សម្ដេចស៊ីសុវត្ថិ ជីវ័នមុនីរក្ស ជាតួអង្គខ្មែរក្រហមក្នុងរឿង «វាលពិឃាដ»
- ភ្នំពេញ
រាជធានីភ្នំពេញ៖ ចាត់ទុកជាអនុស្សាវរីយ៍ និងជាប្រវត្តិសាស្ត្រដ៏គួរឱ្យចងចាំនូវវត្តមានរបស់សម្តេចស៊ីសុវត្ថិ ជីវ័នមុនីរក្ស ព្រះរាជបុត្រាពៅនៃព្រះករុណាព្រះបាទសម្តេចព្រះស៊ីសុវត្ថិ មុនីវង្ស បានចូលរួមសម្ដែងក្នុងខ្សែភាពយន្តឯកសារខ្នាតអន្តរជាតិរឿង«វាលពិឃាដ» ដែលបានថតនៅឆ្នាំ១៩៨៣ ។ សាច់រឿងរៀបរាប់ពីដំណើរផ្សងព្រេងដ៏សែនរន្ធត់របស់អ្នកកាសែតឌិត ប្រន់ ក្នុងរបបប្រល័យពូជសាសន៍ខ្មែរក្រហមអំឡុងពីឆ្នាំ១៩៧៥-១៩៧៩ ។
តួអង្គសំខាន់នៅក្នុងរឿងនេះ គឺលោកហាំង ង៉ោ បានទទួលមរណភាពទៅហើយ ។
បើតាមក្រុមដំណើរខ្មែរឱ្យដឹងថា ក្នុងខ្សែភាពយន្តឯកសារវាលពិឃាដ សម្តេចស៊ីសុវត្ថិ ជីវ័នមុនីរក្ស បានចំណាយពេលចូលរួមសម្ដែងរយៈពេលជិត៤សប្តាហ៍ ក្នុងនាមជាតួអង្គខ្មែរក្រហមចិត្តល្អម្នាក់ ។
សម្តេចស៊ីសុវត្ថិ ជីវ័នមុនីរក្ស ជាអាកាសយានិកដ៏ល្បីមួយរូបកាលពីសម័យសង្គមរាស្ត្រនិយម ។ សម្តេចមានភ័ព្វសំណាងខ្ពស់ណាស់បានរួចផុតព្រះជន្មពីការធ្វើគុតក្នុងរបបខ្មែរក្រហម ដោយព្រះអង្គបានយាងចេញពីប្រទេសកម្ពុជានៅឆ្នាំ១៩៧៣ ទៅគង់នៅសាធារណរដ្ឋប្រជាមានិតចិន , ប្រទេសយូហ្គោស្លាវី , ប្រទេសបារាំង ។ ចុងក្រោយបានយាងទៅគង់នៅសហរដ្ឋអាមេរិកនាអំឡុងឆ្នាំ១៩៨២ ។
នៅខែឧសភា ឆ្នាំ១៩៨៣ សម្តេចស៊ីសុវត្ថិ ជីវ័នមុនីរក្ស បានយាងចូលរួមថតខ្សែភាពយន្តវាលពិឃាដ តាមការអញ្ជេីញរបស់ផលិតករ Roland joffe ក្រោយពីពេលដែលនាងកញ្ញា Neevy Pal ជំនួយការផលិតបានផ្តល់ព័ត៌មានទាំងអស់របស់សម្តេចទៅឱ្យផលិតករ ។
ខ្សែភាពយន្តរឿងវាលពិឃាដ ដឹកនាំដោយលោក Roland joffe បានថតនៅប្រទេសថៃ និងកាណាដា ដោយចំណាយប្រាក់អស់១៥លានដុល្លារសហរដ្ឋអាមេរិក ។
កាលពីឆ្នាំ១៩៦៥ សម្តេចស៊ីសុវត្ថិ ជីវ័នមុនីរក្ស ធ្លាប់សម្ដែងជាតួឯកក្នុងខ្សែភាពយន្តរឿងអប្សរា ជាព្រះរាជវណ្ណកម្មរបស់សម្តេចព្រះនរោត្តម សីហនុ ព្រះបរមរតនកោដ្ឋ ។
សម្តេចស៊ីសុវត្ថិ ជីវ័នមុនីរក្ស បានសោយទិវង្គតនៅវេលាម៉ោង១០ និង៤៥នាទីព្រឹក ថ្ងៃពុធ ទី២៨ ខែធ្នូ ឆ្នាំ២០១៦ ក្នុងរាជធានីភ្នំពេញ ដោយព្រះរោគាពាធ ៕
ចែករំលែកព័តមាននេះ