រាជធានីភ្នំពេញ ៖ លោកពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានថ្លែងថា ជារៀងរាល់ឆ្នាំមានយុវជនចំនួនជាង២សែននាក់ បានបោះបង់ចោលសាលារៀនមុនពេលបញ្ចប់ថ្នាក់ទី៩ ក៏ព្រោះតែគ្រួសារមានជីវភាពលំបាក ប៉ុន្តែកម្មវិធីស្ពានចម្លងបន្តជំនាញគឺជាឱកាសទី២ ដែលផ្តល់ឱ្យពួកគេបានចូលរៀនជាលើកទី២ ដើម្បីទទួលយកចំណេះជំនាញនៅក្នុងប្រព័ន្ធអប់រំបណ្តុះបណ្តាបច្ចេកទេស និងវិជ្ជាជីវៈ។
លោកពេជ សោភ័ន បានបញ្ជាក់ថា កម្មវិធីបានបណ្តុះបណ្តាលអ្នកភូមិចំនួន៣.០០០នាក់ រួចហើយនៅក្នុងឃុំចំនួន៤៤ ក្នុងទិដ្ឋភាពផ្សេងៗពីគ្នានៅក្នុងបច្ចេកទេសក្រោយប្រមូលផល និងកែច្នៃចំណីអាហារ។ លោកពេជ សោភ័ន បានថ្លែងបែបនេះកាលពីថ្ងៃទី២៧ តុលា ខណៈពេលដែលលោកអញ្ជើញជាអធិបតីភាពក្នុងពិធីបើកសិក្ខាសាលាស្តីពីរបាយការណ៍វឌ្ឍនភាពរបស់កម្មវិធីសាកល្បងលើបច្ចេកទេសក្រោយប្រមូលផល និងកម្មវិធីស្ពានចម្លងបន្តជំនាញសម្រាប់អ្នកជនបទក្រីក្រ អ្នកពាក់ព័ន្ធនឹងការបណ្តុះបណ្តាល ដែលរៀបចំធ្វើឡើងដោយនាយកដ្ឋានគ្រប់គ្រងកិច្ចការអប់រំ បណ្តុះបណ្តាលបច្ចេកទេស និងវិជ្ជាជីវៈនៃក្រសួងការងារ និងបណ្តុះបណ្តាលវិជ្ជាជីវៈនៅសណ្ឋាគារអ៊ីមភើរៀលហ្គាឌិន។
លោកពេជ សោភ័ន បន្តថា គម្រោងពង្រឹងវិស័យអប់រំ បណ្តុះបណ្តាលបច្ចេកទេស និងវិជ្ជាជីវៈ គឺជាកម្មវិធីដ៏ធំមួយ ដែលសំខាន់បំផុតមានដំណើរការវែងឆ្ងាយក្នុងការផ្លាស់ប្តូរប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈឱ្យទៅជាប្រព័ន្ធអភិវឌ្ឍជំនាញទំនើប ដែលបំពេញតម្រូវការនៃសេដ្ឋកិច្ចសម្រាប់កម្លាំងការងារជំនាញ។ យើងសង្ឃឹមថា យើងនឹងមានគម្រោងពង្រឹងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈទី២ (2nd STVET) ហើយបន្ទាប់មកទៀតមានគម្រោងពង្រឹងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈទី៣ (3rd STVET) ដោយគម្រោងពង្រឹងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (STVET) នៅក្នុងដំណាក់កាលនីមួយៗ បានធ្វើការផ្លាស់ប្តូរសមត្ថភាពធនធាន ឧបករណ៍ សម្ភារបរិក្ខារ និងគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈរបស់យើងទទួលបាននូវការអភិវឌ្ឍជំនាញទូទាំងប្រទេស។ ចំពោះគម្រោងសាកល្បងលើបច្ចេកទេសក្រោយប្រមូលផល និងកម្មវិធីស្ពានចម្លងបន្តជំនាញសម្រាប់អ្នកជនបទក្រីក្រ (JFPR) គឺជាគម្រោងគំរូមួយនៃកម្មវិធីដែលមានប្រភេទផ្សេងៗគ្នាដែលត្រូវបានបង្កើតឡើងសាកល្បង ហើយធ្វើការកែតម្រូវវាដើម្បីបំពេញតម្រូវការប្រទេសកម្ពុជា មុនពេលយើងពង្រីកទៅដល់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈទាំង៣៨។
ដូចគ្នានេះដែរ កម្មវិធីបណ្តុះបណ្តាលជំនាញតាមលិខិតបញ្ជាក់ (VSTP) ដែលបានសាកល្បង ជាកម្មវិធីចម្បងនៅតាមគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈតែចំនួន៧ មុនពេលនឹងពង្រីកដល់វិទ្យាស្ថាន មជ្ឈមណ្ឌលបណ្តុះបណ្តាលវិជ្ជាជីវៈ (PTCs) និងមជ្ឈមណ្ឌលភូមិភាគ (RTCs) ទាំងអស់។ កម្មវិធីស្ពានចម្លងបន្តជំនាញ និងបច្ចេកទេសក្រោយប្រមូលផល កែច្នៃចំណីអាហារ កំពុងត្រូវបានគេសាកល្បង ដោយមានការផ្លាស់ប្តូរផ្អែកលើបទពិសោធន៍ ដែលយើងបានព្យាយាមធ្វើនៅតំបន់ផ្សេងៗគ្នា ជាមួយដៃគូផ្សេងគ្នា។
លោករដ្ឋលេខាធិការពេជ សោភ័ន បន្តទៀតថា ឥឡូវនេះយើងបានបំពេញការងារអស់រយៈពេល២៧ខែ នៃការងារសាកល្បងចំនួន៣៦ខែ និងបានធ្វើការកែតម្រូវគំនិតទាំងនេះ។ ម្យ៉ាងវិញទៀត យើងត្រូវតែរៀនពីបទពិសោធន៍ របស់យើងនៅដំណាក់កាលទី២ឱ្យបានច្បាស់លាស់ ពីភាពខ្លាំង និងភាពខ្សោយ ហើយកែតម្រូវកម្មវិធីនេះសម្រាប់ការសាកល្បងដំណាក់កាលចុងក្រោយ។ មានតែវិធីនេះទេ ដែលយើងអាចមានកម្មវិធីល្អបំផុតសម្រាប់ប្រទេសកម្ពុជានៅពេលដែលយើងនឹងពង្រីកវានៅក្នុងប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ (TVET)។ ការវាស់វែងយ៉ាងជោគជ័យមួយរបស់កម្មវិធី ដែលគាំទ្រដោយធនាគារអភិវឌ្ឍន៍អាស៊ី (ADB) គឺនៅក្នុងការបំពេញគោលដៅរបស់គម្រោង។ ខ្ញុំមានសេចក្តីរីរាយ ដែលបានឃើញគោលដៅសំខាន់ៗទាំងនេះ ត្រូវបានបំពេញនៅក្នុងកម្មវិធីសាកល្បងលើបច្ចេកទេសក្រោយប្រមូលផល និងកម្មវិធីស្ពានចម្លងបន្តជំនាញសម្រាប់អ្នកជនបទក្រីក្រ (JFPR) ហើយយើងបានប្តេជ្ញាបណ្តុះបណ្តាលយុវជនក្មេងៗ ដែលមិនទាន់បានបញ្ចប់ថ្នាក់ទី៩ ចំនួន៧០០នាក់ នៅក្នុងកម្មវិធីស្ពានចម្លងបន្តជំនាញ ដើម្បីផ្តល់ឱ្យពួកគេមានភ័ព្វសំណាងបានចូលរៀនក្នុងកម្មវិធីវិញ្ញាបនបត្ររបស់ប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ឬមានឱកាសកាន់តែប្រសើរសម្រាប់រកការងារធ្វើនៅក្នុងសេដ្ឋកិច្ចក្នុងប្រព័ន្ធ។ យើងបានធ្វើជំហានទាំងនេះរួចរាល់ និងជំហានទី៣ មិនទាន់បានចាប់ផ្តើមនៅឡើយទេ៕
ចែករំលែកព័តមាននេះ