រាជធានីភ្នំពេញ ៖ តាមអំណាចសាលក្រមរបស់សាលាដំបូងខេត្តសៀមរាប និងក្រោមការដឹកនាំបញ្ជាពីលោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស កាលពីល្ងាចថ្ងៃទី១៨ មករា លោកឧត្តមសេនីយ៍ត្រី សៀ សម្បត្តិ នាយការិយាល័យស្រាវជ្រាវបទល្មើសព្រហ្មទណ្ឌ នៃទីបញ្ជាការកងរាជអាវុធហត្ថលើផ្ទៃប្រទេសបានដឹកនាំកំលាំងសហការជាមួយកងរាជអាវុធហត្ថខណ្ឌដូនពេញ ចាប់ខ្លួនមេខ្លោងក្រុមចាប់ជំរិតកូនមេបញ្ជាការកងរាជអាវុធហត្ថខេត្តសៀមរាប ។ ការចាប់ខ្លួនមេខ្លោងក្រុមចាប់ជំរិតនេះ បានប្រព្រឹត្តទៅនៅចំណុចរោងជាងជួសជុលអូប័រ យីហោមិនអោម៉ា ស្ថិតនៅបណ្តោយផ្លូវជាតិលេខ៥ ក្នុងសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ។
មេខ្លោងក្រុមចាប់ជំរិតដែលត្រូវចាប់ខ្លួននេះឈ្មោះចក់ ចាន្នី ភេទប្រុស អាយុ២៦ឆ្នាំ មានស្រុកកំណើតនៅភូមិកន្ទុយទឹក ឃុំទៀន ស្រុកកណ្តាលស្ទឹង ខេត្តកណ្តាល បច្ចុប្បន្នស្នាក់នៅរោងជាងជួសជុលអូប័រ យីហោមិនអោម៉ា ។ ទាក់ទិននឹងការចាប់ខ្លួនជនជាប់ចោទខាងលើលោកឧត្តមសេនីយ៍ត្រី សៀ សម្បត្តិ បានឱ្យដឹងថា នេះជាការអនុវត្តតាមសាលក្រមរបស់សាលាដំបូងខេត្តសៀមរាប ដែលបានចោទប្រកាន់ជនជាប់ចោទឈ្មោះចក់ ចាន្នី ពីបទចាប់ជំរិតទារប្រាក់ដែលជាបទល្មើសឧក្រិដ្ឋ ។
លោកឧត្តមសេនីយ៍បន្តថា បើទោះបីជាសាលក្រមរបស់សាលាដំបូងបានចេញដោយកំបាំងមុខលើជនដែលត្រូវចោទរួចហើយយ៉ាងណាក្តី ប៉ុន្តែជននេះបានគេចខ្លួនពួនអាត្មាដើម្បីគេចវេះពីសំណាញ់ច្បាប់ ក្រោយពីធ្វើសកម្មភាពចាប់ជំរិតកូនមេបញ្ជាការប៉េអឹមខេត្តសៀមរាប ទារប្រាក់បានសំរេចជាង៨មឺុនដុល្លារសហរដ្ឋអាមេរិក ។ ដោយសារការដាស់តឿនជំរុញយ៉ាងសកម្មពីសំណាក់លោកនាយឧត្តមសេនីយ៍មេបញ្ជាការកងរាជអាវុធហត្ថលើផ្ទៃប្រទេសក្នុងនាមរូបលោកជាប្រធានការិយាល័យស្រាវជ្រាវបង្ក្រាបបទល្មើសព្រហ្មទណ្ឌ លោកបានប្រើប្រាស់គ្រប់ជំនាញ និងរាយបណ្តាញស្វែងរកជនល្មើសរហូតឈានទៅដល់ការចាប់ខ្លួន ទោះបីជាជននោះផ្លាស់ប្តូរមុខរបរ និងទៅដល់ទីណាក៏ដោយ ។ ក្រោយពីចាប់ខ្លួនហើយនៅព្រឹកថ្ងៃទី១៩ មករា លោកបានបំពេញឯកសារទទួលនិងប្រគល់ជនជាប់ចោទឱ្យទៅសមត្ថកិច្ចកងរាជអាវុធហត្ថខេត្តសៀមរាប ដើម្បីនាំទៅជូនតុលាការសាលាដំបូងខេត្តយកទៅឃុំខ្លួនតាមបទល្មើសដែលសាលក្រមបានសំរេចផ្តន្ទាទោសរួចហើយនោះ ។
គួរបញ្ជាក់ថា កាលពីថ្ងៃទី៦ មីនា ឆ្នាំ២០០៩ មានអំពើចាប់កូនស្រីលោកមេបញ្ជាការកងរាជអាវុធហត្ថខេត្តសៀមរាបយកទៅឃុំទុក ហើយជំរិតទារប្រាក់ប្រមាណ៨ម៉ឹនដុល្លារសហរដ្ឋអាមេរិក ។ អំពើល្មើសនោះប្រព្រឹត្តឡើងដោយជនមួយក្រុមមានបក្សពួកពី៦ទៅ៧នាក់ ក្រោមរូបភាពក្លែងខ្លួនស្លៀកសំលៀកបំពាក់ធ្វើដូចសមត្ថកិច្ចមានទាំងអាវុធ និងដំបងឆក់ ដាក់របៀបកំលាំងឆែកឆេរអាវុធជាតិផ្ទុះ នៅចំណុចភូមិវត្តបូព៌ ឃុំសាលាកំរើក ខេត្តសៀមរាប ។ ខណៈពេលកូនលោកមេបញ្ជាការប៉េអឹមខេត្តចេញពីសាលាក៏ត្រូវពួកគេស្ទាក់ចាប់នាំយកទៅឃុំខ្លួនកន្លែងស្ងាត់មួយរួចចាប់ផ្តើមទូរស័ព្ទគំរាមជំរិតទារប្រាក់ ។ ដំបូងក្រុមឧក្រិដ្ឋជនទារ១០ម៉ឺនដុល្លារសហរដ្ឋអាមេរិក ប៉ុន្តែក្រោយមកបានត្រូវរ៉ូវគ្នានៅត្រឹម៨ម៉ឺនដុល្លារ រួចហើយប្រាក់ត្រូវបានប្រគល់ឱ្យជនល្មើស។ រីឯជនរងគ្រោះត្រូវគេដោះលែងមកវិញ តាមការព្រមព្រៀង ។
ក្រោយពីកើតមានសកម្មភាពចាប់ជំរិតកូនមេប៉េអឹមខេត្តនោះបានប៉ុន្មានថ្ងៃមក សមត្ថកិច្ចបានឃាត់ខ្លួនជនសង្ស័យចំនួន៤នាក់ ដែលជាសមាជិកក្រុមរួមគំនិតធ្វើសកម្មភាពនោះ ១-ឈ្មោះផាន់ គឹមសាន ហៅជា ភេទប្រុស អាយុ២៦ឆ្នាំ ២-ឈ្មោះចក់ ចាន់នឿន ហៅជេន ភេទប្រុស អាយុ២៣ឆ្នាំ ៣-ឈ្មោះលឿត សុកញ្ញារិទ្ធ ហៅពៅ ភេទប្រុស អាយុ២៣ឆ្នាំ ពួកគេសុទ្ធតែជាសមាសភាពសន្តិសុខឯកជន និង៤-ឈ្មោះសំ សាម៉ៃ ភេទស្រី អាយុ៤០ឆ្នាំ ជាម្ចាស់ផ្ទះទីតាំងលាក់ជនរងគ្រោះ ។ បន្ទាប់ពីចាប់ខ្លួនជនជាប់ចោទទាំង៤នាក់ បានត្រូវតុលាការសាលាដំបូងខេត្តសៀមរាប បើកសវនាការសំរេចផ្តន្ទាទោសចំពោះមុខដាក់ពន្ធនាគារក្នុងម្នាក់ៗ១៥ឆ្នាំ ។ ចំណែកមេខ្លោងឈ្មោះចក់ ចាន្នី និងគូកនម្នាក់ទៀតឈ្មោះសយ ខ្នា ដែលបានគេចខ្លួន តុលាការបានសំរេចផ្តន្ទាទោសកំបាំងមុខដាក់ពន្ធនាគារម្នាក់ៗរយៈពេល១៧ឆ្នាំគិតពីថ្ងៃចាប់ខ្លួនបាន ។ ពេលនេះចាប់បានមេខ្លោងម្នាក់ហើយ នៅសល់ម្នាក់ទៀត មិនអាចគេចផុតពីសំណាញ់ច្បាប់បានឡើយ ៕
ចែករំលែកព័តមាននេះ