រាជធានីភ្នំពេញ ៖ កាលពីថ្ងៃទី១០ កញ្ញា កន្លងទៅនេះ សាលាអន្តរជាតិសិង្ហបុរីដឹកនាំដោយលោកជំទាវបណ្ឌិតងឿន ផល្លីនពោធិតា នាយិកាសាលា ព្រមទាំងបុគ្គលិក និងសិស្សានុសិស្សបាននាំយកថវិកាចំនួន១១លានរៀលប្រគល់ជូនដល់មន្ទីរពេទ្យគន្ធបុប្ផា តាមរយៈមូលនិធិសាលាអន្តរជាតិសិង្ហបុរី (SIS) ដែលទទួលបានពីទឹកចិត្តសប្បុរសរបស់លោកគ្រូ អ្នកគ្រូ សាស្ត្រាចារ្យ បុគ្គលិក អាណាព្យាបាល និងសិស្សានុសិស្ស ។
ដោយទទួលព័ត៌មានពិតប្រាកដមន្ទីរពេទ្យគន្ធបុប្ផាជួបនូវវិបត្តិហិរញ្ញវត្ថុ ដើម្បីបន្តការជួយព្យាបាលទៅដល់កុមារកម្ពុជារាប់លាននាក់នៅថ្ងៃខាងមុខទៀត ទើបលោកជំទាវនាយិកាសាលាបានបង្កើតមូលនិធិនេះឡើង ដើម្បីចូលរួមចំណែកជួយសម្រាលបន្ទុករបស់មន្ទីរពេទ្យផងដែរ ។
ឆ្លៀតក្នុងឱកាសនោះដែរ លោកជំទាវបណ្ឌិតបានមានប្រសាសន៍ទៀតថា សាលានឹងបន្តជួយដល់ក្មេងកំព្រា ចាស់ជរា ទុរគតជន ដែលទទួលរងនូវការខ្វះខាត និងសូមថ្លែងអំណរគុណចំពោះសន្តានចិត្តដ៏ល្អរបស់បុគ្គលិក អាណាព្យាបាល សិស្សានុសិស្សទាំងអស់ដែលបានរួមចំណែកមនុស្សធម៌ និងជួយសង្គមជាតិបំបាត់ភាពក្រីក្រ ក្រោមការដឹកនាំដ៏ឈ្លៀសវៃ និងគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ ទោះបីជាថវិកាទាំងនេះតិចតួចក្តី មិនអាចជួយរំលែកនូវទុក្ខលំបាកបានទាំងស្រុងក៏ពិតមែន តែក៏ជាការជួយចែករំលែកនូវការខ្វះខាតបានមួយចំណែកផងដែរ ។
សូមបញ្ជាក់ថា សាលាអន្តរជាតិសិង្ហបុរីជាសាលាដ៏ធំមួួយ ដែលបើកការបណ្តុះបណ្តាលខាងវិស័យអប់រំដែលទទួលស្គាល់ពីក្រសួងអប់រំ យុវជន និងកីឡា មានទទួលសិស្សចំណេះទូទៅខ្មែរចាប់ពីថ្នាក់ទី១ដល់ទី១២ និងថ្នាក់ភាសាអង់គ្លេសទូទៅគ្រប់កម្រិត ។ ឥឡូវនេះសាលាបានបើកថ្នាក់មត្តេយ្យអន្តរជាតិចាប់ទទួលកុមារអាយុ៣ឆ្នាំដល់៥ឆ្នាំ ផ្តល់ជូន២០%កាលបរិច្ឆេទចូលរៀនថ្ងៃទី១២ ខែកញ្ញា ឆ្នាំ២០១២ ៕
ចែករំលែកព័តមាននេះ