រាជធានីភ្នំពេញ ៖ សម្រាប់ឆ្នាំសិក្សា២០១០-២០១១ កន្លងមកនេះ នៅរាជធានីភ្នំពេញ មានសិស្សពូកែចំនួន៤.១៨៨នាក់ ត្រូវបានលោកកែប ជុតិមា អភិបាលរាជធានីភ្នំពេញ និងលោកជំទាវ ជុំ សាមីន ជាភរិយា ផ្តល់ជាអំណោយលើកទឹកចិត្ត ។ ពិធីចែកអំណោយដើម្បីជាការលើកទឹកចិត្តដល់សិស្សពូកែទាំងនេះបាន ធ្វើឡើងនាព្រឹកថ្ងៃទី៤ តុលា ឆ្នាំ២០១១ នៅវិទ្យាល័យសន្ធរម៉ុក ក្នុងពិធីបើកបវេសនកាលឆ្នាំសិក្សាថ្មី
រាជធានីភ្នំពេញ ៖ សម្រាប់ឆ្នាំសិក្សា២០១០-២០១១ កន្លងមកនេះ នៅរាជធានីភ្នំពេញ មានសិស្សពូកែចំនួន៤.១៨៨នាក់ ត្រូវបានលោកកែប ជុតិមា អភិបាលរាជធានីភ្នំពេញ និងលោកជំទាវ ជុំ សាមីន ជាភរិយា ផ្តល់ជាអំណោយលើកទឹកចិត្ត ។ ពិធីចែកអំណោយដើម្បីជាការលើកទឹកចិត្តដល់សិស្សពូកែទាំងនេះបានធ្វើឡើងនាព្រឹកថ្ងៃទី៤ តុលា ឆ្នាំ២០១១ នៅវិទ្យាល័យសន្ធរម៉ុក ក្នុងពិធីបើកបវេសនកាលឆ្នាំសិក្សាថ្មី ២០១១-២០១២ ដោយមានការចូលរួមពីលោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ ។
លោកជា ជាតិ នាយកមន្ត្រីអប់រំ យុវជន និងកីឡារាជធានីភ្នំពេញ បានឱ្យដឹងថា ឆ្នាំសិក្សា២០១០-២០១១ កន្លងមកនេះ រាជធានីភ្នំពេញ មានសិស្សពូកែចំនួន៤.១៨៨នាក់ ក្នុងនោះសិស្សពូកែទទួលជ័យលាភីថ្នាក់អន្តរជាតិចំនួន៧នាក់។ សិស្សជ័យលាភីទូទាំងប្រទេស១៦នាក់ សិស្សពូកែសម្រាប់ថ្នាក់រាជធានីភ្នំពេញចំនួន៣៨នាក់ និងសិស្សពូកែទទួលចំណាត់ថ្នាក់លេខ១, លេខ២ និងលេខ៣ ចំនួន៤.១២៧នាក់ ។
នៅក្នុងឱកាសនោះ លោកកែប ជុតិមា អភិបាលរាជធានីភ្នំពេញ បានថ្លែងនូវការកោតសរសើរក្មួយៗសិស្សានុសិស្សដែលបានខិតខំរៀនសូត្រ រហូតដល់ទទួលជ័យលាភីក្នុងពេលនេះ។ ទាំងនេះគឺជាលទ្ធផលដែលផ្តើមចេញពីការខិតខំរបស់ក្មួយៗ ជាមុខមាត់របស់ក្មួយៗ អាណាព្យាបាល ឪពុកម្តាយ រាជធានីភ្នំពេញ ក៏ដូចប្រទេសជាតិដែរ ។ លោកកែប ជុតិមា បានលើកឡើងថា សិស្សពូកែមិនមែនមានតែនៅក្នុងគ្រួសារអ្នកមានទ្រព្យសម្បត្តិនោះទេ សំខាន់គឺការខិតខំរបស់ខ្លួនយើង លោកគ្រូ អ្នកគ្រូ និងអាណាព្យាបាលតែម្តង ។ ជាក់ស្តែង សម្តេចតេជោ ហ៊ុន សែន ជាគំរូដែលសម្តេចជាកូនអ្នកក្រីក្រ ហើយបានខិតខំតស៊ូរហូតមកដល់ពេលនេះសម្តេចបានក្លាយទៅជានាយករដ្ឋមន្ត្រីដ៏ឆ្នើមដែលល្បីនៅលើពិភពលោក ហើយការតស៊ូបែបនេះពិតជាមានតម្លៃខ្លាំងណាស់ ។
លោកកែប ជុតិមា បានធ្វើការដាស់តឿន និងជំរុញដល់ក្មួយៗសិស្សានុសិស្សឱ្យខិតខំរៀនសូត្របន្តទៅទៀត ចំណែកឯក្មួយៗជំនាន់ក្រោយត្រូវតែខិតខំរៀនទើបទទួលបានលទ្ធផលដូចសិស្សពូកែទាំងនេះ ។
អំណោយរបស់លោកកែប ជុតិមា ដែលបានចែកជូនសិស្សពូកែនាឱកាសនោះមានចំនួន៤,១៨៨នាក់ ក្នុងនោះមានសិស្សពូកែថ្នាក់អន្តរជាតិចំនួន៧នាក់ ម្នាក់ៗទទួលបានកាតាប១ សៀវភៅ១០ក្បាល ប៊ិច២ដើម ថវិកា១០ម៉ឺនរៀល សិស្សជាប់ជ័យលាភីទូទាំងប្រទេស១៦នាក់ មានមេដាយមាស៣នាក់ ប្រាក់២នាក់ សំរឹទ្ធិម្នាក់ និងវិញ្ញាបនបត្រសិស្សពូកែទូទាំងប្រទេស១០នាក់ ក្នុងម្នាក់ៗទទួលបានកាតាប សៀវភៅ ប៊ិចដូចខាងលើដែរ តែថវិកាពី៦ម៉ឺនរៀលដល់៨ម៉ឺនរៀលទៅតាមមេដាយ ។ សិស្សពូកែថ្នាក់រាជធានីភ្នំពេញ ចំនួន៣៨នាក់ ទទួលបានកាតាប១ សៀវភៅ១០ក្បាល ប៊ិច២ដើម ថវិកា៥ម៉ឺនរៀល។ ដោយឡែកសិស្សចំណាត់ថ្នាក់ពីលេខ១ដល់លេខ៣ ទទួលបានកាតាប សៀវភៅ ប៊ិចដូចខាងលើ ចំណែកថវិកាពី២ម៉ឺនរៀលទៅ៤ម៉ឺនរៀលតាមចំណាត់ថ្នាក់៕
ចែករំលែកព័តមាននេះ