ក្រុងប៉ោយប៉ែត ៖ បន្ទាប់ពីកម្លាំងកងរាជអាវុធហត្ថក្រុងប៉ោយប៉ែតប្រមាញ់ចាប់បានប្រាក់ដុល្លារក្លែងក្លាយជាង៤០ម៉ឺន កាលពីវេលាម៉ោង១២និង៤០នាទីថ្ងៃត្រង់ថ្ងៃទី៤ តុលា ២០១១ នៅក្រុងប៉ោយប៉ែតរួចមក ពេលនេះជនជាតិថៃ និងខ្មែរដែលជាប់ពាក់ព័ន្ធចំនួន៥នាក់ទៀតត្រូវបានកម្លាំងកងរាជអាវុធហត្ថខេត្តបន្ទាយមានជ័យ កសាងសំណុំរឿងបញ្ជូនទៅតុលាការរួមទាំងវត្ថុតាងនៅថ្ងៃទី៥ តុលា ២០១១។
ចំនួនប្រាក់ដុល្លារក្លែងក្លាយទាំង៤៣ដុំ ខណៈពេលរាប់លម្អិតឃើញចំនួន៤២៧.១០០ដុល្លារ (សែបសិបពីរម៉ឺនប្រាំពីរពាន់មួយរយដុល្លារ) ។
ចំពោះជនសង្ស័យទាំង៥នាក់នេះ គឺមានជនជាតិថៃ២នាក់ និងខ្មែរ៣នាក់ រួមមាន ១-ឈ្មោះចាក់ រ៉ាត់ខាន់ធិវ៉ាត់ ហៅចន អាយុ២៩ឆ្នាំ មកពីស្រុកស៊ីមឿងម៉ៃ ខេត្តអ៊ូប៊ុន (ថៃ) ២-ឈ្មោះវរ្ម័ន ហ្វាម៉ៃត្រកូន ហៅណាក់ អាយុ៣៦ឆ្នាំ មកពីស្រុកដានគុនថុត ខេត្តនគររាជសីមា (ថៃ) ៣-ឈ្មោះម៉ឹង មន្នី អាយុ៤៣ឆ្នាំ មានស្រុកកំណើតនៅខេត្តកំពង់ចាម ៤-ឈ្មោះព្រំ សំបូរ អាយុ៤៧ឆ្នាំ មានស្រុកកំណើតនៅស្រុកត្រាំកក់ ខេត្តតាកែវ និង៥-ឈ្មោះថាំ ភាព អាយុ៤២ឆ្នាំ មានស្រុកកំណើតខេត្ត បាត់ដំបង ។
ក្រៅពីប្រាក់ដុល្លារក្លែងក្លាយខាងលើ សមត្ថកិច្ចក៏បានឃាត់រថយន្តចំនួន២គ្រឿងទៀតផងដែរ ដែលមួយគ្រឿងម៉ាកឡង់គ្រីស្ស័រ ពណ៌ស្លែ ស៊េរីឆ្នាំ៩៣ ចង្កូតស្តាំ និងមួយគ្រឿងទៀតម៉ាកកាមរី ស៊េរី៩៤ ពណ៌ស។
តាមប្រភពព័ត៌មានឱ្យដឹងរថយន្តទាំង២គ្រឿងនេះជាកម្មសិទ្ធិរបស់ឈ្មោះម៉ឹង មុន្នី។ ចំពោះជនសង្ស័យ និងវត្ថុតាងខាងលើត្រូវបានលោកឧត្តមសេនីយ៍ទោរ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថខេត្ត បានប្រាប់ឱ្យដឹងនៅព្រឹកថ្ងៃទី៥ តុលា ២០១១ ថា ក្រោយការសួរនាំ និងធ្វើកំណត់ហេតុរួចនឹងកសាង
សំណុំរឿងបញ្ជូនជនសង្ស័យទាំងនេះទៅតុលាការដើម្បីចាត់ការបន្ត ៕
ចែករំលែកព័តមាននេះ