« ម៉ែឪមានគុណ គុណមានទម្ងន់ ធ្ងន់ដូចប្រឹថពី គ្មានអ្វីនឹងសង គុណលោកទាំងពីរ មាសប៉ុនគិរី ថ្លៃពុំស្មើផង » ។ កំណាព្យមួយឃ្លានេះបញ្ជាក់ពីគុណរបស់ឪពុកម្តាយ ថ្វីដ្បិតតែខ្លី តែពោរពេញទៅដោយអត្ថន័យ និងខ្លឹមសារមិនអាចកាត់ថ្លៃបាន ។
អ្នកម្តាយជាអ្នកផ្តល់កំណើតដល់កូនរមែងយកចិត្តទុកដាក់ថ្នាក់ថ្នមបមបីចិញ្ចឹមបីបាច់ថែរក្សា រហូតធំធាត់កាលណា បញ្ជូនកូនទៅសាលា ដើម្បីក្រេបជញ្ជក់ចំណេះដឹងពីលោកគ្រូ អ្នកគ្រូតាំងពីថ្នាក់ទាបរហូតដល់កម្រិតឧត្តមសិក្សា ។
រីឯការខិតខំបង្ហាត់បង្រៀនពីសំណាក់លោកគ្រូ អ្នកគ្រូអស់ពីកម្លាំងកាយកម្លាំងចិត្ត ធ្វើឱ្យយើងក្លាយជាកុលបុត្រកុលធីតាប្រកបដោយធនធានមានសមត្ថភាព និងក្លាយជាសសរទ្រូងនៃប្រទេសជាតិ ។ កាតព្វកិច្ចដែលមិនអាចកាត់ថ្លៃបាននេះ បានដិតជាប់ក្នុងអារម្មណ៍អ្នកសិក្សាគ្រប់ៗរូប ហើយបានចាត់ទុកថា លោកគ្រូ អ្នកគ្រូ គឺជាមាតាបិតាទីពីរគ្រប់ៗគ្នា ។ ថ្វីដ្បិតតែពួកគាត់មិនបានផ្តល់កំណើតក៏ពិតមែន តែលោកបានផ្តល់នូវចំណេះដឹងយ៉ាងទូលំទូលាយដល់អ្នកសិក្សាគ្រប់ៗគ្នា ។
ទាក់ទិននឹងទង្វើដ៏ល្អប្រកបដោយគុណធម៌ទាំងនេះ តាមប្រភពពី Xinhua News Agency ចេញផ្សាយថ្ងៃទី១៤ ឧសភា ឆ្នាំ ២០១២ បានឱ្យដឹងពីគ្រោះថ្នាក់ចរាចរណ៍ដ៏រន្ធត់មួយដែលបានកើតឡើងលើរូបអ្នកគ្រូបង្រៀននៅអនុវិទ្យាល័យម្នាក់ ព្រោះតែជួយសង្គ្រោះជីវិតសិស្ស បណ្តាលឱ្យគាត់រងគ្រោះស្ទើរបាត់បង់ជីវិតខ្លួនឯង ។
ករណីនេះបានកើតឡើងកាលពីវេលាម៉ោង ៨ និង៣៨នាទីយប់ ថ្ងៃទី៨ ខែឧសភា ឆ្នាំ២០១២ នៅមុខអនុវិទ្យាល័យមួយក្នុងក្រុង
Jiamusi ខេត្ត Heilongjiang ប្រទេសចិន បង្កឡើងដោយរថយន្តដឹកសិស្សតែម្តង ។
ប្រភពបន្តថា ខណៈដែលម៉ោងសិក្សាពេលយប់ត្រូវបានបញ្ចប់ រថយន្តដឹកសិស្សជាច្រើនគ្រឿងបានមកចតតម្រង់ជាជួររង់ចាំទទួលសិស្សទៅផ្ទះ ។ ពេលនោះរថយន្តដែលនៅក្រោយគេ ត្រូវចេញដំណើរ ស្រាប់តែបាត់បង់ម្ចាស់ការ ក៏ជ្រុលមកបុករថយន្តខាងមុខ ហើយរុញសំដៅមកបុកសិស្សដែលកំពុងឈរហៀបនឹងឡើងរថយន្ត ។ ដោយឃើញស្ថានភាពគ្រោះថ្នាក់បែបនេះ អ្នកគ្រូម្នាក់ដែលគេស្គាល់ថា ឈ្មោះ ហ្សាង លីភីង (Zhang Liping) បានស្ទុះទៅច្រានសិស្សពីរនាក់ចេញរួចផុតពីគ្រោះថ្នាក់ដោយសុវត្ថិភាព ។ ប៉ុន្តែជាអកុសល អ្នកគ្រូវ័យ២៩ឆ្នាំរូបនេះ ត្រូវរថយន្តបុកពេញទំហឹង បណ្តាលឱ្យរងបួសយ៉ាងដំណំ ។ ដោយឡែកសិស្សទាំងនោះគ្រាន់តែរងរបួសបន្តិចបន្តួចប៉ុណ្ណោះ ។
ពេលនេះអ្នកគ្រូរូបនោះកំពុងសន្លប់បាត់ស្មារតី និងកំពុងទទួលការព្យាបាលយ៉ាងយកចិត្តទុកដាក់បំផុតនៅមន្ទីរពេទ្យលំដាប់ខ្ពស់នៅខេត្ត Heilongjiang ពីសំណាក់វេជ្ជបណ្ឌិតចំនួន៥រូបដែលបានបញ្ជូនមកព្យាបាលដោយក្រសួងសុខាភិបាល ព្រោះស្ថានភាពរបួសធ្ងន់ធ្ងរ ដោយបាក់ចង្កេះ ហើយជើងទាំងពីររបស់នាងអាចនឹងត្រូវកាត់តែម្តង ប្រសិនបើស្ថានភាពមិនអំណោយផល ។
ប្រភពបន្តថា ឧប្បតិ្តហេតុគ្រោះថ្នាក់ចរាចរណ៍ដ៏រន្ធត់នេះធ្វើឱ្យគ្រួសារអ្នកគ្រូ ក៏ដូចជាលោកគ្រូ អ្នកគ្រូទាំងអស់ ព្រមទាំងសិស្សានុសិស្សក្រៀមក្រំយ៉ាងខ្លាំង ។
ទាក់ទឹននឹងករណីនេះ អាជ្ញាធរមូលដ្ឋាន បានធ្វើការស៊ើបអង្កេតជំហានដំបូង ហើយជាលទ្ធផលបានឱ្យដឹងថា ឧប្បត្តិហេតុនេះបង្កឡើងដោយសាររថយន្តជាន់ហ្វ្រាំងមិនស៊ី ។ ម៉្យាងទៀតអ្នកបើកបរបញ្ចូលលេខរថយន្តបណ្តើរ និយាយជាមួយមនុស្សឯទៀតនៅក្នុងរថយន្តបណ្តើរ ធ្វើឱ្យបាត់បង់ការប្រុងប្រយ័ត្នបណ្តាលឱ្យគ្រោះថ្នាក់នេះកើតឡើងតែម្តង ។ បច្ចុប្បន្ន អ្នកបើកបររថយន្តបង្កហេតុជាស្ត្រីដែលគេស្គាល់ឈ្មោះ Xiao រូបនោះកំពុងត្រូវបានឃុំខ្លួន ៕
ចែករំលែកព័តមាននេះ