ជំហានដ៏ធំមួយទៀត! វណ្ណដា បន្តផ្សារភ្ជាប់វប្បធម៌ និងតន្ត្រីខ្មែរទៅកាន់ពិភពលោក តាមរយៈជំនួបជាមួយប្រធានាធិបតីបារាំង
- ភ្នំពេញ
រាជធានីភ្នំពេញ ៖ តារាចម្រៀងរ៉េប លោក វណ្ណដា និងផលិតកម្មបារមី បានបង្ហាញនូវក្តីសោមនស្សរីករាយ និងមានកិត្តិយសដែលបានចូលរួមពិធីទទួលបដិសណ្ឋារកិច្ចជាលក្ខណៈឯកជនជាមួយឯកឧត្តម Emmanuel Macron ប្រធានាធិបតីនៃសាធារណរដ្ឋបារាំង លោកជំទាវទីមួយ Brigitte Macron និងលោកស្រី Catherine Pégard កាលពីរាត្រីថ្ងៃទី14 ខែវិច្ឆិកា ឆ្នាំ2026។
ក្នុងឨកាសនោះដែរ តារាចម្រៀងរ៉េប លោក វណ្ណដា បានធ្វើកិច្ចសន្ទនាផ្លាស់ប្តូរទស្សនៈដ៏ប្រពៃថ្លៃថ្លា ស្តីពីការរីកលូតលាស់ប្រកបដោយសក្តានុពលនៃវិស័យតន្ត្រី សិល្បៈ និងវប្បធម៌នៅកម្ពុជា។
បើយោងតាមការបង្ហោះពីផេកផ្លូវការរបស់ផលិតកម្មបារមី បានអោយដឹងថា សម្រាប់ក្រុមការងារទាំងអស់នៅផលិតកម្ម បារមី ជំនួបដ៏មានតម្លៃនារាត្រីកន្លងទៅ បានរំលឹកពួកយើងថា តន្ត្រីពិតជាគ្មានព្រំដែនឡើយ។
រាប់ចាប់ពីជំហានដំបូងនៅកម្ពុជា ឈានទៅដល់ឆាកអូឡាំពិកទីក្រុងប៉ារីស រហូតដល់ការវិលត្រឡប់មកកាន់មាតុភូមិវិញក្នុងកិច្ចប្រជុំកំពូលហ្វ្រង់កូហ្វូនី គឺសុទ្ធសឹងតែបានបង្ហាញថា រឿងរ៉ាវ សំឡេង និងវប្បធម៌របស់យើង នៅតែបន្តធ្វើដំណើរទៅកាន់ពិភពលោកដ៏ទូលំទូលាយ ដោយផ្សារភ្ជាប់ដួងចិត្តមនុស្សគ្រប់ជាតិសាសន៍ គ្រប់ភាសា និងគ្រប់ជំនាន់ឱ្យកាន់តែជិតស្និទ្ធនឹងគ្នា។
យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះ ឯកឧត្តមប្រធានាធិបតី Emmanuel Macron និងគណៈប្រតិភូ ស្ថានទូតបារាំងប្រចាំកម្ពុជា ព្រមទាំងវិទ្យាស្ថានបារាំងនៅកម្ពុជា (Institut français du Cambodge) សម្រាប់ការអញ្ជើញ និងការផ្តល់ឱកាសឱ្យយើងខ្ញុំបានចូលរួមចែករំលែកក្នុងរាត្រីដ៏មានតម្លៃ និងមិនអាចបំភ្លេចបាននេះ។
សូមជូនពរឱ្យដំណើរទស្សនកិច្ចរបស់ ឯកឧត្តម Emmanuel Macron ប្រធានាធិបតីនៃសាធារណរដ្ឋបារាំង លោកជំទាវទីមួយ Brigitte Macron លោកស្រី Catherine Pégard និងគណៈប្រតិភូបារាំងទាំងអស់ មានភាពរលូន និងពោរពេញដោយអនុស្សាវរីយ៍ល្អៗនៅកម្ពុជា!។
គួរបញ្ជាក់ថា លោក Macron បានអញ្ជើញមកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជានិងចូលរួមកិច្ចប្រជុំ Francophonie គិតចាប់ពីថ្ងៃទី14ដល់16 ខែវិច្ឆិកា. ឆ្នាំ2026៕
ចែករំលែកព័តមាននេះ