ខេត្តកណ្តាល ៖ ទឹកហូរខ្លាំងបង្កឱ្យស៊ីរូង (រូងនាគ) ដល់មាត់ច្រាំងគល់ស្ពានលេខ២៤ តាមបណ្តោយផ្លូវជាតិលេខ២១B ស្ថិតក្នុងភូមិកោះខែល ឃុំកោះខែល ស្រុកស្អាង ដែលវាអាចនឹងស្រុតបាក់ ប្រសិនបើករថយន្តដឹកទំនិញធុនធ្ងន់ បើកបរជញ្ជ្រំលើវាគ្មានមេត្តានោះ…ប៉ុន្តែនៅព្រឹកថ្ងៃទី៥ តុលា ២០១១ អាជ្ញាធរបានដាក់បំរាមមិនឱ្យរថយន្តធុនធ្ងន់បើកបរឆ្លងកាត់ទេ ដើម្បីរក្សាសុខភាពស្ពាន ហើយអនុញ្ញាតឱ្យតែរថយន្តធុនតូចប្រភេទទេសចរណ៍ឆ្លងកាត់តែប៉ុណ្ណោះ ។
តាមអ្នកភូមិបាននិយាយថា ទឹកចាប់ផ្តើមឡើងខ្លាំងនៅតាមព្រែកបឹងបួ តាំងពីថ្ងៃទី១ តុលា ២០១១ ម៉្លេះ គឺហូរចាក់ពីទន្លេមេគង្គចូលទន្លេបាសាក់ ហើយទន្លេបាសាក់បានហូរចាក់ចូលព្រែកជាច្រើននៅក្នុងស្រុកស្អាង ទើបធ្វើឱ្យទឹកហក់ឡើងខ្ពស់ និងហូរត្របាញ់ខ្លាំង…ជាពិសេសទឹកព្រែកសឹងលី បានហូរចូលបឹងដ៏ធំនៃភូមិកោះខែល បណ្តាលឱ្យពេញព្រៀប និងហូរខ្លាំងតាមប្រឡាយស្ពានលេខ២៤ រហូតច្រោះរូងគល់ស្ពាននេះ បណ្តាលឱ្យខូងជ្រៅ និងធ្វើឱ្យមានការព្រួយបារម្ភខ្លាចស្ពាននេះ ស្រុតបាក់ផងដែរ ។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព ៕
ចែករំលែកព័តមាននេះ