កុមារយំខ្លាំងរហូតឡើងស្វាយបបូរមាត់ ឬក៏យំបាត់សំឡេងមុខមាត់ឡើងស្លេករហូតដល់ទន់ដៃជើងនេះ គឺជារោគសញ្ញានៃការយំគាំង ។
ទាក់ទងទៅនឹងការយំគាំងនេះ ត្រូវបានលោកវេជ្ជបណ្ឌិតហុង សុខឃាង ជាអ្នកឯកទេសជំងឺកុមារនៃមន្ទីរពេទ្យកុមារជាតិឱ្យដឹងថា ការយំគាំងនេះ មិនទាន់មានអ្នកណាដឹងពីមូលហេតុឱ្យបានច្បាស់លាស់នៅឡើយ
កុមារយំខ្លាំងរហូតឡើងស្វាយបបូរមាត់ ឬក៏យំបាត់សំឡេងមុខមាត់ឡើងស្លេករហូតដល់ទន់ដៃជើងនេះ គឺជារោគសញ្ញានៃការយំគាំង ។
ទាក់ទងទៅនឹងការយំគាំងនេះ ត្រូវបានលោកវេជ្ជបណ្ឌិតហុង សុខឃាង ជាអ្នកឯកទេសជំងឺកុមារនៃមន្ទីរពេទ្យកុមារជាតិឱ្យដឹងថា ការយំគាំងនេះ មិនទាន់មានអ្នកណាដឹងពីមូលហេតុឱ្យបានច្បាស់លាស់នៅឡើយទេ តែបើតាមការសិក្សាបានសង្កេតឃើញថា មានកត្តាមួយចំនួនបង្កឱ្យកើតមានឡើង គឺបន្ទាប់ពីក្មេងមានគ្រោះថ្នាក់តិចតួច មានការភិតភ័យ និងមិនពេញចិត្តអ្វីមួយ នៅពេលនោះក្មេងក៏ស្រែកយំ ហើយក៏គាំងបាត់សំឡេងតែម្តង ។ ដូច្នេះការយំគាំងកើតឡើងដោយសារតែការខឹងរបស់ក្មេង គឺជាប្រតិកម្មតប នឹងអ្វីដែលជាការមិនពេញចិត្ត ហើយមិនមែនជាអាកប្បកិរិយាដោយចេតនារបស់ក្មេងនោះឡើយ ។
លោកវេជ្ជបណ្ឌិតបានបន្ថែមទៀតថា ការយំគាំងនេះត្រូវបានគេចែកចេញជា២ប្រភេទ គឺ ៖
១-យំគាំងឡើងសម្បុរពណ៌ស្វាយ ៖ គឺជាប្រភេទដែលកើតមានញញឹកញាប់ជាងគេ ។ ក្មេងចាប់ផ្តើមយំ បន្ទាប់ពីខឹង ឬឈឺ ឬភិតភ័យ បន្ទាប់មកក្មេងក៏បាត់ដង្ហើម ហើយឡើងក្រហមមុខ និងស្វាយបបូរមាត់ ទន់ខ្លួនបាត់ស្មារតី ហើយអាចដួលនឹងដី ។
២-យំគាំងឡើងសម្បុរស្លេក ៖ មិនសូវជាកើតមានញឹកញាប់នោះទេ តែបញ្ហានេះអាចកើតមានតាំងពីនៅជាទារកនៅតូចមកម៉្លេះៗ នេះជាការខ្វល់ខ្វាយយា៉ងខ្លាំងបំផុតនៅក្នុងគ្រួសារ តែពុំបង្កឱ្យមានផលវិបាកធ្ងន់ធ្ងរទេ ប៉ុន្តែវាធ្វើឱ្យមានការតក់ស្លុតចំពោះអ្នកដែលមើលឃើញសភាពក្មេង ។ ការយំគាំងស្លេកនេះ ក៏អាចកើតឡើងបន្ទាប់ពីក្មេងមិនពេញចិត្ត ឬទទួលរងនូវការអង្រួនខ្លាំងពេក ។ ក្មេងហាមាត់ឡើងដូចជា ចង់យំ ប៉ុន្តែយំមិនចេញសំឡេង ហើយក៏ទន់ខ្លួនបាត់មាត់បាត់ក ក្មេងអាចប្រែសម្បុរទៅជាស្លេកដូចមនុស្សស្លាប់ ហើយក្មេងអាចត្រឡប់មកធម្មតាវិញយា៉ងលឿន ឬអាចនៅសន្លឹម និងដេកលក់មួយស្របក់ ។ ជាទូទៅការយំគាំងច្រើនតែកើតទៅលើកុមារដែលមានអាយុចាប់ពី១២ទៅ១៨ខែ ហើយវានឹងបាត់ទៅវិញ នៅពេលកុមារមានអាយុប្រហែលជា៦ឆ្នាំ ។ ការយំគាំងនេះ គឺជាអាការមួយដែលពុំមានបង្កផលវិបាក ឬគ្រោះថ្នាក់អ្វីឡើយ ប៉ុន្តែបើសិនជាកូនរបស់លោកអ្នកមានអាការមួយចំនួនដូចជា ៖
-បាត់បង់ស្មារតី ហើយស្លេកខ្លាំងដោយគ្មានកត្តាបង្ក
-ការយំគាំងច្រើនដងក្នុងមួយថ្ងៃ
-ការយំគាំងដែលមានអាការប្រកាច់យូរលើសពីមួយនាទី ឬសន្លឹមដេកច្រើនម៉ោង ក្រោយពេលយំគាំង ។ លោកអ្នកត្រូវតែនាំកូនរបស់លោកអ្នកទៅជួបជាមួយគ្រូពេទ្យជំនាញ ព្រោះនេះគឺជាផលប៉ះពាល់មួយដ៏ធ្ងន់ធ្ងរបំផុត ។
លោកវេជ្ជបណ្ឌិតបានបន្ថែមទៀតថា នៅពេលដែលកូនរបស់លោកអ្នកយំគាំងបាត់សំឡេង លោកអ្នកត្រូវដាក់ក្មេងដេកផ្អៀង ហើយត្រូវធ្វើការតាមដានអំពីអាការរបស់ក្មេង។ មិនត្រូវអង្រួន ឬដាក់អ្វីចូលក្នុងមាត់ ឬក៏ជះទឹកដាក់ក្មេងឡើយ ។ បន្ទាប់ពីដឹងខ្លួនវិញ ត្រូវប្រព្រឹត្តចំពោះក្មេងដូចធម្មតា មិនត្រូវធ្វើទណ្ឌកម្ម ឬទំរើសពេកទេ ព្រោះអាចធ្វើឱ្យក្មេងងាយមានទម្លាប់យំគាំង។ លោកអ្នកត្រូវចងចាំថា ការយំគាំងនេះអាចនឹងត្រឡប់មកជាធម្មតាវិញ ដោយឯងៗក្នុងរយៈពេល៣៩នាទីទៅ៦០នាទី ដោយក្មេងចាប់ដកដង្ហើមវិញ ហើយក៏ស្រែកយំ ៕
ចែករំលែកព័តមាននេះ