រាជធានីភ្នំពេញ ៖ សមត្ថកិច្ចបានទទួលនិងឃាត់ខ្លួនស្ត្រីម្នាក់ពីម្ចាស់ឱសថស្ថានច័ន្ទរះ មានទីតាំងស្ថិតនៅកែងផ្លូវលេខ១៧៣ និងមហាវិថីព្រះសីហនុ ក្នុងសង្កាត់អូឡាំពិក ខណ្ឌចំការមន កាលពីវេលាម៉ោង៦និង៣០នាទីល្ងាចថ្ងៃទី១១ កញ្ញា បន្ទាប់ពីស្ត្រីរូបនេះបានធ្វើសកម្មភាពលួចថ្នាំពេទ្យនៅឱសថស្ថានខាងលើ ហើយយកទៅលក់នៅកន្លែងផ្សេងៗច្រើនលើកច្រើនសាណាស់មកហើយ តែទីបំផុតក៏ត្រូវអស់លក្ខណ៍ ។
បើតាមប្រភពព័ត៌មានពីសមត្ថកិច្ចឱ្យដឹងថា ស្ត្រីដែលត្រូវឃាត់ខ្លួននេះឈ្មោះសាំង ធីតា អាយុ២៥ឆ្នាំ ស្នាក់នៅក្នុងក្រុងតាខ្មៅ ខេត្តកណ្តាល។ ចំណែកឱសថស្ថានយីហោច័ន្ទរះ មានម្ចាស់ឈ្មោះអែវ សោភា ភេទស្រី អាយុ២៥ឆ្នាំ។
បើតាមប្រភពព័ត៌មានពីម្ចាស់ឱសថស្ថានឱ្យដឹងថា មុនពេលកើតហេតុស្ត្រីជាជនសង្ស័យបានមកទិញថ្នាំនៅក្នុងឱសថស្ថានរបស់គាត់ ហើយខណៈកំពុងគាត់ឱនយកថ្នាំ ស្ត្រីខាងលើនេះក៏បានប្រមូលថ្នាំមួយចំនួនដាក់ចូលទៅក្នុងកាបូបយួររបស់គេរួចហុចប្រាក់ឱ្យចំនួន៥ដុល្លារជាថ្លៃថ្នាំពេទ្យដែលខ្លួនបានទិញ ។ ប៉ុន្តែដោយមានការសង្ស័យព្រោះសង្កេតឃើញថ្នាំពេទ្យរបស់គាត់ បាត់អស់មួយចំនួន ក៏បានឃាត់ស្ត្រីសង្ស័យខាងលើដើម្បីសួរនាំ ស្រាប់តែស្ត្រីរូបនេះ មានអាការភ័យតក់ស្លុតទើបឆែកក្នុងកាបូបមើលឃើញសុទ្ធតែថ្នាំពេទ្យពេញកាបូបយួរតែម្តង ។ ដោយមានភស្តុតាងជាក់ស្តែង គាត់ក៏បានឃាត់ខ្លួនស្ត្រីសង្ស័យខាងលើនេះនាំទៅប្រគល់ឱ្យប៉ូលិសប៉ុស្តិ៍អូឡាំពិក ដើម្បីសួរនាំបន្ត ។
ពេលមកដល់ប៉ុស្តិ៍នគរបាល ស្ត្រីសង្ស័យបឆ្លើយសារភាពថា ខ្លួនពិតជាបានធ្វើសកម្មភាពលួចយកថ្នាំពេទ្យនៅឱសថស្ថានយីហោច័ន្ទរះ ប្រាកដមែន ។ យោងទៅតាមពាក្យបណ្តឹងរបស់ម្ចាស់ឱសថស្ថាន និងចម្លើយសារភាពរបស់ស្ត្រីសង្ស័យខាងលើនេះ សមត្ថកិច្ចបានសម្រេចបញ្ជូនខ្លួនស្ត្រីរូបនេះ ទៅកាន់អធិការដ្ឋាននគរបាលខណ្ឌចំការមន ឃុំខ្លួនបណ្តោះអាសន្នរង់ចាំកសាងសំណុំរឿងបញ្ជូនទៅសាលាដំបូងរាជធានី តាមផ្លូវច្បាប់ ។ គួរបញ្ជាក់ថា ថ្នាំពេទ្យដែលស្រ្តីរូបនេះលួចយកនោះមានតម្លៃសរុបជាង២០០ដុល្លារ ត្រូវបានសមត្ថកិច្ចប្រគល់ជូនម្ចាស់វិញ ៕
ចែករំលែកព័តមាននេះ