រាជធានីភ្នំពេញ​​​​ ៖ តាមការអញ្ជើញ​របស់​លោកឧបនាយកដ្ឋមន្រ្តី​ហោ ណាំហុង រដ្ឋមន្រ្តី​ក្រសួងការបរទេស និងសហប្រតិបត្តិការ​អន្តរ​ជាតិ រដ្ឋមន្រ្តីក្រសួងការបរទេសនៃប្រទេស​សិង្ហបុរី លោក​សានមូហ្គាម ​នឹងមកបំពេញ​ទស្សនកិច្ចផ្លូវការនៅកម្ពុជានាវេលាថ្ងៃទី៥ តុលា ​នេះហើយ​។ នេះបើយោងតាមសេចក្តីជូន​ព័ត៌​មានរបស់ក្រសួងការបរទេស និង​សហ​ប្រតិ​បត្តិ​ការអន្តរជាតិរបស់ប្រទេសកម្ពុជា ចេញ​ផ្សាយ​ជាសាធារណៈនៅថ្ងៃទី​៤ តុលា ២០១១​​​។

សេចក្តីប្រកាសព័ត៌មានដដែលបាន​បញ្ជាក់​ទៀតថា នៅក្នុងអំឡុងដំណើរបំពេញទស្សន​កិច្ច​ផ្លូវការរយៈពេល២ថ្ងៃនៅកម្ពុជា​លោករដ្ឋមន្រ្តី ការ​បរទេសសិង្ហបុរី​សានមូហ្គាម នឹងជួប​ពិភាក្សាការងារទ្វេភាគីជាមួយ​លោកឧបនាយក​រដ្ឋមន្រ្តី​ហោ ណាំហុង ចូលក្រាបបង្គំគាល់​ព្រះ​ករុណា​ព្រះបាទសម្តេចព្រះបរមនាថ នរោត្តម​សីហមុនី ព្រះមហាក្សត្រនៃព្រះរាជា​ណាចក្រ​កម្ពុជា ចូលជួបសម្តែងការគួរសមជាមួយសម្តេច​នាយករដ្ឋមន្រ្តី​ហ៊ុន សែន និង​លោកឧបនា​យក​រដ្ឋមន្រ្តី​សុខ អាន រដ្ឋមន្រ្តីទទួលបន្ទុកទីស្តី​ការ​គណៈរដ្ឋមន្រ្តី ហើយនៅមុនពេលចាក​ចេញពី​ប្រទេសកម្ពុជានៅវេលាថ្ងៃទី៦ តុលា លោករដ្ឋ​មន្រ្តីការបរទេសសិង្ហបុរី​សានមូហ្គាម នឹង​អញ្ជើញទៅទស្សនាសារមន្ទីរជាតិក្នុងរាជធានីភ្នំពេញផងដែរ​៕