សហព័ន្ធកីឡាប្រដាល់គុនខ្មែរ សម្រេចព្យួរក្លិបមហិទ្ធីរិទ្ធគុនខ្មែរល្វាឯម រយៈពេល៣ខែ
- ភ្នំពេញ
រាជធានីភ្នំពេញ ៖ សហព័ន្ធកីឡាប្រដាល់គុនខ្មែរ បានសម្រេចព្យួរឈ្មោះក្លិបមហិទ្ធិរិទ្ធគុនខ្មែរល្វាឯមរបស់លោកមាស មើរ រយៈពេល ៣ ខែ មិនឱ្យចូលរួមរាល់សកម្មភាពប្រកួតប្រដាល់ទាំងនៅក្នុងប្រទេស និងក្រៅប្រទេស ។ ការសម្រេចចិត្តនេះទើបតែត្រូវបានប្រកាសជាផ្លូវការកាលពីថ្ងៃទី ៣១ ខែសីហា ឆ្នាំ ២០២៦ កន្លងទៅថ្មីៗនេះ ដោយសារតែថ្នាក់ដឹកនាំ និងអ្នកគ្រប់គ្រងក្លិបមួយនេះបានប្រព្រឹត្តខុសឆ្គងយ៉ាងធ្ងន់ធ្ងរទៅនឹងលក្ខន្តិកៈ បទបញ្ជាផ្ទៃក្នុង ក៏ដូចជាក្រមសីលធម៌ ដែលសហព័ន្ធបានកំណត់។
យោងតាមស្មារតីអង្គប្រជុំថ្ងៃទី១ ខែសីហា ឆ្នាំ២០២៦របស់អនុគណៈកម្មការវិន័យ និងអនុគណៈកម្មការបច្ចេកទេស នៃសហព័ន្ធកីឡាប្រដាល់គុនខ្មែរ បានសម្រេចព្យួរក្លិបមហិទ្ធិ រិទ្ធគុនខ្មែរល្វាឯម រាល់សកម្មភាពកីឡាប្រដាល់គុនខ្មែរទាំងក្នុងនិងក្រៅប្រទេស រយៈពេល៣ខែគិតចាប់ពីថ្ងៃទី១ ខែកញ្ញា រហូតដល់ថ្ងៃទី១ ខែធ្នូឆ្នាំ២០២៦ ជាបណ្ដោះអាសន្ន ។ ប៉ុន្តែក្នុងករណីលោកមាស មើរ ជាប្រធានក្លិបនៅតែមិនគោរពនិងអនុវត្តតាមលក្ខន្តិកៈ បទបញ្ជាបច្ចេកទេសគ្រប់គ្រងការប្រកួតរបស់សហព័ន្ធកីឡាប្រដាល់គុនខ្មែរ សហព័ន្ធនឹងបញ្ឈប់ការទទួលស្គាល់ក្លិបមហិទ្ធិរិទ្ធគុនខ្មែរល្វាឯម ជាសមាជិកសហព័ន្ធកីឡាប្រដាល់គុនខ្មែរជារៀងរហូត។
មូលហេតុចម្បងនៃការផ្អាកសកម្មភាពក្លិបមហិទ្ធិរិទ្ធគុនខ្មែរល្វាឯមរយៈពេល៣ខែនេះតាមព័ត៌មានថា ដោយសារអ្នកគ្រប់គ្រងក្លិប និងតំណាងក្លិបបានរំលោភបទបញ្ជាផ្ទៃក្នុង តាមរយៈធ្វើសកម្មភាព ឬបញ្ចេញមតិដែលប៉ះពាល់ដល់កិត្តិយស និងសេចក្តីថ្លៃថ្នូររបស់សហព័ន្ធកីឡាប្រដាល់គុនខ្មែរ។ មិនតែប៉ុណ្ណោះក្លិបកង្វះកិច្ចសហការដោយមិនបានគោរពតាមការណែនាំ និងការសម្របសម្រួលបច្ចេកទេសរបស់សហព័ន្ធក្នុងការរៀបចំ ឬបញ្ជូនកីឡាករទៅប្រកួតថែមទៀតផង ៕
ចែករំលែកព័តមាននេះ