រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ខារ៉ាបាវនៅលើសង្វៀន CTN ទម្ងន់៥៤គីឡូក្រាម ថ្ងៃសុក្រ ទី៧ តុលា ខាងមុខនេះ ឯម លីថូ មកពីក្លឹបគ្រុឌមានជ័យ និងសារឹម ង៉ា មកពីក្លឹបក្រសួងការពារជាតិ ប្រកួតដណ្តើមយកចំណាត់ថ្នាក់លេខ១ ក្នុងពូល B ខណៈម៉ន សាម៉េត មកពីក្លឹបព្រែកឯងកីឡា និងលាភ សំណាង មកពីក្លឹបកងពលតូចលេខ៧០ បានត្រឹមឡើងមកកំដររេញតែប៉ុណ្ណោះ ។
រវាងគូនេះប្រកួតបាន៤លើកម្នាក់រួចមកហើយ និងអត់ដែលចាញ់ ព្រមទាំងមាន១២ពិន្ទុដូចគ្នាទៀត ដូច្នេះនៅក្នុងពូល B ពួកគេទាំង២នាក់មានពិន្ទុនាំមុខគេដាច់តែម្តង។ សម្រាប់ការជួបគ្នាលើកនេះ គឺដើម្បីដណ្តើមចំណាត់ថ្នាក់លេខ១ ក្នុងពូលតែប៉ុណ្ណោះ អ្នកណាចាញ់ ឬឈ្នះ នឹងគ្មានមានបញ្ហាអ្វីឡើយ ។ ឯម៉ន សាម៉េត និងលាភ សំណាងវិញ ឡើងមកប្រកួតដើម្បីបង្គ្រប់កិច្ចតែប៉ុណ្ណោះ ព្រោះខាងណាឈ្នះក៏គេចមិនរួចពីការហាលខោដែរ។ ឆ្លងកាត់ការប្រកួតទាំង៤លើកម្នាក់មកនេះ ពួកគេឈ្នះ២លើក និងចាញ់២លើកមាន៨ពិន្ទុដូចគ្នា។
សម្រាប់គូប្រកួតមិត្តភាពដែលត្រូវជួបគ្នានៅក្នុងថ្ងៃនោះដែរ សិង្ហ បារាំង មកពីក្លឹបសិង្ហកីឡា ដែលបានបាត់មុខពីសង្វៀនជាយូរមកហើយនោះ បានវិលមកកាន់សង្វៀនសាជាថ្មីត្រូវប៉ះជាមួយចៅ ផលឌឿ មកពីក្លឹបខេត្តក្រចេះ ។ សិង្ហ បារាំង ជាអ្នកប្រដាល់ចាស់វស្សាម្នាក់តែកេរ្តិ៍ឈ្មោះរបស់គេមិនសូវជាល្បីល្បាញប៉ុន្មានឡើយ។ គេនៅមិនអាចដឹងមុនថា តើការមកជួបចៅ ផលឌឿ លើកនេះ សិង្ហ បារាំង មានសំណាងល្អ ឬអាក្រក់ឡើយ។ ផលឌឿ ស្នៀតប្រយុទ្ធមិនសូវជាពូកែប៉ុន្មានទេ តែបើនិយាយពីកម្លាំងវិញនោះគឺខ្លាំងគួរសម ។ ផល សុភាព មកពីក្លឹបឃ្លាំងមឿង ខេត្តពោធិ៍សាត់ ជួបប្រកួតជាមួយកែវ វីរៈ មកពីក្លឹបគជសារកីឡា ។
ចន្ថា សារ៉ាន់ ជួប ជា សំណាង ខណៈ សូយ វីរៈ ជួប សេក គឹមស៊ុយ នៅសង្វៀន TV5
នៅលើសង្វៀនស្ថានីយទូរទស្សន៍ប៉ុស្តិ៍លេខ៥សម្រាប់ថ្ងៃអាទិត្យ ទី៩ តុលា ខាងមុខនេះ ចន្ថា សារ៉ាន់ មកពីក្លឹបយុវកីឡា ឡើងសាកកម្លាំងជាមួយជា សំណាង មកពីក្លឹបបុរីស័ក្តិសិទ្ធិ ខណៈសូយ វីរៈ មកពីក្លឹបអូរដឹមកីឡា ជួបសេក គឹមស៊ុយ មកពីក្លឹបសឹករងខេត្តសៀមរាប ។
រវាងជើងថ្មី១គូនេះអត់ធ្លាប់ប៉ះគ្នាពីមុនមកទេ ដូច្នេះទាំងសងខាងសុទ្ធតែមិនបានដឹងពីសមត្ថភាពបច្ចេកទេសគ្នាឡើយ ។ ចន្ថា សារ៉ាន់ អាងតែកម្លាំងបន្តិចប៉ុណ្ណោះ បើនិយាយពីបច្ចេកទេសប្រកួតនៅលើសង្វៀន ស្នៀតដែលអាចយកជាការបានគឺស្នៀតជើង និងកណ្តាលដៃ ប៉ុន្តែសម្រាប់ជា សំណាងវិញ មិនមានអ្នកណាដឹងពីល្បិចប្រយុទ្ធរបស់គេឡើយ ដូច្នេះមានតែរង់ចាំមើលតើគេខ្លាំងប៉ុនណា។
សូយ វីរៈ ដែលចង់សាកកម្លាំងជាមួយសេក គឹមស៊ុយនោះ បើនិយាយពីល្បិចប្រយុទ្ធនៅលើសង្វៀនរបស់គេអាចយកជាការបាន ព្រោះមួយរយៈមកនេះគេមានកេរ្តិ៍ឈ្មោះល្បីគួរសម ទាំងស្នៀតជើង និងស្នៀតដៃរួមទាំងស្នៀតកែង គឺមិនធម្មតាឡើយ ។ ប៉ុន្តែសម្រាប់សេក គឹមស៊ុយ វិញ អត់សូវល្បីឈ្មោះប៉ុន្មានឡើយ យូរៗគេឃើញមានមុខនៅលើសង្វៀនម្តង ហើយលើកនេះមកប៉ះចំជើងខ្លាំងទៀតមិនដឹងថា គេអាចតស៊ូបានប៉ុន្មានទឹកនោះទេ ។ អាំង សំអាត មកពីក្លឹបតាព្រហ្មកីឡា ជួបប្រកួតជាមួយឆាំ រ៉ែម មកពីក្លឹបសិង្ហកីឡា ។ ឈិន ក្វាន់កុយ មកពីក្លឹបគជរាជសីហ៍ ជួបប្រកួតជាមួយអ៊ុច ហ៊ុយ មកពីក្លឹបរស្មីកុមារកំព្រា ៕
ចែករំលែកព័តមាននេះ