តាមការស្រាវជ្រាវបានបង្ហាញថា ផឹកទឹកផ្លែឈៀរីត្រឹមតែ២កែវអាចជួយឲ្យលោកអ្នកដេកបានយូរបន្ថែមទៀតដល់ទៅជិត៤០នាទី ។ ក្រុមអ្នកស្រាវជ្រាវបានបញ្ជាក់ថា ទឹកផ្លែឈៀរីដែលមានរសជាតិជូរអែមបានជួយបង្កើនកម្រិតមេឡាតូនីន(Melatonin គឺជាអង់ទីអុកស៊ីដកម្មដែលបញ្ជាការដេកឲ្យបានទៀងទាត់)របស់រាងកាយ។ អំឡុងការ
ពិសោធន៍ ក្រុមអ្នកស្រាវជ្រាវរបស់សាកលវិទ្យាល័យNorthumbria University របស់ប្រទេសអង់គ្លេសទទួលបានការចូលរួមពីអ្នកស្ម័គ្រចិត្ត២០នាក់ ។
រយៈពេល៧ថ្ងៃ អ្នកស្ម័គ្រចិត្តទាំងអស់ត្រូវបានគេឲ្យផឹកទឹកផ្លែឈៀរីចំណុះ៣០មីល្លីលីត្រ២ដងក្នុងមួយថ្ងៃ គឺពេលភ្ញាក់ពីដេកនិងមុនពេលចូលដេក ។ ក្រោយពីការពិសោធន៍ គេរកឃើញថា មនុស្សពេញវ័យមានសុខភាពល្អដែលបានផឹកទឹកផ្លែឈៀរី២កែវក្នុង១ថ្ងៃដេកបានយូរជាងអ្នកមិនបានផឹកគឺបង្កើនប្រសិទ្ធភាពដំណេកបានដល់៦% ។
Jason Ellis អ្នកដឹកនាំការស្រាវជ្រាវបាននិយាយថា៖«នៅពេលភាពងងឹតបានចូលមកដល់ រាងកាយបានផលិតមេឡាតូនីនផ្តល់សញ្ញាថា ដល់ពេលដេកហើយ។ ទឹកផ្លែឈៀរីបានផ្តល់ឲ្យនូវសេវាបន្ថែមមួយចំពោះអ្វីដែលយើងមានរួចជាស្រេច។ វាជួយបន្ថែមជាកម្លាំងដល់សញ្ញានាឡិកានៅខាងក្នុងរាងកាយ »៕
ចែករំលែកព័តមាននេះ