ខេត្តកំពង់ចាម ៖ ក្រោមការចង្អុលបង្ហាញពីសំណាក់លោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្តក៏ដូចជាលោកឧត្តមសេនីយ៍ត្រី វ៉ា សារិទ្ធ មេបញ្ជាការកងរាជអាវុធហត្ថខេត្តបានចាត់ឱ្យកម្លាំងជំនាញក្រោមឱវាទជាង៣០នាក់ ចុះបំពេញការងារឆែកឆេរអាវុធជាតិផ្ទុះនៅក្រុងកំពង់ចាម ដោយចាប់ផ្តើមពីម៉ោង៦ល្ងាចរហូតដល់ម៉ោង៨យប់ថ្ងៃទី៨ កញ្ញា ២០១២ ដើម្បីពង្រឹងសន្តិសុខ និងសណ្តាប់ធ្នាប់ជូនប្រជាពលរដ្ឋ ។
តាមលោកវរសេនីយ៍ត្រី សុក សំបូរ នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលប្រាប់កោះសន្តិភាពឱ្យដឹងថា សម្រាប់គោលដៅចុះត្រួតពិនិត្យអាវុធជាតិផ្ទុះត្រូវបានបែងចែកជា២កន្លែងក្នុងនោះមួយកន្លែង ស្ថិតនៅភូមិបឹងស្នាយ សង្កាត់សំបូរមាស និងមួយកន្លែងទៀតនៅត្រង់មុខផ្ទះលោកឧកញ៉ា ឈន ថារី ក្នុងសង្កាត់កំពង់ចាម ក្រុងកំពង់ចាម ប្រើប្រាស់កម្លាំងចម្រុះមាននគរបាលកណ្តាលយុត្តិធម៌ខេត្ត នគរបាលព្រហ្មទណ្ឌ នគរបាលចរាចរក្រុងកំពង់ចាម ព្រមទាំងកងរាជអាវុធហត្ថក្រុងកំពង់ចាម ផងដែរ ។
លោកវរសេនីយ៍ត្រី សុក សំបូរ ប្រាប់បន្តថា ក្រោយពីទទួលបាននូវបទបញ្ជាពីលោកស្នងការនគរបាលខេត្ត រូបលោកបានដឹកនាំកម្លាំងចុះតាមគោលដៅទាំង២ខាងលើ ដោយផ្ទាល់តែម្តង ។ ក្នុងរយៈពេល២ម៉ោងតាមរយៈការចុះឆែកម៉ូតូ និងរថយន្តតូចធំពុំមានប្រជាពលរដ្ឋណាម្នាក់ដាក់អាវុធ១ដើមណាមួយនោះទេ មានន័យថា ពួកគាត់បានយល់ដឹងពីផ្លូវច្បាប់បានច្រើនគួរឱ្យកត់សម្គាល់ ។ ជាមួយនោះក្នុងមួយសប្តាហ៍ត្រូវធ្វើការត្រួតពិនិត្យឱ្យបាន៤ដង ដើម្បីពង្រឹងសន្តិសុខ សណ្តាប់ធ្នាប់ជូនប្រជាពលរដ្ឋ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ