ខេត្តកណ្តាល ៖ សាលារៀនចំនួន៣ក្នុងឃុំក្រាំងម្កាក់រួមមាន អនុវិទ្យាល័យហ៊ុន សែន អង្គពពាយ សាលាបឋមសិក្សាអង្គពពាយ និងសាលាបឋមសិក្សាក្រាំងម្កាក់ ស្ថិតក្នុងឃុំក្រាំងម្កាក់ ស្រុកអង្គស្នួល កាលពីព្រឹកថ្ងៃទី៤តុលា បានប្រារព្ធបើកបវេសនកាលឆ្នាំសិក្សាថ្មី២០១១-២០១២ និងប្រារព្ធទិវាគ្រូបង្រៀន៥តុលា ពិធីបានប្រារព្ធធ្វើនៅសាលាបឋមសិក្សាអង្គពពាយ ដោយមានការអញ្ជើញ ចូលរួមពីលោករស់ វណ្ណា អនុប្រធានទី១គណៈអចិន្ត្រៃយ៍គណៈពង្រឹងមូលដ្ឋានស្រុក និងជាប្រធានក្រុមការងារថ្នាក់កណ្តាលចុះជួយមូលដ្ឋានឃុំក្រាំងម្កាក់ និងឃុំបែកចាន លោកឆាយ ត្រលន់ អនុប្រធានក្រុមការងារ ព្រមទាំងលោកនាយក នាយករង លោកគ្រូ អ្នកគ្រូ មាតាបិតា សិស្សនិងក្រុមការងារចុះជួយឃុំជាច្រើនរូបទៀត។
លោកឆាយ ត្រលន់ បានអានសាររបស់សម្តេចអគ្គមហាសេនាបតីតេជោហ៊ុន សែន ដែលមានខ្លឹមសារជាអាទិ៍ថា ថ្ងៃទី១ តុលា ជាថ្ងៃដែលមានអត្ថន័យខ្លឹមសារដ៏ជ្រាលជ្រៅសម្រាប់វិស័យអប់រំ នៅព្រះរាជាណាចក្រកម្ពុជា ពីព្រោះជាថ្ងៃបើកបវេសនកាលថ្មីសម្រាប់កុលបុត្រ កុលធីតា និងជាថ្ងៃដំបូងរបស់ក្មួយៗសិស្សានុសិស្សបានចូលរៀន។ សារលិខិតក៏បានថ្លែងអំណរគុណចំពោះបុគ្គលិកអប់រំគ្រប់លំដាប់ថ្នាក់ ក្មួយៗសិស្សានុសិស្ស មាតា បិតា អាណាព្យាបាលសិស្ស និងអាជ្ញាធរដែនដីព្រមទាំងដៃគូអភិវឌ្ឍន៍នានា ដែលបានខិតខំជួយជ្រោមជ្រែងគ្រប់សកម្មភាព ក្នុងការបំពេញតាមតួនាទីរៀងៗខ្លួនដើម្បីបុព្វហេតុអភិវឌ្ឍន៍វិស័យអប់រំនៅទូទាំងប្រទេស។
លោករស់ វណ្ណា មានប្រសាសន៍សំណេះសំណាលដោយលើកឡើងថារាជរដ្ឋាភិបាលកម្ពុជាតែងយកចិត្តទុកដាក់ខ្ពស់ក្នុងវិស័យអប់រំ និងតែងផ្តល់អាទិភាពខ្ពស់ក្នុងចំណោមអាទិភាពទាំងឡាយសម្រាប់អភិវឌ្ឍន៍ប្រទេសជាតិ។ ការបណ្តុះបណ្តាលគឺសម្រាប់ធានាដល់ការផលិតធនធានមនុស្សប្រកបដោយគុណភាពនិងសមត្ថភាពស្របតាមទស្សនៈថា ការអប់រំ គឺជាកូនសោសម្រាប់ដោះស្រាយនូវរាល់បញ្ហាសង្គម និងសេដ្ឋកិច្ច ដូចនេះឪពុកម្តាយ និងអាណាព្យាបាល ត្រូវបញ្ជូនកូនដល់អាយុរៀនឱ្យចូលរៀនសូត្របានគ្រប់ៗគ្នា ព្រមទាំងជំរុញក្មួយៗ ជាសិស្សស្រាប់ឱ្យខិតខំសិក្សាបន្ថែមទៀត។
ក្នុងឱកាសនោះដែរ លោករស់ វណ្ណា និងលោកឆាយ ត្រលន់ បាននាំយកនូវអំណោយរបស់សម្តេចតេជោហ៊ុន សែន និងលោកជំទាវ ឧបត្ថម្ភដល់សិស្សទាំង៨៩៥នាក់ ដែលម្នាក់ៗទទួលបានសៀវភៅ១ក្បាល ប៊ិច១ដើម លោកគ្រូ អ្នកគ្រូ និងក្រុមប្រឹក្សាឃុំ៤៤នាក់ ម្នាក់ៗសារុង ១ ថវិកា៥ពាន់រៀល គ្រូចូលនិវត្តន៍១២នាក់ ម្នាក់ៗទទួលបានសារុង១ ថវិកា១ម៉ឺនរៀល។ សិស្សជ័យលាភីលេខ១ចំនួន២២នាក់ ម្នាក់ៗថវិកា១ម៉ឺន៥ពាន់រៀល លេខ២ចំនួន២៤នាក់ ម្នាក់ៗ១ម៉ឺនរៀល លេខ៣ចំនួន ២៨នាក់ ម្នាក់ៗ៥ពាន់រៀល។ ប្រជាការពារ និងនគរបាលប៉ុស្តិ៍២៧នាក់ ម្នាក់ៗ១ម៉ឺនរៀល ព្រះសង្ឃ៧អង្គ ក្នុង១អង្គទេយ្យទាន១កញ្ចប់ បច្ច័យ២ម៉ឺនរៀល នំធុង៦០កញ្ចប់, និងកង់បីគ្រឿងសរុបចំណាយអស់ប្រមាណជាង៣លានរៀល៕
ចែករំលែកព័តមាននេះ