ប្រទេសចិន ៖ ការកើនឡើងរឿងភាគខ្លីៗ ដែលផលិតដោយបច្ចេកវិទ្យាបញ្ញាសិប្បនិម្មិត (AI) បាននិងកំពុងធ្វើឱ្យការរកប្រាក់ចំណូលរបស់ផលិតកម្មមួយចំនួនជួបការលំបាក។ ទោះជាយ៉ាងណាក៏ដោយ ដើម្បីគេចចេញពីការលំបាកនេះ ស្ទូឌីយោភាពយន្តដ៏ល្បីមួយរបស់ប្រទេសចិន កំពុងស្វែងរកច្រកចេញ តាមរយៈការផ្តល់ឱកាសឱ្យភ្ញៀវទេសចរ អាចសម្តែងជាតួឯកនៅក្នុងការផលិតរឿងខ្លីផ្ទាល់ខ្លួនបានតែម្តង។ នេះបើយោងតាមប្រភពពីសារព័ត៌មាន China Press ចេញផ្សាយនៅថ្ងៃទី២៤ ខែសីហា ឆ្នាំ២០២៦។
កាលពីមុន ការថតរឿងភាគតម្រូវឱ្យមានតួសម្តែងពិតប្រាកដចុះទៅថតនៅទីតាំងផ្ទាល់។ ប៉ុន្តែជាមួយការកើនឡើងរឿងភាគខ្លីផលិតដោយ AI នោះ ទម្រង់ចាស់បែបនេះ ក៏បានផ្លាស់ប្តូរយ៉ាងខ្លាំង។ បច្ចុប្បន្ននេះ ចំនួនការងារតួសម្តែងផ្ទាល់បានធ្លាក់ចុះយ៉ាងគំហុក ហើយសូម្បីតែក្រុមការងារថត និងទីតាំងថតនានា ក៏ប្រឈមមុខនឹងការលំបាកដែរ។
ដើម្បីដោះស្រាយបញ្ហាក្នុងការរស់រានមានជីវិតនេះ ខាងស្ទូឌីយោភាពយន្ត Hengdian World Studios ដែលស្ថិតនៅក្នុងទីក្រុងទុងយ៉ាង (Dongyang) ខេត្តចឺជាំង (Zhejiang) ដែលជាទីតាំងថតកុនដ៏ល្បីល្បាញមួយរបស់ប្រទេសចិន ថ្មីៗនេះបានដាក់ចេញគម្រោងមួយអនុញ្ញាតឱ្យភ្ញៀវទេសចរអាចបង្កើតរឿងខ្លីៗដោយខ្លួនឯងបាន ដោយចំណាយអស់ប្រហែល ៣០០ យន់ ឬជិត ៤៥ ដុល្លារអាមេរិកប៉ុណ្ណោះក្នុងម្នាក់ ដើម្បីក្លាយជាតួឯកក្នុងរឿងភាគខ្លីមួយ។ គម្រោងនេះ ទទួលបានការចាប់អារម្មណ៍ខ្លាំងភ្លាមៗ ដោយក្រុមហ៊ុនមួយចំនួនថែមទាំងបានប្រើវាជាសកម្មភាពពង្រឹងស្មារតីក្រុម សម្រាប់បុគ្គលិករបស់ពួកគេទៀតផង។
តាមរបាយការណ៍របស់សារព័ត៌មានចិន Kankan បានឱ្យដឹងថា តម្លៃចាប់ផ្តើមសម្រាប់ការទទួលបានបទពិសោធន៍សម្តែងក្នុងរឿងភាគខ្លីនៅស្ទូឌីយោភាពយន្ត Hengdian គឺមានតម្លៃប្រហែល ៣០០ យន់ ដែលរួមបញ្ចូលទាំងសម្លៀកបំពាក់ និងក្រុមការងារថតពេញលេញ រួមមាន អ្នកដឹកនាំរឿង អ្នកថត អ្នកតុបតែងមុខ និងអ្នកគ្រប់គ្រងសាច់រឿង ពោរពេញដោយបទពិសោធន៍ ដែលច្រើនជាង ២០ សាច់រឿងសម្រាប់ជ្រើសរើស រាប់តាំងពីរឿងភាគដណ្តើមអំណាចក្នុងព្រះរាជវាំង រឿងភាគចារកម្ម រហូតដល់រឿងក្បាច់គុនបុរាណទៀតផង។ ដំណើរការទាំងមូលទៀតសោត ប្រើប្រាស់ពេលតិចជាង១ម៉ោង រាប់ចាប់ពីការជ្រើសរើសសាច់រឿង ការណែនាំអ្នកដឹករឿង ការផាត់មុខ និងការតុបតែងខ្លួន ពិធីសម្ពោធរឿង ការថតនៅទីតាំងជាក់ស្តែង រហូតដល់លទ្ធផលសម្រេចនៃវីដេអូរឿងភាគខ្លីនោះ ដោយភ្ញៀវទេសចរអាចទទួលបានរឿងខ្លីផ្តាច់មុខរយៈពេល ១ ទៅ ២ នាទី។
របាយការណ៍បានបង្ហាញថា ភ្ញៀវទេសចរទាំងជាតិ និងអន្តរជាតិអាចឃើញគ្រប់ទីកន្លែងក្នុងស្ទូឌីយោភាពយន្ត អំឡុងការថតរឿងខ្លី។ អ្នកទេសចរខ្លះបានបំពេញក្តីស្រមៃរបស់ខ្លួនជាលក្ខណៈបុគ្គល ដើម្បីក្លាយជាតួកុន ខណៈអ្នកខ្លះទៀតធ្វើសកម្មភាពកសាងក្រុមការងារមួយ តាមរយៈចំណង់ចំណូលចិត្តនៃការក្លាយជាតួអង្គសម្តែង។
ក្រុមការងារថតរបស់ស្ទូឌីយោ Hengdian បានថ្លែងថា សាច់រឿងដែលមានប្រធានបទរាជវាំង គឺមានប្រជាប្រិយភាពខ្លាំងបំផុតក្នុងចំណោមភ្ញៀវទេសចរ ហើយចាប់តាំងពីការចាប់ផ្តើមដាក់ឱ្យដំណើរការសកម្មភាពថតបែបនេះ ស្ទូឌីយោ Hengdian ទាក់ទាញអ្នកទេសចរប្រមាណ ២០០ នាក់មកទទួលបានបទពិសោធន៍ថតនៅទីនោះក្នុងរយៈពេលត្រឹមតែជាង១០ថ្ងៃប៉ុណ្ណោះ៕ ប្រភព ៖ CCTV News និង China Press
ចែករំលែកព័តមាននេះ