ស្រាវជ្រាវ ៖ ក្នុងខណៈពេលកងទ័ពណាហ្ស៊ីចាប់ផ្តើមចុះចាញ់នៅទីក្រុងស្តាលីនហ្ក្រាដ និងអាហ្រ្វិកខាងជើង លោកអាដុល ហ៊ឺទ្លែរ មេដឹកនាំផ្តាច់ការអាល្លឺម៉ង់ មានបំណងចង់បំលែងស្ថានការណ៍ដោយបញ្ជាឱ្យក្រុមអ្នកវិទ្យាសាស្ត្របង្កើត «អាវុធទំនើប» ដើម្បីយកជ័យជំនះ ។ ទោះបីជាមានអាវុធប្រភេទមួយចំនួនដូចជាកាំជ្រួច V2 និងយន្តហោះប្រដេញស៊េរីដំបូងនឹងត្រូវយកទៅប្រើប្រាស់ប្រយុទ្ធជាមួយក្រុមសម្ព័ន្ធមិត្តក៏ដោយ ប៉ុន្តែក៏មានភាពយឺតយ៉ាវ ហើយត្រូវផ្អាកដោយសារការបរាជ័យរបស់ទ័ពណាហ្ស៊ី ។
ក្រៅពីនេះ នៅមានអាវុធផ្សេងៗទៀត ដោយ«ស្ថិតនៅក្នុងក្តីស្រមៃ» មិនទាន់ឆ្លងកាត់ដំណាក់កាលដាក់ផែនការ និង «ថាសហោះ» (UFO) ដែលមានគំរោងប្រើប្រាស់ទំលាក់គ្រាប់លើទីក្រុងឡុង ប្រទេសអង់គ្លេស និងទីក្រុងញូវយ៉ក សហរដ្ឋអាមេរិក ក៏ស្ថិតនៅក្នុងគំរោងខាងលើដែរ ។ បច្ចុប្បន្នមានការគូសបញ្ជាក់ថា ក្រុមអ្នកវិទ្យាសាស្ត្ររបស់ហ៊ឺទ្លែរ ធ្លាប់ចេញម៉ូដយានអវកាសមានរូបរាងស្រដៀងនឹង «ថាសហោះ» (UFO) និងវិវត្តន៍ដល់ការបង្កើតយាន «គំរូដំបូង» អាចហោះហើរបាននាពេលកន្លងមក ។
ដោយឡែក នៅក្នុងរបាយការណ៍ទស្សនាវដ្តី PM របស់អាល្លឺម៉ង់បញ្ជាក់ថា គំរោងការខាងលើ ស្ថិតនៅក្រោមការគ្រប់គ្រងរបស់លោកហាន ខេមល័រ និងទទួលជោគជ័យដ៏ត្រចះត្រចង់ក្នុងពេលសាកល្បងប្រឆាំងនឹងកំលាំងទំនាញផែនដី ។ របាយការណ៍ខាងលើ គឺយោងតាមការបញ្ជាក់របស់សាក្សីដែលជឿថា ខ្លួនធ្លាប់ឃើញ «ថាសហោះ» ហោះស្ថិតក្នុងកំរិតទាបនៅលើទន្លេ «ថេម» កាលពីឆ្នាំ១៩៤៤។ ស្របពេលជាមួយគ្នានេះ ក្នុងឆ្នាំនោះដែរកាសែត «ញូវយ៉កថែម» ធ្លាប់ចុះផ្សាយទាក់ទិននឹង «ថាសហោះ» ចំលែក និងមានភ្ជាប់រូបថតវត្ថុចំលែកខាងលើ ខណៈពេលកំពុងហោះនៅពីលើអគារក្នុងក្រុងញូវយ៉ក ដោយល្បឿនលឿន ។
ទស្សនាវដ្តី PM បញ្ជាក់ទៀតថា កងទ័ពណាហ្ស៊ី បានកំទេចចោលកំណត់ហេតុពិសោធន៍ផ្នែកប្រវត្តិសាស្ត្រជាច្រើន ប៉ុន្តែនៅក្នុងឆ្នាំ១៩៦០ អ្នកជំនាញ UFO ក្នុងប្រទេសកាណាដា បានសាកល្បងផលិតវត្ថុចំលែកនេះជាថ្មី និងឃើញមានផលប្រយោជន៍ គឺអាចហោះបាន ។ គំរោងការរបស់ហ៊ឺទ្លែរ មានឈ្មោះថា «ឈ័ររីវើហាប៊ែរ៍ម៉ុល» ធ្វើការសាកល្បងនៅទីក្រុងប្រាគរវាងឆ្នាំ១៩៤១-១៩៤៣ ដោយមានលោករ៉ូដហ្វ ឈ័រីវើ ជាវិស្វករទី១ និងអាកាសយានិក រីឯលោកអូតតូ ហាប៊ែរ៍ម៉ុល ជាវិស្វករទី២ ។
ស្របពេលជាមួយគ្នានេះ លោកចូសេហ្វ អេនដ្រៀស វិស្វករម្នាក់ទៀតនៅក្នុងគំរោងការរបស់ហ៊ឺទ្លែរ បង្ហើបឱ្យដឹងថា កងទ័ពណាហ្ស៊ី បានបង្កើតថាសហោះ គំរូដំបូងដល់ទៅ១៥គ្រឿង ដោយបន្ទប់អាកាសយានិក ស្ថិតនៅផ្នែកកណ្តាលថាសហោះ និងមានស្លាបបង្វិលបានរាងជារង្វង់មូលជួយឱ្យអណ្តែតបាន ។
ក្រោយពីសង្គ្រាមលោកលើកទី២បានបញ្ចប់ អ្នកវិទ្យាសាស្ត្ររបស់ណាហ្ស៊ីជាច្រើននាក់បានចូលរួមក្នុងគំរោងការសាកល្បងយានអវកាសរបស់សហរដ្ឋអាមេរិក។ លោកអ៊ីហ្គ័រ វីតកូស្គី អតីតអ្នកសារព័ត៌មាន និងជាអ្នកប្រវត្តិសាស្ត្រយោធាជនជាតិប៉ូឡូញ បានសរសេរនៅក្នុងសៀវភៅ “Pradaw O Wunderwaffe” ដែលបោះពុម្ពផ្សាយក្នុងឆ្នាំ២០០០ ថា កងទ័ពណាហ្ស៊ីអាល្លឺម៉ង់ធ្លាប់បង្កើតយន្តហោះមានលក្ខណៈដូចគ្នានឹងជួងផ្កាប់ ហើយលោកហ៊ឺទ្លែរ បានបញ្ជាឱ្យប្រមូលអ្នកវិទ្យាសាស្ត្រ និងវិស្វករយ៉ាងច្រើនមកជួយការងាររបស់ទ័ព ៕
ចែករំលែកព័តមាននេះ