រាជធានីភ្នំពេញ ៖ យុវជនម្នាក់បានរងរបួសយ៉ាងធ្ងន់ធ្ងរបាក់ជើងឆ្វេងពីរកំណាត់សន្លប់បាត់បង់ស្មារតីនៅលើចិញ្ចើមផ្លូវត្រូវប្រជាពលរដ្ឋដែលធ្វើដំណើរឆ្លងកាត់ប្រទះឃើញហៅរថយន្តពេទ្យដឹកទៅសង្គ្រោះ ហើយមុនដំបូងគេស្មានថា យុវជននោះរងរបួសដោយគ្រោះថ្នាក់ចរាចរណ៍។ ប៉ុន្តែក្រោយពេលដែលក្រុមគ្រូពេទ្យសង្គ្រោះឱ្យដឹងខ្លួនឡើងវិញ យុវជននោះបានប្រាប់ថា រូបគេត្រូវក្រុមចោរមានគ្នា៣នាក់ប្រដាប់ដោយដំបងដែក ជិះម៉ូតូដេញតាមស្ទាក់វាយប្លន់យកម៉ូតូ ខណៈដែលរូបគេជិះម៉ូតូចេញពីភោជនីយដ្ឋានត្រឡប់ទៅផ្ទះជួល កាលពីវេលាម៉ោង៣និង៣០នាទីទៀបភ្លឺថ្ងៃទី៥ មេសា ២០១២ នៅតាមចិញ្ចើមផ្លូវលេខ២០០៤ កែងវិថីសហព័ន្ធរុស្ស៊ី ស្ថិតក្នុងភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ ។
យុវជនរងគ្រោះឈ្មោះខេង ពឿន អាយុ១៩ឆ្នាំ ជាអ្នករត់តុនៅក្នុងភោជនីយដ្ឋានសែនរីករាយមានទីលំនៅម្តុំផ្សារទូកមាស ឃុំទូកមាស ស្រុកបន្ទាយមាស ខេត្តកំពត ។ ម៉ូតូ១គ្រឿងដែលក្រុមចោរប្លន់យកទៅបាត់នោះម៉ាកឌ្រីមសេ១២៥ ស៊េរីឆ្នាំ ២០១០ ពណ៌ខ្មៅ ចំណែកឯក្រុមចោរប្លន់មានគ្នា៣នាក់ប្រដាប់ដោយដំបងបែក ជិះម៉ូតូ១គ្រឿងម៉ាកឌ្រីមសេ១២៥ ស៊េរីឆ្នាំ ២០១២ ពណ៌ខ្មៅ ។ ក្រោយពីវាយជនរងគ្រោះឱ្យរងរបួសបាក់ជើងឆ្វេងពីរកំណាត់ និងដួលសន្លប់បាត់ស្មារតីហើយពួកចោរបានជិះម៉ូតូគេចខ្លួនទៅបាត់ស្រមោល ៕
ចែករំលែកព័តមាននេះ