ខេត្តកណ្តាល ៖ អ្នកស្រុកចំនួន១៥០គ្រួសារបាននាំគ្នាសម្តែងនូវការភ្ញាក់ផ្អើល និងលើកគ្នាតវ៉ាប្រឆាំងដាច់ខាតដោយមានលើកបដាផង បន្ទាប់ពីបានឃើញប៉េអឹមស្រុកអង្គស្នួលដាក់កម្លាំង និងមានទាំងរថយន្តស៊ីរ៉ែនផងទៅកាន់ស្រះទឹករួមភូមិរបស់ពួកគាត់ ដោយបានយករថយន្តដឹកដីបម្រុងចាក់លុបស្រះនោះ ធ្វើឱ្យពួកគាត់ប្រមូលផ្តុំគ្នាធ្វើការតវ៉ាភ្លាមៗ ។ មិនតែប៉ុណ្ណោះ ពួកគាត់បានធ្វើការរារាំងមិនឲ្យរថយន្តនោះចាក់ដីលុបជាដាច់ខាតទៀតផង ។
ហេតុការណ៍នោះបានកើតឡើងកាលពីវេលាម៉ោង៨ព្រឹកថ្ងៃទី១០ កញ្ញា ដែលស្រះទឹកនេះមានទីតាំងស្ថិតនៅចម្ងាយពីផ្លូវជាតិលេខ៤ប្រមាណ៤០ម៉ែត្រប៉ុណ្ណោះ ក្នុងភូមិអង្គស្នួលទី៣ ឃុំពើកស្រុកអង្គស្នួល ។
ប្រជាពលរដ្ឋបានឲ្យដឹងថា ស្រះទឹកខាងលើនោះមានទំហំជិត១ហិកតា ជាស្រះរួមក្រុមសាមគ្គីរបស់ប្រជាពលរដ្ឋភូមិអង្គស្នួលទី៣ទាំងមូល ដែលបានប្រើប្រាស់ទឹកក្នុងស្រះនោះជាប់ជាប្រចាំខួបប្រាំងខួបវស្សា ។ មិនតែប៉ុណ្ណោះក៏មានប្រជាពលរដ្ឋនៅក្នុងភូមិចំនួន៩ទៀត ដែលស្ថិតនៅជុំវិញនោះមានចំនួនរាប់រយគ្រួសារក៏បានប្រើប្រាស់ទឹកនោះដែរ ។ ពេលនេះ ស្រាប់តែមានការប៉ុនប៉ងលុបស្រះទឹកបានធ្វើឲ្យពួកគាត់មានការភ្ញាក់ផ្អើលយ៉ាងខ្លាំង បន្ទាប់ពីបានឃើញមានកម្លាំងប៉េអឹមរាប់សិបនាក់ ព្រមទាំងមានរថយន្តស៊ីរ៉ែនផង ត្រូវបានបញ្ជូនទៅដាក់ឱ្យឈរជើងនៅចំណុចស្រះទឹកនោះ និងបានដករើទុយោបូមទឹករបស់ពួកគាត់ចេញយ៉ាងបំពាន ។ លុះបន្តិចក្រោយមក ក៏មានរថយន្តដឹកដីធុនធំៗដឹកដីយកទៅបម្រុងចាក់លុបស្រះនោះទៀត ។ គាត់និយាយថា នៅពេលឃើញបែបនេះពួកគាត់មានការសង្ស័យបាននាំគ្នាសួរនាំក៏ត្រូវបានប៉េអឹមប្រាប់ថា ចាក់ដីលុបស្រះទឹកនោះដើម្បីសាងសង់បន្ទាយ ។ បន្ទាប់ពីបានដឹងថា ប៉េអឹមប្រុងចាក់ដីលុបស្រះទឹកដែលពួកគាត់កំពុងប្រើប្រាស់បែបនេះ ពួកគាត់មានការភ្ញាក់ផ្អើលយ៉ាងខ្លាំងក៏បានលើកគ្នាភ្លាមៗឃាត់មិនឲ្យចាក់ជាបណ្តោះអាសន្ន ដែលជាហេតុធ្វើឲ្យមានការជជែកតឹងសរសៃកដាក់គ្នាមួយប្រាវរវាងពួកគាត់ និងកម្លាំងប៉េអឹមស្រុកអង្គស្នួល ឯលោកអភិបាលស្រុកក៏បានចុះទៅកាន់ទីនោះដែរ ។ ដោយសារតែមានការភ្ញាក់ផ្អើលកាន់តែខ្លាំងឡើងៗ ប៉េអឹមបានដកថយទៅវិញតាមក្បួនយុទ្ធសាស្ត្រ ឯរថយន្តដែលដឹកដីយកទៅបម្រុងចាក់លុបស្រះនោះ គឺជារបស់លោក ឃឹម ឃុន មេបញ្ជាការរងប៉េអឹមស្រុកអង្គស្នួលនោះតែម្តង ហើយបន្ទាប់ពីពួកគាត់រារាំង រថយន្តនោះក៏មិនហ៊ានដែរ បានបើកចេញទៅបាត់ស្រមោល ។
ប្រជាពលរដ្ឋបានបន្តថា ស្រះទឹកមួយនេះអាចចាត់ទុកថា ជាស្រះបុរាណក៏បានដែរ ព្រោះជីកតាំងពីឆ្នាំ១៨៦៣ មកម៉្លេះ គឺជីកនៅក្នុងសម័យអាណានិគមនិយមបារាំងសេស មកទល់នឹងពេលនេះវាមានអាយុកាល១៤៩ឆ្នាំមកហើយ។ ជាងនេះទៅទៀត ស្រះនេះវាមានអត្ថប្រយោជន៍សម្រាប់ពួកគាត់ និងប្រជាពលរដ្ឋនៅក្នុងភូមិចំនួន៩ទៀតខ្លាំងណាស់ ក្នុងការប្រើប្រាស់ទាំងផឹក និងងូតផ្សេងៗ ព្រោះមានតែស្រះមួយនេះប៉ុណ្ណោះ ដែលអាចប្រើបាន ។ ពេលនេះ ស្រះទឹកនេះបានរាក់បន្តិចហើយ ពួកគាត់មានគម្រោងសហការគ្នារៃអង្គាសប្រាក់ ដើម្បីស្តារឲ្យជ្រៅជាងនេះបន្តិច ព្រមទាំងចាក់ខឿនជុំវិញស្រះ និងធ្វើជាជណ្តើរសម្រាប់ឡើងចុះដងទឹកទៀតផង ប៉ុន្តែពុំទាន់បានធ្វើផង ស្រាប់តែប៉េអឹមដឹកដីមកបម្រុងចាក់លុបបែបនេះទៅវិញ ដែលពួកគាត់មិនបានដឹងសូម្បីបន្តិចឡើយ ។
ប្រភពដដែលបានបន្តថា ម្យ៉ាងទៀតមុននឹងមានការប៉ុនប៉ងចាក់ដីលុបនោះមិនមានការប្រជុំឲ្យពួកគាត់ដឹងមុននោះឡើយ ប្រសិនបើបានដឹងមុនក៏ពួកគាត់មិនព្រមដែរ ។ ពេលនេះពួកគាត់សំណូមពរដល់អាជ្ញាធរគ្រប់លំដាប់ថ្នាក់ជួយមើលផង ហើយពួកគាត់ក៏មានការសង្ស័យថា មានជនណាម្នាក់នៅពីក្រោយខ្នងចង់លេបត្របាក់យកដីស្រះទឹកនេះ ដើម្បីដោះដូរជាមួយប៉េអឹមនៅពេលខាងក្រោយណាមួយដើម្បីផលប្រយោជន៍ផ្ទាល់ខ្លួន ។ គាត់និយាយថា សព្វថ្ងៃនេះប៉េអឹមមានបន្ទាយមួយកន្លែងស្ថិតនៅក្នុងសាលាស្រុករួចទៅហើយ តើមានហេតុផលអ្វីត្រូវមកយកដីស្រះទឹករបស់ពួកគាត់បែបនេះសម្រាប់សង់បន្ទាយទៀត បើមិនបានជួយស្តារទេ សូមកុំមកចាក់លុបឱ្យសោះ ។
ទាក់ទិនទៅនឹងហេតុការណ៍នោះកោះសន្តិភាពបានព្យាយាមសាកសួរទៅលោក ស៊ូ វណ្ណធឿន មេបញ្ជាការរងប៉េអឹមស្រុកអង្គស្នួលតាមរយៈទូរស័ព្ទកាលពីវេលាម៉ោងជាង១១ព្រឹកថ្ងៃដដែលនោះ ហើយលោកបានលើកទូរស័ព្ទដែរ ដោយលោកបានប្រាប់ថា ជាប់ប្រជុំហើយក៏បានបិទទូរស័ព្ទទៅវិញ ។ លុះដល់ម៉ោង១និង៥៤នាទីរសៀលទូរស័ព្ទទៅម្តងទៀតមិនអាចទាក់ទងបានដោយមិនដឹងថា លោកបិទទូរស័ព្ទ ឬក៏អស់ថ្មនោះឡើយ ។
ទោះបីជាបែបណាប្រជាពលរដ្ឋនិយាយថា ពួកគាត់ឮប៉េអឹមប្រាប់ថា រដ្ឋាភិបាលបានតម្រូវឲ្យប៉េអឹមស្រុករកទីតាំងសម្រាប់សាងសង់បន្ទាយនៅតាមបណ្តោយផ្លូវជាតិ ដោយសារសព្វថ្ងៃប៉េអឹមស្រុកមានបន្ទាយនៅឆ្ងាយពីផ្លូវទើបរាយការណ៍ជូនទៅលោកមេបញ្ជាការប៉េអឹមខេត្តកណ្តាលឲ្យជួយ ហើយលោកមេបញ្ជាការប៉េអឹមខេត្ត ក៏បានស្នើទៅលោកអភិបាលខេត្តកណ្តាលបានឯកភាពឲ្យលុបស្រះទឹកនេះដើម្បីសាងសង់បន្ទាយ ទើបពេលនេះហ៊ានចាក់ដីលុប ។
ការស្វែងរកមន្ត្រីស្រុក ដែលអាចបំភ្លឺព័ត៌មាននេះ ជាការលំបាកបំផុត ហេតុនេះហើយទើបទទួលបានតែខាងប្រជាពលរដ្ឋ ។ ចំណែកអាជ្ញាធរ និងទីបញ្ជាការប៉េអឹមស្រុក មិនអាចរកការឆ្លើយបំភ្លឺបែបណាមួយបានឡើយ ៕
ចែករំលែកព័តមាននេះ