរាចរផ្លូវគោកជាង២០រូប កាលពីព្រឹកថ្ងៃទី១២ កញ្ញា ។
លោកទូច សាវន នាយការិយាល័យចរាចរណ៍ផ្លូវគោកបានឱ្យដឹងថា ដើម្បីកាត់បន្ថយគ្រោះថ្នាក់ចរាចរណ៍កើតឡើងជាយថាហេតុគណៈបញ្ជាការបានត្រួតពិនិត្យ និងចុះអនុវត្តលើច្បាប់ចរាចរណ៍ប្រកបដោយប្រសិទ្ធភាព ។ លោកនាយការិយាល័យបានបន្តថា កិច្ចប្រជុំនេះដើម្បីរៀបចំក្រុមនគរបាលឱ្យមានវិន័យនិងមានរបៀបរៀបរយ ព្រមទាំងរឹតបន្តឹងស្តីពីច្បាប់ចរាចរណ៍ផ្លូវគោកដែលមាន៤ចំណុច ៖
១-ត្រួតពិនិត្យទៅលើអ្នកបើកបរគ្មានប័ណ្ណ ឬប័ណ្ណបើកបរហួសសុពលភាព, ត្រួតពិនិត្យការបើកបរលើសល្បឿនកំណត់, បើកបរក្នុងស្ថានភាពស្រវឹង, ចាប់ឃាត់រថយន្តដឹកជញ្ជូនទំនិញសំពីងសំពោង និងបើកបរល្មើសផ្សេងទៀត ។
២-យានយន្ត ដែលសមត្ថកិច្ចចាប់មក ត្រូវផាកពិន័យតាមបទល្មើសជាក់ស្តែង និងត្រួតពិនិត្យយានយន្តកែច្នៃខុសលក្ខណៈបច្ចេកទេសដូចការតទ្រុង តដំបូល តសាក់ស៊ី ជាដើម ។
៣-លុបបំបាត់ការចតយានយន្តគ្មានសណ្តាប់ធ្នាប់ ការតាំងលក់ដូរលើចិញ្ចើមផ្លូវដោយគ្មានការអនុញ្ញាត ។
៤-ពង្រឹងច្បាប់ ដោយលើកកម្ពស់ការយល់ដឹងច្បាប់ និងវិន័យសីលធម៌ដល់មន្ត្រីអនុវត្តច្បាប់ ។
លោកទូច សាវន បានបញ្ជាក់ថា ករណីរថយន្តដឹកសំពីងសំពោងរាល់ថ្ងៃដែលបើកឆ្លងកាត់ខេត្តប៉ៃលិន ខាងសមត្ថកិច្ចបានចាប់ឃាត់និងផាកពិន័យជារៀងរាល់ថ្ងៃ តែរថយន្តទាំងនេះនៅតែមិនរាងចាលដូច្នេះចាប់ពីពេលនេះទៅត្រូវរឹតបន្តឹងអនុវត្តតាមច្បាប់ជាធរមាន ៕
ចែករំលែកព័តមាននេះ