ខេត្តកំពត ៖ រថយន្តដឹកឈើគ្រញូង៣គ្រឿងត្រូវក្រុមអធិការដ្ឋានរដ្ឋបាលព្រៃឈើ ឈូងសមុទ្រស្ទាក់ចាប់បានកាលពីវេលាម៉ោង៣ និង៣០នាទីរំលងអធ្រាត្រ ថ្ងៃទី៤ តុលា នៅលើកំណាត់ផ្លូវជាតិលេខ៣១ ចំណុចស្ពានមួយស្ថិតក្នុងភូមិព្រៃផ្តៅ ឃុំភ្នំកុង ស្រុកអង្គរជ័យ។
ខេត្តកំពត ៖ រថយន្តដឹកឈើគ្រញូង៣គ្រឿងត្រូវក្រុមអធិការដ្ឋានរដ្ឋបាលព្រៃឈើឈូងសមុទ្រស្ទាក់ចាប់បានកាលពីវេលាម៉ោង៣ និង៣០នាទីរំលងអធ្រាត្រ ថ្ងៃទី៤ តុលា នៅលើកំណាត់ផ្លូវជាតិលេខ៣១ ចំណុចស្ពានមួយស្ថិតក្នុងភូមិព្រៃផ្តៅ ឃុំភ្នំកុង ស្រុកអង្គរជ័យ។
ការស្ទាក់ចាប់បានរថយន្តដឹកឈើគ្រញូងដឹកទៅស្រុកយួននោះដឹកនាំដោយលោកគង់ ពុទ្ធារ៉ា នាយរងអធិការដ្ឋានរដ្ឋបាលព្រៃឈើឈូងសមុទ្រ។ លោកប្រាប់ឱ្យដឹងថា ការស្ទាក់ចាប់រថយន្តដឹកឈើប្រណីតនេះសហការជាមួយកងរាជអាវុធហត្ថស្រុកអង្គរជ័យ និងមន្ត្រីរដ្ឋបាលព្រៃឈើស្រុក។ ការស្ទាក់ចាប់រថយន្តទាំង៣គ្រឿងនេះយករថយន្តឡង់គ្រីស្ស័រដាក់បាំងទើបស្ទាក់ជាប់ ។ រថយន្តដឹកឈើមួយគ្រឿងរងការខូចខាតដោយសារតែបុកគ្រឹះស្ពាន និងអ្នកបើកបរ៥នាក់រត់គេចខ្លួនពេលជួបសមត្ថកិច្ច។ ទោះបីជាបែបណាក្តីឃាត់ខ្លួនបានអ្នកជិះម្នាក់ឈ្មោះធូ អាយុ២១ឆ្នាំ នៅឃុំ ស្តេចគង់។
ឈ្មោះធូ និយាយថា រូបគេត្រូវគេជួល៤ម៉ឺនរៀលឱ្យជិះរថយន្តដឹកឈើ។ ជននេះយំសោករៀបរាប់ថា គេមានប្រពន្ធទើបតែឆ្លងទន្លេ ហើយថ្មីៗ ហើយអត់មានលុយទិញថ្នាំចាក់ឱ្យប្រពន្ធ ទើបដាច់ចិត្តស៊ីឈ្នួលបែបនោះ។ ពេលនេះមានគ្រោះថ្នាក់ទើបភ្ញាក់ខ្លួន។ រថយន្ត៣គ្រឿងនេះមួយគ្រឿងពាក់ស្លាកលេខគ៥០២៨ភព២ មួយគ្រឿងទៀតពាក់ស្លាកលេខច១៥៧៣ភព២ និងរថយន្តទី៣ ពាក់ស្លាកលេខភ្នំពេញ២E៥០៥៩ ។
លោកនាយរងអធិការដ្ឋានរដ្ឋបាលព្រៃឈើឈូងសមុទ្រមិនបានរាប់ចំនួនឈើប្រណីតទាំងនោះទេ ព្រោះទាំងរថយន្ត ទាំងវត្ថុតាងត្រូវដឹកយកទៅកាន់ខេត្តព្រះសីហនុ ។
បើយោងតាមសំដីមន្ត្រី រដ្ឋបាលព្រៃឈើខេត្តកំពតថា គិតត្រឹម៩ខែនៅក្នុងឆ្នាំ២០១១ នេះ ខណ្ឌរដ្ឋបាលព្រៃឈើខេត្តបង្ក្រាបបទល្មើសសម្រេចបាន៤០ករណីក្នុងនោះមានឈើ និងរថយន្ត ព្រមទាំងមនុស្សកំពុងចាត់ការទៅតាមនីតិវិធីច្បាប់ ៕
ចែករំលែកព័តមាននេះ