ខេត្តបន្ទាយមានជ័យ ៖ ដើម្បីកាត់បន្ថយអត្រាគ្រោះថ្នាក់ចរាចរណ៍ឱ្យនៅកម្រិតទាប នៅព្រឹកនៅថ្ងៃទី១៣ កញ្ញា នៅលើកំណាត់ផ្លូវជាតិលេខ៥ ក្នុងភូមិសាស្ត្រសង្កាត់ព្រះពន្លា ក្រុងសិរីសោភ័ណ និងក្នុងភូមិសាស្ត្រឃុំឫស្សីក្រោក ស្រុកមង្គលបុរី កម្លាំងនគរបាលនៃនាយកដ្ឋានសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិ បានសហការជាមួយកម្លាំងនគរបាលការិយាល័យចរាចរណ៍នៃស្នងការដ្ឋាននគរបាលខេត្ត ចុះធ្វើការត្រួតពិនិត្យល្បឿនរថយន្តដែលបើកហួសល្បឿនកំណត់ និងធ្វើការផាកពិន័យ ។
លោកវរសេនីយ៍ទោ ឈឿម សុផុន នាយការិយាល័យនគរបាលចរាចរជើងគោកខេត្តបានឱ្យដឹងថា ដោយអនុវត្តតាមបទបញ្ជារបស់លោកនាយឧត្តមសេនីយ៍អគ្គស្នងការនគរបាលជាតិ និងការណែនាំរបស់ប្រធានគណៈបញ្ជាការឯកភាពខេត្ត ដោយមានការដឹកនាំបញ្ជាផ្ទាល់ពីលោកឧត្តមសេនីយ៍ត្រី ខេង ស៊ុម ស្នងការនគរបាលខេត្ត កម្លាំងនគរបាលជំនាញរបស់នាយកដ្ឋានសណ្តាប់ធ្នាប់ នៃអគ្គស្នងការនគរបាលជាតិ បានសហការជាមួយកម្លាំងនគរបាលជំនាញការិយាល័យចរាចរណ៍ផ្លូវគោក នៃក្រសួងមហាផ្ទៃ ចុះយុទ្ធនាការត្រួតពិនិត្យល្បឿនចំពោះរថយន្តល្មើសមួយចំនួនដែលបើកបរលើសល្បឿនកំណត់ឆ្លងកាត់ទីប្រជុំជន ។ ជាមួយគ្នានេះដែរ ក្នុងការចុះត្រួតពិនិត្យល្បឿនរថយន្តនេះសមត្ថកិច្ចជំនាញបានរកឃើញរថយន្តល្មើសសរុបចំនួន២៩គ្រឿង ក្នុងនោះរថយន្តប្រភេទទេសចរណ៍ចំនួន១៤គ្រឿង រថយន្តតាក់ស៊ីចំនួន១១គ្រឿង និងរថយន្តធុនតូចចំនួន៤គ្រឿង ផាកពិន័យជាទឹកប្រាក់សរុបបានចំនួន២០៨ពាន់រៀល រួមទាំងបករថយន្តបិទស្កុតខ្មៅបានមួយចំនួនផងដែរ ។
លោកនាយការិយាល័យក៏បានបញ្ជាក់ដែរថា ក្នុងរយៈពេល៦ខែ ឆមាសទី១ ឆ្នាំ២០១២ អត្រាគ្រោះថ្នាក់ចរាចរណ៍កើតមាន១១៦លើក បើប្រៀបធៀបរយៈពេល៦ខែ ឆមាសទី១ ឆ្នាំ២០១១ កើតមានគ្រោះថ្នាក់ចរាចរណ៍ចំនួន២០៤លើក គឺថយចុះ៨៨លើក ស្មើ៤៣% មនុស្សស្លាប់របួសធ្ងន់ ស្រាល និងយានតូចធំគ្រប់ប្រភេទក៏មានការថយចុះផងដែរ ។ ចំពោះគ្រោះថ្នាក់នេះ ភាគច្រើនគឺបណ្តាលមកពីកត្តាមនុស្សជាពិសេសការបើកបរហួសល្បឿនកំណត់ មាន៦៩% នៃអត្រាគ្រោះថ្នាក់សរុប ៕
ចែករំលែកព័តមាននេះ