យោងតាមប្រភពពីគេហទំព័រឆាយណាប៊ឺស ចេញផ្សាយថ្ងៃទី២៤ មេសា ឆ្នាំ ២០១២ បានឱ្យដឹងនូវជីវិតដ៏គ្រោះថ្នាក់របស់អ្នកភូមិ Hongde ដែលជាភូមិមួយនៅតំបន់ភ្នំដាច់ស្រយាលពីគេ ស្ថិតនៅភាគនិរតីនៃខេត្ត Guizhou ប្រទេសចិន ហើយការរស់នៅរបស់ពួកគេ អាចចាត់ទុកជាភូមិទុរ្ភិក្សជាទីបំផុត ស្ទើរតែជាតំបន់ស្ថិតនៅក្រៅពិភពលោកទៅហើយ ។ ទន្ទឹមនឹងនេះ នៅពេលដែលពួកគេធ្វើដំណើរទៅកាន់តំបន់ផ្សេង ត្រូវឆ្លងកាត់ជ្រោះមួយដែលអ្នកភូមិនៅទីនោះហៅថា « ជ្រោះមរណៈ » ព្រោះថាជ្រោះនេះមានកម្ពស់១៤០ម៉ែត្រ និងប្រវែង៨០ម៉ែត្រ និងមានស្ទឹងទឹកហូរនៅខាងក្រោមទៀតផង ។
ប្រភពបានឱ្យដឹងទៀតថា កាលពីមុនអ្នកភូមិ Hongde ត្រូវចំណាយពេលពី២ទៅ៣ម៉ោងក្នុងការចុះនិងឡើងជ្រោះមរណៈនេះ និងត្រូវឆ្លងទឹកស្ទឹងដែលហូរខ្មួលខ្មាញ់នៅខាងក្រោមទៀត ក្នុងនោះក៏មានក្មេងស្រី២នាក់បានរសាត់តាមទឹកហូរ បាត់បង់ជីវិតផងដែរ ។ ក្រោយមកនៅក្នុងឆ្នាំ២០០១ ដើម្បីងាយស្រួលក្នុងការធ្វើដំណើរទៅកាន់ភូមិជិតខាង ក៏ដូចជាតំបន់ផ្សេងៗទៀត ពួកគេក៏បានសហការគ្នាបង្កើតកន្ត្រកយោងដោយប្រើខ្សែពួរធ្វើជាយានចម្លងឆ្លងកាត់ជ្រោះមរណៈនេះ ។
ប្រភពបន្តថា រយៈពេល១១ឆ្នាំក្រោយមក ដោយមានការសហការពីស្ត្រីចំណាស់ម្នាក់ឈ្មោះ Gu Fengshu មានវ័យ៥៥ឆ្នាំ ហើយក៏ជាស្ត្រីម្នាក់ក្នុងចំណោមអ្នកផ្តួចផ្តើមបង្កើតខ្សែពួរចម្លងផងនោះ ខ្សែពួរនេះត្រូវបានជំនួសដោយខ្សែកាប និងខ្សែនីឡុងវិញ និងមានកន្ត្រកធ្វើពីដែកតូចល្មមមួយសម្រាប់ជិះចម្លង ។ នៅពេលអ្នកភូមិជិះកន្ត្រកម្តងៗ នៅផ្នែកនៃម្ខាងគឺបានស្ត្រីឈ្មោះ Gu Fengshu ជាអ្នកទាញខ្សែកាបដើម្បីអូសកន្ត្រកឆ្លងកាត់ជ្រោះមរណៈនេះ ។
ទាក់ទងនឹងករណីនេះ អ្នកភូមិក៏ធ្លាប់បានពិភាក្សាលើគម្រោងសង់ស្ពានឆ្លងកាត់ជ្រោះនេះផងដែរ ប៉ុន្តែវាត្រូវបានគេពិចារណាថា មានគ្រោះថ្នាក់ខ្លាំងណាស់ ៕
ចែករំលែកព័តមាននេះ