លទ្ធផលស្រាវជ្រាវចុងក្រោយរបស់អាមេរិកជាការប្រកាសអាសន្នដល់អ្នកជក់បារី ដោយបញ្ជាក់ថា ជក់បារីបំផ្លាញរូបរាងកាយយ៉ាងឆាប់ ដូចគ្នានឹងការចាក់សារធាតុពុលចូលក្នុងសរសៃឈាមដែរ ។ ការងារស្រាវជ្រាវនេះបានសិក្សាពិសោធន៍ទៅលើមនុស្សជាលើកដំបូងថា សារធាតុពុលក្នុងថ្នាំជក់អាចបំផ្លាញ DNA បានបែបណា? អ្នកស្រាវជ្រាវបានប្រមូលទិន្នន័យពីអ្នកជក់បារីចំនួន១២នាក់សំរាប់ពិនិត្យរក សារធាតុពុលសេរី ដែលមានឈ្មោះថា ប៉ូលីស៊ីគ្លិក អារ៉ូម៉េទិក អ៊ីដ្រូកាបូន (PAH) ដែលមានក្នុងផ្សែងបារី ផ្សែងពីរោងចក្រ ធ្យូងថ្មនិងប្រភេទអាហារ BBQ (សាច់អាំង) ក្រៀមហួសហេតុ ។
តាមការតានដានរកសារធាតុ «ហ្វ៊ីណេនទ្រីន» ក្នុងផ្សែងបារីឃើញថា សារធាតុនឹងឆ្លងកាត់តាមសរសៃឈាម និងបង្កជាសារធាតុពុលបំផ្លាញ DNA ធ្វើឱ្យមានការរីករាលដាល និងជាកោសិកាមហារីក ។ លទ្ធផលស្រាវជ្រាវបង្ហាញថា «អ្នកជក់បារីនឹងទទួលបានសារធាតុពុលនេះក្នុងបរិមាណខ្ពស់ ក្រោយពីជក់បានប្រហែល១៥ ទៅ៣០នាទីដែលមានល្បឿនលឿនរហូតធ្វើឱ្យអ្នកស្រាវជ្រាវនឹកស្មានមិនដល់ ។ អ្វីដែលប្រទះឃើញចាត់ទុកជាសារសំខាន់ ព្រោះ PAH នឹងមានប្រតិកម្មជាមួយ DNA ធ្វើឱ្យកើតផលប៉ះពាល់ដល់ការបន្តពូជ និងចាត់ទុកថា ជាសារធាតុបង្កមហារីកកើតពីភាគតូចៗរបស់ PHA ក្នុងផ្សែងបារី»។
លោកស្ទីវ៉េន ហេស ប្រធានអ្នកស្រាវជ្រាវថ្លែងថា ការងារស្រាវជ្រាវនេះខុសប្លែកពីលើកមុនៗ ព្រោះសំដៅសិក្សាលទ្ធផលនៃការស្រូបផ្សែងបារីដោយផ្ទាល់មិនរួមបញ្ចូលមូលហេតុនៃការចុះខ្សោយផ្នែកសុខភាពផ្សេងៗដូចជាជាតិពុល និងការទទួលទានអាហារមិនបានគ្រប់គ្រាន់៕
ចែករំលែកព័តមាននេះ