ការសិក្សាមួយរបស់អ្នកវិទ្យាសាស្ត្រនៅសាកលវិទ្យាល័យ Georgetown Universityស្ថិតក្នុងទីក្រុងវ៉ាស៊ីនតោនឌីស៊ី សហរដ្ឋអាមេរិកបានរកឃើញថា បណ្តាស្ត្រីមានផ្ទៃពោះដែលនិយមទទួលទានអាហារសំបូរខ្លាញ់ច្រើននឹងធ្វើឱ្យកូនរបស់ពួកគេដែលកើតមក(ប្រសិនជាកូនស្រី)ប្រឈមនឹងជំងឺមហារីមហារីកដោះពេលក្រោយក្នុងជីវិតហើយនឹងអាចតំណដល់ចៅស្រីរបស់ពួកគេទៀតផង ។
ការអះអាងបែបនេះ ក៏ព្រោះតែក្រុមអ្នកស្រាវជ្រាវមានជំនឿថា អាហារគ្មានសុខភាព(សំបូរខ្លាញ់)អាចធ្វើឱ្យមានការផ្លាស់ប្តូរជាអចិន្ត្រៃយ៍បណ្តាកោសិកាទារកដែលមិនទាន់កើត ។បើទោះជាយ៉ាងណា លទ្ធផលនៃការសិក្សាលើកនេះគឺកើតចេញពីការពិសោធន៍នៅសត្វកណ្តុរនៅឡើយពោលគឺពុំទាន់បានពិសោធន៍លើមនុស្សនោះទេ ។
Sarah Williams មន្ត្រីទទួលបន្ទុកព័ត៌មានសុខភាពរបស់មូលនិធិស្រាវជ្រាវជំងឺមហារីកចក្រភពអង់គ្លេសបានថ្លែងថា៖«ការសិក្សានេះទើបតែពិសោធន៍លើសត្វកណ្តុរនៅឡើយ ដូច្នេះយើងមិនអាចនិយាយបានថា តើនឹងមានលទ្ធផលដូចគ្នានេះចំពោះមនុស្សដែរឬយ៉ាងណាទេ ។តែយ៉ាងណា លទ្ធផលនេះ ក៏ជាការបំភ្លឺផ្លូវមួយសម្រាប់យើងចំពោះអ្វីដែលនឹងកើតមាននៅខាងក្រោយឆាកខណៈមហារីបានអភិវឌ្ឍខ្លួន ។ សម្រាប់ពេលឥឡូវនេះ យើងមិនដឹងថាតើ របបអាហាររបស់ស្ត្រីអំឡុងពេលមានផ្ទៃពោះអាចមានឥទ្ធិពលធ្វើឱ្យកូនស្រីរបស់ពួកគេកើតមហារីកដោះដែរឬយ៉ាងណានោះទេ ប៉ុន្តែស្ត្រីទាំងឡាយអាចចាប់យកវិធានការកាត់បន្ថយអត្រាគ្រោះថ្នាក់ដោយជំងឺមហារីកដោះបានតាមរយៈមិនទទួលទានគ្រឿងស្រវឹង រក្សាទម្ងន់ខ្លួននិងធ្វើសកម្មភាពរាងកាយឱ្យបានច្រើន ៕
ចែករំលែកព័តមាននេះ