រាជធានីភ្នំពេញ ៖ ក្រុមហ៊ុននាំពលករទៅធ្វើការនៅបរទេសឈ្មោះសេនជូរី ខេមបូឌា ផាវ័រ ដែលមានទីតាំងនៅផ្ទះល្វែងកម្ពស់២ជាន់ មួយកន្លែងស្ថិតខាងមុខមន្ទីរពេទ្យព្រះកុសុមៈភូមិបឹងឈូក សង្កាត់ទឹកថ្លា ខណ្ឌសែនសុខ នៅវេលាម៉ោង៥ល្ងាច ថ្ងៃទី៤ តុលា ត្រូវបានសមត្ថកិច្ចកងរាជអាវុធហត្ថរាជធានី សហការជាមួយអាជ្ញាធរដែនដី
រាជធានីភ្នំពេញ ៖ ក្រុមហ៊ុននាំពលករទៅធ្វើការនៅបរទេសឈ្មោះសេនជូរី ខេមបូឌា ផាវ័រ ដែលមានទីតាំងនៅផ្ទះល្វែងកម្ពស់២ជាន់ មួយកន្លែងស្ថិតខាងមុខមន្ទីរពេទ្យព្រះកុសុមៈភូមិបឹងឈូក សង្កាត់ទឹកថ្លា ខណ្ឌសែនសុខ នៅវេលាម៉ោង៥ល្ងាច ថ្ងៃទី៤ តុលា ត្រូវបានសមត្ថកិច្ចកងរាជអាវុធហត្ថរាជធានី សហការជាមួយអាជ្ញាធរដែនដី និងមានការចូលរួមដោយព្រះរាជអាជ្ញារងសាលាដំបូងរាជធានីបានឆ្មក់ចូលឆែកឆេរ ដោយសង្ស័យបង្ខាំងមនុស្សខុសច្បាប់ជាក្មេងស្រីអនីតិជន ដើម្បីនាំទៅធ្វើការក្រៅប្រទេស។
សមត្ថកិច្ចបានរកឃើញក្មេងស្រីជា អនីតិជនចំនួន៥នាក់ មានអាយុចាប់ពី១៣ ទៅ១៧ឆ្នាំ និងរំដោះស្ត្រីដែលរងការបង្ខាំងចំនួន២៣នាក់ ។ ក្នុងប្រតិបត្តិការនេះ សមត្ថកិច្ចបានឃាត់ខ្លួនមនុស្ស២នាក់ ជាអ្នកមើលការខុសត្រូវនៅទីតាំងក្រុមហ៊ុននេះផងដែរ។
តាមព័ត៌មានពីលោកវរសេនីយ៍ត្រីជា ជោក នាយការិយាល័យប្រឆាំងការជួញដូរមនុស្ស និងការពារអនីតិជននៃកងរាជអាវុធហត្ថរាជធានី និងជាអ្នកដឹកនាំកម្លាំងសមត្ថកិច្ចចុះប្រតិបត្តិការបានប្រាប់កោះសន្តិភាពថា ទំរាំតែសមត្ថកិច្ចសម្រេចឆ្មក់ចូលទីតាំងក្រុមហ៊ុននេះបាន កម្លាំងកងរាជអាវុធហត្ថរាជធានីភ្នំពេញ បានស្រាវជ្រាវជាង១ខែ មកហើយ ក្រោយពីទទួលពាក្យបណ្តឹងពីក្រុមគ្រួសាររងគ្រោះ ដែលត្រូវបានគេយកកូនមកបង្ខាំងនៅជាន់ទី១ នៃផ្ទះល្វែងរបស់ក្រុមហ៊ុននេះ។
លោកបន្តថា ស្ត្រីរងគ្រោះម្នាក់ត្រូវបានមេខ្យល់នាំមកពីខេត្តព្រៃវែង ដោយប្រាប់ក្រុមគ្រួសារថា នាំទៅធ្វើការនៅប្រទេសម៉ាឡេស៊ីហើយយកមកបង្ខាំងទុកនៅទីតាំងក្រុមហ៊ុននេះ ប៉ុន្តែដោយសារការរស់នៅជួបការលំបាកដូចជា ការហូបចុកមិនគ្រប់គ្រាន់ ការបំបិទសិទ្ធិសេរីភាពគ្រប់បែបយ៉ាងធ្វើឱ្យស្ត្រី ជាច្រើនដែលខកខ្លួនក្នុងទីតាំងក្រុមហ៊ុននោះចង់ចាកចេញពីទីតាំងក្រុមហ៊ុន។
លោកបន្តថា មេខ្យល់បាននាំស្ត្រីរងគ្រោះទៅផ្ញើម្តាយរបស់ខ្លួនម្តុំផ្សារដីហុយ សង្កាត់ទឹកថ្លា ប៉ុន្តែស្ត្រីរងគ្រោះរស់នៅជាមួយម្តាយ របស់មេខ្យល់នោះបានតែ៥ថ្ងៃក៏លួចរត់ចេញទៅផ្ទះបងប្អូននៅម្តុំក្រោយសាកលវិទ្យាល័យភ្នំេពញ ហើយបានរៀបរាប់ប្រាប់បងប្អូនពីដំណើររឿងនានា ទើបត្រូវឪពុកម្តាយមកទទួលយកទៅស្រុកវិញ។
នាយការិយាល័យបានបញ្ជាក់ថា ដើមហេតុដែលនាំឱ្យកងរាជអាវុធហត្ថធ្វើការស្រាវជ្រាវបញ្ហានេះ គឺបន្ទាប់ពីមានពាក្យបណ្តឹងរបស់ឪពុកម្តាយស្ត្រីរងគ្រោះមកដាក់ពាក្យបណ្តឹង ខណៈពេលមេខ្យល់នាំយកកូនស្រីមកជាច្រើនថ្ងៃហើយពុំបានទទួលដំណឹងអ្វីបន្តិចសោះពីកូនស្រីទើបមានការសង្ស័យមេខ្យល់យកទៅបង្ខំឱ្យជួញដូរផ្លូវភេទ ឬរំលោភ។
ទាក់ទិននឹងការឆែកឆេរទីតាំងក្រុមហ៊ុនខាងលើនេះលោកខៀវ ផល្លា ព្រះរាជអាជ្ញារងសាលាដំបូងរាជធានីក៏បានមានប្រសាសន៍បញ្ជាក់ប្រាប់កោះសន្តិភាពយ៉ាងខ្លីថា ការឆែកឆេរទីតាំងក្រុមហ៊ុននាំពលករទៅធ្វើការក្រៅប្រទេសនេះ ក៏យោងតាមពាក្យបណ្តឹងរបស់ក្រុមគ្រួសារជនរងគ្រោះ។ ចំពោះការសង្ស័យថា បង្ខាំងមនុស្សខុសច្បាប់លើក្មេងស្រីអនីតិជននេះ លោកកំពុងប្រមូលភស្តុតាងបន្តទៀតដើម្បីដាក់បន្ទុក។
ជុំវិញការសង្ស័យបង្ខាំងមនុស្សរបស់ក្រុមហ៊ុនសេនជូរីនេះដែរ ពលការិនីស្ថិតក្នុងស្ថានភាពស្លេកស្លាំងឈ្មោះតក់ ថុន អាយុទើបតែ១៤ឆ្នាំ មានស្រុកកំណើត នៅស្រុកពាមជរ ខេត្តព្រៃវែង បានប្រាប់កោះសន្តិភាពថា នាងត្រូវបានគេបង្ខាំងទុកនៅក្នុងបន្ទប់មួយមានគ្នាច្រើននាក់ ជាន់ទី១ អស់រយៈពេល៥០ថ្ងៃមកហើយ ដោយមិនមានការហូបចុកគ្រប់គ្រាន់ និងមិនមានសិទ្ធសេរីភាពជួបបងប្អូនក្រុមគ្រួសារ ឬចេញទៅក្រៅនោះឡើយ។ នាងបន្តថា ក្នុង១ថ្ងៃក្រុមហ៊ុននេះឱ្យបង់ប្រាក់ចំនួន២ដុល្លារ សម្រាប់ការហូបចុក។ ដូចគ្នានេះដែរពលការិនីម្នាក់ទៀតមានទឹកមុខស្រងូតស្រងាត់ឈ្មោះហូរ សោភា អាយុ២០ឆ្នាំ មកពីស្រុកបាភ្នំ ខេត្តព្រៃវែង បាននិយាយថា នាងបានត្រូវគេទុកឱ្យនៅក្នុងបន្ទប់ជាន់ទី១ដែរ ហើយការហូបចុកមិនគ្រប់គ្រាន់។ ពេលយប់នាងដេកយំនឹកឪពុកម្តាយ និងផ្ទះប៉ុន្តែត្រូវបានក្រុមហ៊ុនមិនអនុញ្ញាតឱ្យទៅនោះទេ។ ពេលនេះនាងចង់ទៅស្រុកកំណើតវិញ ហើយនាងនិយាយបញ្ជាក់ថា រាងហើយរឿងចង់ទៅធ្វើការនៅប្រទេសម៉ាឡេស៊ីនោះ។
ប្រតិបត្តិការខាងលើ យោងតាមកំណត់ហេតុរបស់សមត្ថកិច្ចបានឱ្យដឹងថា ស្ត្រីជាពលការិនីចំនួន២៣នាក់ ត្រូវបានរំដោះចេញពីទីតាំងក្រុមហ៊ុនខាងលើ ដោយពលការិនីទាំងនេះ ស្ម័គ្រចិត្តសុំសមត្ថកិច្ចវិលទៅស្រុកកំណើតវិញ ក្នុងនោះមានពលការិនីចំនួន៥នាក់ សមត្ថកិច្ចរកឃើញថា ជាអនីតិជនដោយមានអាយុត្រឹម១៣ឆ្នាំ ទៅ១៧ឆ្នាំ ប៉ុណ្ណោះ។
ចំពោះជនសង្ស័យ២នាក់ ដែលសមត្ថកិច្ចឃាត់ខ្លួនគឺឈ្មោះសៅ ស៊ីហេង ភេទស្រីអាយុ២៧ឆ្នាំ ជនជាតិខ្មែរ ជាអ្នកមើលការខុសត្រូវ និងឈ្មោះង៉ែត សុធារ៉ា ភេទប្រុស អាយុ២៨ឆ្នាំ ជាប្រធានរដ្ឋបាលក្រុមហ៊ុន។ ក្រៅពីនេះសមត្ថកិច្ចបានរកឃើញឯកសារមួយចំនួនជាសៀវភៅគ្រួសារ សំបុត្រកំណើត និងប័ណ្ណការងារផងដែរ។ ដោយឡែកចំពោះម្ចាស់ក្រុមហ៊ុនខាងលើពុំទាន់ឃើញសមត្ថកិ្ចចឃាត់ខ្លួន ឬចោទប្រកាន់បែបណានៅឡើយទេ៕
ចែករំលែកព័តមាននេះ