នាង លីន ជីលីង (Lin Chi-ling) តារាភាពយន្ត និងជាតារាម៉ូដែលតៃវ៉ាន់ ដែលគេស្គាល់គ្រប់គ្នាថាជានារីម្នាក់មានសម្រស់ស្រស់ស្អាតជាងគេបំផុតនៅកោះតៃវ៉ាន់នោះ ត្រូវបានគេដឹងថា នាងមិនធ្លាប់គិតពីរឿងរកគូស្រករឡើយ ។ ប៉ុន្តែថ្មីៗនេះ នៅទីក្រុងហុងកុង ប្រទេសចិន នាងបានបង្ហើបថា វាមិនដូចគេនិយាយនោះទេ ។ នេះបើយោងតាមប្រភពពីគេហទំព័រដេលីឈីលី ចេញផ្សាយថ្ងៃទី២៦ មេសា ២០១២ ។
ជាធម្មតា ខ្សែជីវិតរបស់នាងលីន ជីលីង បានក្លាយជាកម្មវត្ថុដ៏គួរឱ្យចាប់អារម្មណ៍មួយរបស់បណ្តាប្រព័ន្ធផ្សព្វផ្សាយព័ត៌មាន ដែលបានចោទសួរនូវសំណួរជាច្រើនអំពីចំណងមិត្តភាពរវាងនាង និងអតីតមិត្តប្រុសរបស់នាងគឺលោក Scott Qiu ដែលជាអ្នកជំនួញ និងតារាភាពយន្តម្នាក់ទៀតគឺលោក Jerry Yan ។
តារាភាពយន្តល្បីឈ្មោះវ័យ៣៧ឆ្នាំរូបនេះ បានអះអាងទាំងទឹកមុខញញឹមថា នាងនៅទំនេរទេ ហើយសូមបដិសេធថា នាងមិនបានបង្កាត់ភ្លើងស្នេហ៍ជាមួយលោក Scott Qiu ឬក៏លោក Jerry Yan ឡើយ ។ នាងបានបន្តថា ហេតុអ្វីបានជាគ្រប់ទីកន្លែងដែលនាងទៅ តែងតែត្រូវគេសួរនូវសំណួរដូចគ្នាបែបនេះ សូម្បីតែពេលនាងនៅទីក្រុងហុងកុង ? ឆ្លើយតបទៅនឹងសំនួរនេះ នាងបាននិយាយថា មាននារីច្រើនណាស់ដែលចោមរោមស្រឡាញ់ពួកគាត់ទាំងពីរនាក់ គឺមិនមែននាងទេ ហើយនាងនៅតែប្រកាន់ជំហរថា បច្ចុប្បន្ននេះ នាងក៏ពុំទាន់មានគូស្នេហ៍ដែរ ។
នាងបានរៀបរាប់ប្រាប់អ្នកសារព័ត៌មានថា «នាងខ្ញុំគិតថា គ្មានបុរសណាហ៊ានមកចែចង់នាងខ្ញុំទេ នាងខ្ញុំមិនដឹងពីមូលហេតុទេ តែមានអ្នកខ្លះបានប្រាប់នាងខ្ញុំថា មកពីនាងខ្ញុំរវល់តែរឿងការងារពេក និងមិនដែលមានពេលស្វែងយល់ពីចិត្តបុរសៗ »។
ទោះបីជានាងមិនប្រញាប់គិតគូររឿងគ្រួសារយ៉ាងណាក៏ដោយ ក៏តារាភាពយន្ត និងម៉ូដែលរូបនេះ នៅតែប្រាថ្នាជួបបុរសដែលមានចិត្តស្មោះសម្រាប់ផ្តល់បេះដូងបរិសុទ្ធទៅថ្ងៃអនាគត ៕
ចែករំលែកព័តមាននេះ