រាជធានីភ្នំពេញ ៖ មហាជនបានសម្តែងក្តីបារម្ភយ៉ាងខ្លាំង បន្ទាប់ពីបានឃើញវីរៈសិល្បករ លោក ព្រហ្ម ម៉ាញ បានធ្លាក់ខ្លួនឈឺជាថ្មី រហូតដល់ថ្នាក់វង្វេងវង្វាន់ បាត់ការចងចាំ ។
តារាសម្តែងនាយ ព្រែក បានបង្ហោះរូបភាពមួយសន្លឹកដែលបង្ហាញពីស្ថានភាពលោក ព្រហ្ម ម៉ាញ ដែលកំពុងធ្លាក់ខ្លួនឈឺ គេងនៅគ្រែនៅក្នុងមន្ទីរពេទ្យ មួយ។
ដោយមិនបានបញ្ជាក់ពីស្ថានភាពជំងឺលោក ព្រហ្ម ម៉ាញ តែនាយ ព្រែក បញ្ជាក់ត្រឹមសំណេរខ្លីថា សូមជូនពរអ៊ំឆាប់ជាសះស្បើយ និង មានការចងចាំល្អដូចដើមវិញ។
ទោះបីជាយ៉ាងណា ក្រោយការបង្ហោះពីស្ថានភាពសុខភាពលោក ព្រហ្ម ម៉ាញ នាពេលនេះគេបានឃើញមហាជនជាច្រើនបាននាំគ្នាចូលទៅខំមិន ដោយម្នាក់ៗសម្តែងក្តីបារម្ភ និងបានជូនពរលោកអោយឆាប់បានជាសះស្បើយឡើងវិញ ។
ជាការកត់សម្គាល់ នេះមិនមែនជាលើកទីមួយទេ ដែលលោក ព្រហ្ម ម៉ាញ ត្រូវបានក្រុមគ្រួសារយកទៅសង្គ្រោះនៅមន្ទីរពេទ្យ ពោលកន្លងមកលោកក៏ត្រូវបានសម្រាកព្យាបាលនៅមន្ទីរពេទ្យ ដោយសារលោកបានញាំញីដោយសារជំងឺប្រចាំកាយ រួមផ្សំនឹងភាពចាស់ជរាផងដែរ ។
ដោយសារតែភាពចាស់ជរា និងមានជម្ងឺផងនោះ លោក ព្រហ្ម ម៉ាញ ស្ទើរតែបាត់បង់ការសម្តែងទាំងស្រុង ខណះពេលកន្លងមកលោកធ្លាប់បង្ហាញវត្តមានក្នុងកម្មវិធីសិល្បៈ ជាមួយការធ្វើដំណើរដោយការកាន់ឈឺច្រត ។
គួរបញ្ជាក់ថា លោក ព្រហ្មម៉ាញ គឺជាសិល្បករអាយ៉ៃជើងចាស់មួយរូប ដែលមានឈ្មោះបោះសំឡេងយ៉ាងខ្លាំងក្នុងប្រទេសកម្ពុជា ដោយលោកគឺជាដៃគូចម្រៀងអាយ៉ៃដ៏ស័ក្តិសមជាមួយអ្នកស្រី នួន សារី ហៅ យាយយ៉យ។
ដោយសារតែមានទេពកោសល្យខ្ពស់ស្ទើគ្មានអ្នកណាដូច លោក ព្រហ្ម ម៉ាញ ក៏ដោយបានផ្តល់គោរមងារជា «កិត្តិឧទ្ទេសបណ្ឌិត» នៃរាជបណ្ឌិតសភាកម្ពុជា កាលពីអំឡុងឆ្នាំ២០២២។
ដោយសារភាពចាស់ជរា និងមានជំងឺប្រចាំកាយនោះ កន្លងមកលោក ព្រហ្ម ម៉ាញ ក៏បានបើកបង្រៀនចំរៀងអាយ៉ៃដល់កូនខ្មែរជំនាន់ក្រោយដោយឥតគិតថ្លៃផងដែត។
ការបើកបង្រៀននេះត្រូវបានលោក អះអាងថា លោកចង់ចំណាយពេលវេលាចុងក្រោយរបស់លោកខ្លះ ដើម្បីផ្ទេរចំណេះដឹងដល់កូនខ្មែរជំនាន់ក្រោយណា ដែលមាននិស្ស័យដូចរូបលោក ៕
ចែករំលែកព័តមាននេះ