ស៊ីន យូប៊ីន អំពាវនាវក្នុងនាមទូតសុច្ឆន្ទៈមហោស្រពជាតិភាពយន្តខ្នាតខ្លីកម្ពុជា
- ភ្នំពេញ
រាជធានីភ្នំពេញ៖ តារាសម្តែងស៊ីន យូប៊ីន បានស្នើឱ្យភាគីពាក់ព័ន្ធចូលរួមសហការ និងចាប់ដៃគ្នា កសាងភាពយន្តកម្ពុជា ដើម្បីបង្ហាញអត្តសញ្ញាណ និងព្រលឹងជាតិទៅកាន់ពិភពលោក ។
ការលើកឡើងពីតារាស្រីរូបនេះធ្វើឡើង ក្នុងខណៈពេលដែលនាងត្រូវបានជ្រើសរើសជាថ្មីជាទូតសុច្ឆន្ទៈនៃមហោស្រពជាតិភាពយន្តខ្នាតខ្លីកម្ពុជាលើកទី៥ ឆ្នាំ២០២៦ ។
សុីន យូប៊ីន ចាត់ទុកថា គឺជាកិត្តិយសមួយដែលនាងបានបន្តតួនាទីជាទូតសុច្ឆន្ទៈនៃមហោស្រពភាពយន្តជាតិខ្នាតខ្លីលើកទី៥ ជាលើកទី២ ។ នាងបានថ្លែងអំណរគុណសម្រាប់ការបន្តផ្តល់ទំនុកចិត្ត និងឱកាសដ៏មានតម្លៃនេះសម្រាប់រូបនាង ។
កញ្ញាសុីន យូប៊ីន បានលើកឡើងថា«ខ្ញុំសូមស្នើឱ្យមានការចូលរួមចាប់ដៃគ្នា ដើម្បីកសាងវិស័យភាពយន្តកម្ពុជា បង្ហាញអត្តសញ្ញាណរបស់យើង បង្ហាញដួងព្រលឹងជាតិយើងទៅកាន់ពិភពលោក តាមរយៈភាពយន្ត ។
នាងខ្ញុំក៏សូមអំពាវនាវដល់វិស័យឯកជន ដើម្បីចូលរួមចំណែកឱ្យបានកាន់តែសកម្មជាមួយមហោស្រពជាតិភាពយន្តខ្នាតខ្លីកម្ពុជា ។
ការចូលរួមនេះមិនត្រឹមតែជាការគាំទ្រដល់ផលិតករកម្ពុជាប៉ុណ្ណោះទេ ប៉ុន្តែគឺជាការរួមគ្នានាំយកអត្តសញ្ញាណជាតិខ្មែរទៅបង្ហាញនៅលើឆាកអន្តរជាតិតាមរយៈភាពភាពយន្ត ។ មហោស្រពជាតិភាពយន្តខ្នាតខ្លីកម្ពុជា លើកទី៥ នឹងប្រព្រឹត្តទៅរយៈពេល៤ថ្ងៃ ចាប់ពីថ្ងៃទី៣ ដល់ថ្ងៃទី៦ ខែវិច្ឆិកា ឆ្នាំ២០២៦ នៅសាលសន្និសីទចតុម្មុខ និងតាមបណ្តារោងភាពយន្តមួយចំនួនក្នុងរាជធានីភ្នំពេញ ក្រោមពាក្យស្លោក៖«ភាពយន្តខ្នាតខ្លី ជាជំហានឆ្ពោះទៅភាពយន្តខ្នាតវែង» ។
មហោស្រពនេះរៀបចំឡើងក្នុងគោលបំណងលើកកម្ពស់ស្នាដៃភាពយន្តខ្នាតខ្លី ផិតករ និងអ្នកបង្កើតភាពយន្តកម្ពុជា បង្កើតឱកាសសម្រាប់ការបង្ហាញស្នាដៃ ការផ្លាស់ប្តូរបទពិសោធនិងការតភ្ជាប់រវាងអ្នកជំនាញក្នុងវិស័យភាពយន្ត ព្រមទាំងរួមចំណែកជំរុញការអភិវឌ្ឍឧស្សាហកម្មភាពយន្តកម្ពុជាឱ្យកាន់តែរីកចម្រើន ។
បើតាមក្រសួងវប្បធម៌ និងវិចិត្រសិល្បៈ នាព្រឹកថ្ងៃទី ២៤ ខែសីហា ឆ្នាំ២០២៦ នៅរោងភាពយន្ត Fable Cinema គណៈកម្មការរៀបចំមហោស្រពជាតិភាពយន្តខ្នាតខ្លីកម្ពុជា លើកទី៥ បានរៀបចំសន្និសីទសារព័ត៌មាន និងធ្វើបទបង្ហាញជូនអ្នកឧបត្ថម្ភកម្មវិធី ដៃគូសហការ និងផលិតករវ័យក្មេង ដើម្បីផ្សព្វផ្សាយជាផ្លូវការអំពីការរៀបចំមហោស្រព និងសកម្មភាព សំខាន់ៗនៃមហោស្រពឆ្នាំ២០២៦ ។
កម្មវិធីនេះបានប្រព្រឹត្តទៅក្រោមអធិបតីភាពឯកឧត្ដមឯក ប៊ុនថា អនុរដ្ឋលេខាធិការ តំណាងលោកជំទាវបណ្ឌិតសាស្ត្រាចារ្យភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប: និងវត្តមានអញ្ជើញចូលរួមពីលោក លោកស្រីផលិតករភាពយន្ត តំណាងរោងភាពយន្ត ក្រុមហ៊ុនសហការឧបត្ថម្ភ ដៃគូ និងអ្នកសារព័ត៌មានសរុប១០០នាក់ ៕
ចែករំលែកព័តមាននេះ