ទីប៉ាឆា «សឺនចាងទៀនខេង» ស្ថិតក្នុងស្រុកវ៉ាថេង ខេត្តតៃនិញ ភាគខាងត្បូងប្រទេសវៀតណាម ចម្ងាយពីទីក្រុងហូជីមីញប្រហែល១០០គីឡូម៉ែត្រ កំពុងក្លាយជាទីប៉ាឆាដ៏ទាន់សម័យនៅក្នុងប្រទេសវៀតណាម ក្រោយពីមានការវិនិយោគទុនកែសម្រួលទីបា៉ឆាក្នុងតម្លៃ១៧លានដុល្លារ ។
ក្រុមហ៊ុន «ហ្វែរីផាកហ្គ្រុប» មកពីប្រទេសម៉ាឡេស៊ី បានទទួលសម្បទានគ្រប់គ្រងតំបន់នោះរយៈពេល៥០ឆ្នាំ និងចាត់ទុកថា ជាទីប៉ាឆាដែលវិនិយោគពីបរទេសជាលើកដំបូងក្នុងប្រទេសវៀតណាម ហើយវិធីសាស្ត្រនៃការបញ្ចុះសពនៅទីប៉ាឆាខាងលើគឺជាមិត្តនឹងបរិស្ថាន ។ លោកហ៊ូ គូកដុង នាយកក្រុមហ៊ុន «ហ្វែរីផាក» ថ្លែងថា ទីប៉ាឆាត្រូវចេញម៉ូដនៅលើផ្ទៃដីចំនួន៤៥០អា ជាលើកដំបូងនៃគម្រោងការ និងបើកតំបន់ផ្តល់សេវាកម្មចំនួន៨៤អា រួមមានរណ្តៅ ឬឡតសម្រាប់បញ្ចុះចំនួន៥.០០០រណ្តៅ ។
ចំពោះបញ្ចុះសពក្នុងមួយរណ្តៅ គឺប្រហែល៧៥,៥លានដុង គឺប្រហែល៣.៦៦២ដុល្លារ ខណៈពេលថ្លៃរណ្តៅបញ្ចុះសពជាលក្ខណៈគ្រួសារមានតម្លៃប្រហែល៥៥៨លានដុង គឺប្រហែល២៧.០៦៧ដុល្លារ ។ ប្រទេសវៀតណាម មានវប្បធម៌ដូចគ្នានឹងប្រទេសមួយចំនួនទៀតនៅលើពិភពលោក ជាពិសេសមានដូចនៅប្រទេសចិន ។ សម្រាប់រណ្តៅសព ឬផ្នូរសពចេញម៉ូដមានលក្ខណៈដូចគ្នា និងក្រាលដោយថ្មក្រានីត ឬឥដ្ឋរលោង រីឯផ្លូវនៅក្នុងទីប៉ាឆា មានក្រាលដោយឥដ្ឋ មានដើមឈើ និងផ្កាតាំងលំអនៅតាមផ្លូវដើរ ។
ចំណែកទីប៉ាឆា ឬផ្នូរដែលស្ថិតនៅក្បែរភ្នំប្រកបដោយទេសភាពដ៏ស្រស់ស្អាត អ្នកដែលធ្វើដំណើរទៅផ្នូរនឹងមានអារម្មណ៍ស្រស់ស្រាយ គួបផ្សំនឹងអាកាសធាតុល្អ គ្មានការមួហ្មងក្នុងចិត្ត។ លោកង្វៀន ថាវីចាង តំណាងអ្នកវិនិយោគទុនកសាងទីប៉ាឆានេះថ្លែងថា ធូប និងក្រដាសសម្រាប់ដុតបូជានឹងមិនអនុញ្ញាតឱ្យយកចូលទៅដុតក្នុងទីប៉ាឆាទេ ដើម្បីថែរក្សាបរិស្ថាន៕
ចែករំលែកព័តមាននេះ