ខេត្ត្កំពង់ធំ ៖ នារសៀលថ្ងៃទី២៧ កក្កដា នៅស្នងការដ្ឋាននគរបាលខេត្ត មានរៀបចំកិច្ចប្រជុំត្រួតពិនិត្យបូកសរុបការងារប្រចាំខែកក្កដា និងទិសដៅសម្រាប់ខែសីហាជាពិសេសការដាក់ផែនការការពារសន្តិសុខសុវត្ថិភាពជូនប្រមុខរាជរដ្ឋាភិបាលក្នុងពិធីសម្ពោធបើកឱ្យប្រើប្រាស់ផ្លូវជាតិលេខ៦២មានប្រវែង១២៨គីឡូម៉ែត្រ ចេញពីខេត្តកំពង់ធំទៅដល់ក្រុងត្បែងមានជ័យ ខេត្តព្រះវិហារ នៅថ្ងៃទី៨ សីហាខាងមុខ ។
លោក លឹម ហេន ស្នងការរងនគរបាលខេត្តទទួលបន្ទុកសេនាធិការ បានអានស្មារតីអង្គប្រជុំរបស់លោកឧត្តមសេនីយ៍ឯក យូ ស៊ុនឡុង អគ្គស្នងការនគរបាលជាតិ ដែលបានដាក់ឱ្យស្នងការដ្ឋាននគរបាលខេត្តកំពង់ធំរៀបចំការពារសន្តិសុខសុវត្ថិភាពក្នុងឱកាសសម្ពោធបើកឱ្យប្រើប្រាស់ផ្លូវជាតិលេខ៦២ ដើម្បីធានាឱ្យបាននូវសុវត្ថិភាពជូនសម្តេចតេជោហ៊ុនសែន និងលោកជំទាវ ព្រមទាំងថ្នាក់ដឹកនាំជាន់ខ្ពស់របស់រាជរដ្ឋាភិបាល ព្រឹទ្ធសភា រដ្ឋសភា ភ្ញៀវជាតិ និងអន្តរជាតិដែលបានអញ្ជើញចូលរួមក្នុងពិធី។
បន្ទាប់ពីបានស្តាប់សេចក្តីរាយការណ៍ស្តីពីផែនការដែលត្រូវបែងចែកកម្លាំងរួចមក លោកផាន់ សុផេង ស្នងការនគរបាលខេត្តបានណែនាំឱ្យកម្លាំងនគរបាលទាំងអស់ចែកចេញជា២ក្រុមធំៗ ក្នុងការការពារសន្តិសុខសុវត្ថិភាព ។ កងកម្លាំងនគរបាលទាំងអស់ត្រូវត្រៀមសម្ភាររួចជាស្រេច សម្រាប់រយៈពេល៣ថ្ងៃគឺ ថ្ងៃទី៦ដល់ថ្ងៃទី៨ សីហា និងត្រូវចូលមកកាន់ទីកន្លែងគោលដៅនៅព្រឹកថ្ងៃទី៦ សីហាជាកំហិត៕
ចែករំលែកព័តមាននេះ