រាជធានីភ្នំពេញ ៖ ខុទ្ទកាល័យសម្តេចក្រុមព្រះនរោត្តម រណឫទ្ធិ កាលពីថ្ងៃទី១០ កញ្ញា បានចេញសេចក្តីប្រកាសព័ត៌មានមួយដែលកោះសន្តិភាពបានទទួលឲ្យដឹងថា ថ្មីៗនេះខុទ្ទកាល័យសម្តេចក្រុមព្រះនរោត្តម រណឫទ្ធិ បានទទួលព័ត៌មានពីមូលដ្ឋាននៃអ្នករាជានិយមមួយចំនួនឲ្យដឹងថា មានអ្នកនយោបាយខ្លះបានដើរឃោស
រាជធានីភ្នំពេញ ៖ ខុទ្ទកាល័យសម្តេចក្រុមព្រះនរោត្តម រណឫទ្ធិ កាលពីថ្ងៃទី១០ កញ្ញា បានចេញសេចក្តីប្រកាសព័ត៌មានមួយដែលកោះសន្តិភាពបានទទួលឲ្យដឹងថា ថ្មីៗនេះខុទ្ទកាល័យសម្តេចក្រុមព្រះនរោត្តម រណឫទ្ធិ បានទទួលព័ត៌មានពីមូលដ្ឋាននៃអ្នករាជានិយមមួយចំនួនឲ្យដឹងថា មានអ្នកនយោបាយខ្លះបានដើរឃោសនាថា ក្រោយពីការរៀបចំរចនាសម្ព័ន្ធច្របាច់បញ្ចូលគ្នារវាងគណបក្សជាតិនិយម(អតីតគណបក្សនរោត្តម រណឫទ្ធិ) និងគណបក្សហ៊្វុនស៊ិនប៉ិនរួចហើយ «ពួកគេនឹងយាងសម្តេចក្រុមព្រះនរោត្តម រណឫទ្ធិ ទៅដឹកនាំគណបក្សហ៊្វុនស៊ិនប៉ិច» ។
សេចក្តីប្រកាសព័ត៌មានបន្តថា ខុទ្ទកាល័យសម្តេចក្រុមព្រះនរោត្តម រណឫទ្ធិ សូមធ្វើការបដិសេធចំពោះអ្នកនយោបាយណាដែលបាននិងកំពុងផ្សព្វផ្សាយនូវព័ត៌មានមហាអកុសល នេះ ។ ការនិយាយបែបនេះគឺ «ពិតណាត់មានចរិតឆបោកបំភ័ន្តអ្នករាជានិយមពិតប្រាកដ ព្រោះសម្តេចក្រុមព្រះនរោត្តម រណឫទ្ធិ កាលពីថ្ងៃទី១០ សីហា ឆ្នាំ២០១២ បានប្រកាសឈប់ធ្វើនយោបាយ» ។
ខុទ្ទកាល័យសម្តេចក្រុមព្រះនរោត្តម រណឫទ្ធិ បន្តថា ទន្ទឹមនឹងការប្រកាសឈប់ធ្វើនយោបាយនេះ សម្តេចក្រុមព្រះទ្រង់បានព្រះលិខិតក្រាបបង្គំទូលថ្វាយព្រះករុណាជាម្ចាស់ជីវិតលើត្បូងព្រះមហាក្សត្រនៃព្រះរាជាណាចក្រកម្ពុជា ពីការដែលព្រះអង្គបានសម្រេចព្រះទ័យឈប់ពីនយោបាយហើយ ហើយសម្តេចក្រុមព្រះទ្រង់បានទូលថ្វាយនូវព្រះរាជយោបល់ដល់ព្រះមហាក្សត្រថា «អ្នករាជានិយមពិតប្រាកដគួរដកខ្លួនចេញឲ្យឆ្ងាយពីឆាកនយោបាយ» ។
ខុទ្ទកាល័យសម្តេចក្រុមព្រះនរោត្តម រណឫទ្ធិបានអះអាងថា ដូច្នេះអ្នកនយោបាយខ្លះឃោសនាផ្សព្វផ្សាយតាមបណ្តាមូលដ្ឋានអ្នករាជានិយមនានាថា ពួកគេនឹងយាងសម្តេចក្រុមព្រះទៅដឹកនាំគណបក្សហ៊្វុនស៊ិនប៉ិចវិញនោះគឺ«ពិតជាការភូតភរឆបោក លួងលោមទឹកចិត្តអ្នករាជានិយមពិតប្រាកដឲ្យទៅគាំទ្រពួកគេ ដោយយកព្រះនាមសម្តេចក្រុមព្រះនរោត្តម រណឫទ្ធិ ទៅប្រើប្រាស់ក្នុងន័យកេងចំណេញនយោបាយតែប៉ុណ្ណោះ» ។
ខុទ្ទកាល័យសម្តេចក្រុមព្រះនរោត្តម រណឫទ្ធិ បន្ថែមថា អាស្រ័យដូចនេះ សូមសាធារណមតិជាតិ និងអន្តរជាតិ ជាពិសេសមូលដ្ឋានអ្នករាជានិយមពិតប្រាកដកុំជឿសម្តីកុហកភូតភរ បោកបញ្ឆោតនេះតទៅទៀត ព្រោះសម្តេចក្រុមព្រះនរោត្តម រណឫទ្ធិ ទ្រង់ពិតជាបានលាឈប់ពីនយោបាយហើយ ។
គួររំលឹកថា កាលពីថ្ងៃទី២៥ សីហា ២០១២ គណបក្សជាតិនិយម និងគណបក្សហ៊្វុនស៊ិនប៉ិចបានធ្វើសមាជប្រកាសច្របាច់បញ្ចូលគ្នាក្រោយពីសម្តេចក្រុមព្រះបានប្រកាសលាឈប់ម្តងទៀតពីនយោបាយ ។ បន្ទាប់ពីសមាជរួច លោក សៅ រ៉ានី ប្រធានគណបក្សជាតិនិយម (អតីតគណបក្សនរោត្តម រណឫទ្ធិ) បានអះអាងថា គណបក្សហ៊្វុនស៊ិនប៉ិចមិនទាន់ប្រាកដទេថា នឹងយាងសម្តេចព្រះមកដឹកនាំវិញឬយ៉ាងណាទេ ពីព្រោះទ្រង់បានលាឈប់ពីនយោបាយ ហើយក៏មិនដឹងថា ទ្រង់នឹងយាងត្រឡប់ចូលឆាកនយោបាយវិញនៅពេលណានោះ ។ គណបក្សហ៊្វុនស៊ិនប៉ិច នៅមិនទាន់មានគម្រោងយាងសម្តេចក្រុមព្រះមកដឹកនាំទេ ហើយក៏នឹងមិនបដិសេធការយាងមកវិញរបស់ទ្រង់ដែរ គឺថា «យើងមិនបានបិទផ្លូវសម្រាប់សម្តេចក្រុមព្រះទេ បើសិនជាទ្រង់ចង់មកវិញនោះ» ៕
ចែករំលែកព័តមាននេះ