ខេត្តប៉ៃលិន ៖ អ្នកខ្លះបាននិយាយតាមពាក្យចចាមអារ៉ាមថា ចេតិយរបស់ចៅចិត្រ និងនាងឃុននារីមានពិតមែន នៅក្នុងបរិវេណវត្តភ្នំយ៉ាត តែអ្នកខ្លះទៀតថា នៅក្នុងបរិវេណវត្តរតនសោភ័ណ ហៅវត្តកោងកាង ។ ចំណែកអ្នកផ្សេងទៀតឱ្យដឹងថា ផ្ទះរបស់ចៅចិត្រនៅភូមិវត្ត ក្រុងប៉ៃលិន ។ ទោះបីជាបែបណាក៏ដោយនោះគ្រាន់តែជាការតំណាលតៗគ្នា ប៉ុណ្ណោះ មិនមែនជាការពិតដែលមានភស្តុតាងបញ្ជាក់ច្បាស់លាស់ឡើយ ។
តាមពិតទៅរឿងកុលាបប៉ៃលិនជាប្រលោមលោកដ៏ល្បីល្បាញមួយរបស់អ្នកនិពន្ធលោក ញ៉ុក ថែម ដែលបាននិពន្ធឡើងនៅសតវត្សទី១៩ ស្ថិតក្នុងសម័យអាណានិគមនិយមបារាំង ។ រឿងនេះបានឆ្លុះបញ្ចាំងពីជីវិតរស់នៅរបស់កម្មករជីកត្បូងនៅបប៉ៃលិន ។ គោលគំនិតនៃការតាក់តែងរឿងនេះគឺឱ្យប្រកាន់ខ្ជាប់នូវបណ្តាំ «អត្តាហិ អត្តនោ នាថោ» មានន័យថា «ខ្លួនទីពឹងខ្លួន» ។
លោក លឹម ប៊ុនហេង ប្រធានមន្ទីរវប្បធម៌ និងវិចិត្រសិល្បៈខេត្តប៉ៃលិនឱ្យដឹងថា រឿងកុលាបប៉ៃលិន មិនដូចប្រជាពលរដ្ឋមួយចំនួនអះអាងថា មានចេតិយចៅចិត្រ និងនាងឃុននារី នៅក្នុងបរិវេណវត្តភ្នំយ៉ាត ឬនៅវត្តរតនសោភ័ណទេ ។ ចំណែកនៅក្នុងមន្ទីររបស់លោកក៏គ្មានឯកសារណាដែលបញ្ជាក់ថា ចៅចិត្រមានផ្ទះនៅកន្លែងណាមួយក្នុងខេត្តប៉ៃលិន ឬផ្នូរសពរបស់គេនៅកន្លែងណាមួយក្នុងខេត្តប៉ៃលិនដែរ ។ តួអង្គចៅចិត្រ និងនាងឃុននារីគ្រាន់តែជាឈ្មោះដែលអ្នកនិពន្ធលោក ញ៉ុក ថែម មានស្រុកកំណើតនៅឃុំស្វាយប៉ោ ស្រុកសង្កែ ខេត្តបាត់ដំបង ប្រឌិតឡើងប៉ុណ្ណោះ ។
លោកព្រឹទ្ធាចារ្យ សំ អ៊ុងពៅ ប្រធានមន្ទីរធម្មការ និងសាសនាខេត្តឱ្យដឹងថា តាមលោកស្រាវជ្រាវប្រវត្តិនៅតាមវត្តអារាមផ្សេងៗរកមើលពីភស្តុតាងបញ្ជាក់ថា ចេតិយចៅចិត្រ និងនាងឃុននារីនៅកន្លែងណាមួយ គឺរកអត់ឃើញទេ ។ រឿងកុលាបប៉ៃលិន គ្រាន់តែជាការតែងនិពន្ធរបស់លោកញ៉ុក ថែម ដែលជាអ្នកនិពន្ធដ៏ល្បីនៅសម័យអាណានិគមនិយមបារាំង ប៉ុណ្ណោះ ដើម្បីបង្ហាញពីសេចក្តីស្នេហាមិនរើសវណ្ណៈ គឺកម្មករអាចមានសិទ្ធិទទួលចៅហ្វាយរបស់ខ្លួនធ្វើជាភរិយាបាន ឱ្យតែបុរសនោះមានលក្ខណ សម្បត្តិគ្រប់គ្រាន់ ។ ម៉្យាងវិញទៀត រឿងនេះឆ្លុះបញ្ចាំងថា ការតស៊ូព្យាយាមប្រឹងប្រែងរបស់បុគ្គលក្រីក្រម្នាក់គង់តែបានសម្រេចដូចបំណងមិនខាន ។
ចំណែកលោក តង់ ធារ៉ា ប្រធានមន្ទីរអប់រំ យុវជន និងកីឡាខេត្តប៉ៃលិនមានប្រសាសន៍ថា តួអង្គចៅចិត្រ និងនាងឃុននារីអត់មានពិតប្រាកដទេនៅក្នុងខេត្តប៉ៃលិន ។ តាមពិតទៅនេះគ្រាន់តែជារឿងប្រលោមលោកមួយដែលឆ្លុះបញ្ចាំងពីសេចក្តីស្មោះត្រង់របស់កម្មករចំពោះចៅហ្វាយនាយ ភាពតស៊ូព្យាយាម និងភាពក្លាហានមោះមុតរបស់តួអង្គចៅចិត្រ ដែលហ៊ានលះបង់ជីវិតដើម្បីជួយសង្គ្រោះចៅហ្វាយនាយ ពេលចោរចូលប្លន់ផ្ទះលោកហ្លួងរតនសម្បត្តិ និងបង្ហាញពីស្នេហាមិនប្រកាន់វណ្ណៈ មិនរើសអើងមានឬក្រ ទាបឬខ្ពស់ ។
លោកបន្តទៀតថា រឿងកុលាបប៉ៃលិនត្រូវក្រសួងអប់រំបញ្ចូលក្នុងកម្មវិធីសិក្សាទុកជាកេរដំណែលសម្រាប់ឱ្យសិស្សានុសិស្សជំនាន់ក្រោយយកគំរូតាមតួអង្គចៅចិត្រ ព្រមទាំងបង្ហាញថា ខេត្តប៉ៃលិនជាទឹកដីដ៏សម្បូរទៅដោយត្បូងមានតម្លៃ ៕
ចែករំលែកព័តមាននេះ