ប្រទេសឥណ្ឌូណេស៊ី ៖ ការផ្ទុះភ្នំភ្លើង Anak Krakatau កាលពីថ្មីៗនេះ នៅក្នុងប្រទេសឥណ្ឌូណេស៊ី បានបង្កឱ្យមានការព្រួយបារម្ភពីផលប៉ះពាល់អាចកើតមានលើព្រឹត្តិការណ៍ប្រកួត FIFA ASEAN Cup ឆ្នាំ ២០២៦ ខាងមុខនេះ ប៉ុន្តែបច្ចុប្បន្នគ្មានមូលហេតុណាមួយដែលត្រូវលុបចោល ឬប្តូរទីតាំងនៃការប្រកួតនោះទេ។
តាមការចុះផ្សាយរបស់សារព័ត៌មាន ABC News ការផ្ទុះភ្នំភ្លើងនៅច្រកសមុទ្រ Sunda កាលពីថ្មីៗនេះ បាននាំយកផេះភ្នំភ្លើង សាយភាយទៅតំបន់ផ្សេងៗ រួមមានខេត្ត Banten និងផ្នែកខ្លះនៃកោះជ្វាខាងលិច។ ជាមួយគ្នានោះ សារព័ត៌មាន The Jakarta Post បានឱ្យដឹងថា មនុស្សចំនួន ៨ នាក់បានបាត់ខ្លួន ក្នុងនោះរួមមានទាំងអ្នកសារព័ត៌មានចំនួន ៥ នាក់ដែលត្រូវបានបញ្ជូនទៅយកព័ត៌មានអំពីការផ្ទុះភ្នំភ្លើងនេះផងដែរ។
ស្ថានភាពនេះ បង្កឱ្យមានការព្រួយបារម្ភជាសាធារណៈអំពីការរំខានអាចកើតមានចំពោះ ការប្រកួតពានរង្វាន់ទើបតែបង្កើតឡើង FIFA ASEAN Cup ដែលកម្រិត Division 1 គ្រោងនឹងប្រព្រឹត្តទៅនៅក្នុងប្រទេសឥណ្ឌូណេស៊ី ចាប់ពីថ្ងៃទី ២៤ ខែកញ្ញា ដល់ថ្ងៃទី ៥ ខែតុលា ឆ្នាំ២០២៦។ យោងតាមសារព័ត៌មាន Bola ការព្រួយបារម្ភចម្បងៗទាំងនេះ គឺផ្តោតលើគុណភាពខ្យល់ក្នុងតំបន់ សុវត្ថិភាពរបស់កីឡាករ និងអ្នកគាំទ្រ ព្រមទាំងបញ្ហាប្រឈមផ្នែករៀបចំចាត់ចែងក្នុងការធ្វើដំណើររវាងទីលានប្រកួតនានា។
ទោះយ៉ាងណាក៏ដោយ ទាំងសមាគមបាល់ទាត់ឥណ្ឌូណេស៊ី (PSSI) និងសហព័ន្ធកីឡាបាល់ទាត់ពិភពលោក (FIFA) មិនទាន់ចេញសេចក្តីប្រកាសផ្លូវការណាមួយ ទាក់ទងនឹងការលុបចោល ការផ្លាស់ប្តូរទីតាំង ឬការកែសម្រួលកាលវិភាគប្រកួតនៅឡើយទេ ដោយការត្រៀមរៀបចំការប្រកួតអន្តរជាតិនេះ កំពុងដំណើរការទៅតាមការគ្រោងទុក។
ទន្ទឹមជាមួយគ្នានោះ បញ្ហាប្រតិបត្តិការដ៏សំខាន់បំផុតនាពេលបច្ចុប្បន្ននេះ ទាក់ទងនឹងសុវត្ថិភាពអាកាសចរណ៍។ បើតាមទីភ្នាក់ងារឧតុនិយមឥណ្ឌូណេស៊ីបានឱ្យដឹងថា ផ្សែងផេះភ្នំភ្លើង Anak Krakatau បានហក់ឡើងដល់កម្ពស់ជាង ៤ គីឡូម៉ែត្រ ហើយនៅកម្ពស់ខ្ពស់ជាងនេះ ផេះត្រូវបានគេឃើញនៅកម្ពស់ប្រហែលជាង ១៤ គីឡូម៉ែត្រដោយសំដៅទីតម្រង់ទៅរកមហាសមុទ្រឥណ្ឌា។ ទោះយ៉ាងណា បច្ចុប្បន្នភាពឧតុនិយមថ្មីៗនេះបានបង្ហាញថា កម្រិតផេះចាប់ផ្តើមបង្ហាញសញ្ញាថយចុះដំបូងៗហើយ ខណៈដែលស្ថានភាពនៅលើដីកំពុងមានភាពល្អប្រសើរឡើងជាបណ្តើរៗ។
គួរបញ្ជាក់ថា ប្រទេសឥណ្ឌូណេស៊ី គឺជាម្ចាស់ផ្ទះសម្រាប់កម្រិត Division 1 នៃពានរង្វាន់ FIFA ASEAN Cup ឆ្នាំ២០២៦ នៅទីក្រុង Jakarta និង Bandung ហើយត្រូវបានចាប់ឆ្នោតស្ថិតនៅក្នុងពូល A រួមជាមួយម៉ាឡេស៊ី សិង្ហបុរី និងបង់ក្លាដែស។ រីឯវៀតណាម ថៃ ហ្វីលីពីន និងប៉ាគីស្ថាន ស្ថិតនៅក្នុងពូល B។ ក្រុមកំពូលតារាងនៃពូលទាំងពីរ និងប្រកួតដណ្តើមជើងឯក ខណៈដែលក្រុមលេខ ២ ក្នុងពូល នឹងប្រកួតគ្នាដណ្តើមចំណាត់ថ្នាក់លេខ ៣៕ ប្រភព ៖ VnExpress
ចែករំលែកព័តមាននេះ