យោងតាមគេហទំព័រ asiaone ចេញផ្សាយថ្ងៃទី២៧ មិថុនា ឆ្នាំ២០១២ ឱ្យដឹងថា ក្រៅពីកំណើនប្រជាជន និងការកើនឡើងនៃមន្ទីរពេទ្យ សាលារៀន ប្រទេសវៀតណាមត្រូវបានគេចាត់ទុកជាប្រទេសលំដាប់ទី២ដែលមានសេចក្តីសុខបំផុតនៅលើលោក បន្ទាប់ពីប្រទេសកូស្តារីកា ស្ថិតនៅលំដាប់ទី១ និងប្រទេសកូឡុំប៊ី ស្ថិតនៅលំដាប់ទី៣ ។
ចំណាត់ថ្នាក់នេះមជ្ឈមណ្ឌល Happy Planet Index (HPI)ជាអ្នករៀបចំចងក្រង និងផ្សព្វផ្សាយដោយ New Economics Foundation ដែលជាស្ថាប័នឯករាជ្យមួយនៅក្នុងប្រទេសអង់គ្លេស ។
ចំណាត់ថ្នាក់បណ្តាប្រទេសនីមួយៗគឺផ្អែកទៅលើសុខភាព និងភាពសប្បាយរីករាយរបស់ប្រជាជនដែលពួកគេបង្កើតបានពីបរិស្ថានទូទៅ, ការប្រើប្រាស់ទិន្នន័យសាកលទៅលើអាយុកាលមធ្យមរបស់ប្រជាជន, ភាពសុខដុមរមនា និងចីរភាពនៃបរិស្ថាន ។
របាយការណ៍មជ្ឈមណ្ឌលបានបង្ហាញថា ប្រទេសកូស្តារីកា ,វៀតណាម និងប្រទេសកូឡុំប៊ី គឺជាប្រទេសដែលប្រជាជនមានអាយុវែងជាងគេបំផុត, សប្បាយរីករាយជាងគេបំផុត និងមានជីវិតសុខសាន្តជាងគេបំផុត ។ ទន្ទឹមនឹងនេះ ការចាត់ថ្នាក់របស់មជ្ឈមណ្ឌល HPI ក្នុងឆ្នាំ២០១២នេះ ប្រទេសវៀតណាមបានឈានឡើងគួរឱ្យកត់សម្គាល់ បើប្រៀបធៀបនឹងឆ្នាំមុនៗ ។
របាយការណ៍ដដែលបានបង្ហាញថា ក្រៅពីប្រទេសវៀតណាម នៅមានប្រទេសមួយចំនួនទៀតស្ថិតនៅក្នុងលំដាប់កំពូលទាំង១០គឺចេញពីទ្វីបអាមេរិកខាងត្បូង រួមមាន ៖ ប្រទេសបេលី, ប្រទេសអែលសាល់វ៉ាឌ័រ, ប្រទេសហ្សាម៉ាអីុក, ប្រទេសប៉ាណាម៉ា, ប្រទេសនីការ៉ាហ្គា, ប្រទេសវេណេស៊ុយអេឡា និងប្រទេសក្វាតេម៉ាឡា ។ ដោយឡែក សហរដ្ឋអាមេរិក ស្ថិតនៅលំដាប់ថ្នាក់ទី១០៥ និងប្រទេសអង់គ្លេស នៅលំដាប់ថ្នាក់ទី៤១ ។ រីឯប្រទេសដែលមានចំណាត់ថ្នាក់ទាបជាងគេបំផុតគឺប្រទេសកាតា, ប្រទេសឆាដនិងប្រទេសបុតស្វាណា ។
លោក Saamah Abdallah អ្នកស្រាវជ្រាវជាន់ខ្ពស់ប្រចាំស្ថាប័ន New Economics Foundation បានឱ្យដឹងថា កិត្យានុភាពនៃបណ្តាប្រទេសអ្នកមាន និងអ្នកក្រគឺមានលក្ខណៈប្រកួតប្រជែងខុសៗគ្នា ប៉ុន្តែពួកគេមានគោលបំណងក្នុងការសម្រេចទិសដៅដូចគ្នា ។
តាមរបាយការណ៍បានបញ្ជាក់ទៀតថា មជ្ឈមណ្ឌល HPI គឺបង្កើតឡើងក្នុងគោលបំណងធ្វើឱ្យប្រសើរឡើងនូវអាយុកាលមធ្យមនៃជីវិតមនុស្សតាមរយៈការផ្សព្វផ្សាយនៃរបកគំហើញលើផ្នែកសេដ្ឋកិច្ច, បរិស្ថាន និងបញ្ហាសង្គម ។
គួរបញ្ជាក់ថា ក្នុងរបាយការណ៍ឆ្នាំ២០០៦ របស់មជ្ឈមណ្ឌល Happy Planet Index បានបង្ហាញថា ប្រទេសកម្ពុជាស្ថិតនៅលំដាប់ថ្នាក់ទី៩១ ដែលគិតអាយុកាលមធ្យមនៃជីវិតគឺស្មើនឹង ៤២.១៥ ។ ដោយឡែកក្នុងឆ្នាំ២០០៩ របាយការណ៍នេះបានធ្វើស្ថិតិម្តងទៀត ឃើញថាប្រទេសកម្ពុជាស្ថិតនៅចំណាត់ថ្នាក់ទី៨០ ដែលគិតអាយុកាលមធ្យមនៃជីវិតគឺស្មើនឹង៤២.៣ ៕
ចែករំលែកព័តមាននេះ