បច្ចេកវិទ្យា៖​ Apple ត្រូវបានរាយការណ៍ថា អាចនឹងមិនបង្ហាញ ​iPhone 18 ម៉ូដែលធម្មតា​ នៅខែកញ្ញា ឆ្នាំ២០២៦ ដូចទម្លាប់ប្រចាំឆ្នាំទៀតទេ ហើយអាចពន្យារការបង្ហាញទៅដល់ ​ឆមាសទី១ ឆ្នាំ២០២៧​។ នេះបើយោងពី​ព័ត៌មាន MacRumors និង The Information។

តាមការរាយការណ៍របស់សារព័ត៌មានបច្ចេកវិទ្យា ​MacRumors​ ការផ្លាស់ប្តូរនេះនឹងជាការប្រែប្រួលដ៏ធំមួយពីយុទ្ធសាស្ត្រដែល Apple ធ្លាប់បង្ហាញ iPhone ជំនាន់ថ្មីជារៀងរាល់ខែកញ្ញា។

តាមកាលវិភាគថ្មី Apple អាចបែងចែកការបង្ហាញ iPhone ជាពីរដំណាក់កាលក្នុងមួយឆ្នាំ។ នៅខែកញ្ញា ឆ្នាំ២០២៦ ក្រុមហ៊ុនអាចបង្ហាញ ​iPhone 18 Pro និង iPhone 18 Pro Max​ រួមជាមួយ ​iPhone បត់ដំបូងរបស់ Apple​ ខណៈ iPhone 18 ម៉ូដែលធម្មតា, iPhone 18e និង Air ជំនាន់ទី២ អាចត្រូវបង្ហាញនៅឆមាសទី១ ឆ្នាំ២០២៧។

អ្នកវិភាគ​ បានលើកឡើងថា ការផ្លាស់ប្តូរកាលវិភាគនេះអាចមានគោលបំណងកាត់បន្ថយគម្លាតទីផ្សារជាមួយក្រុមហ៊ុនផលិតស្មាតហ្វូនចិន ដែលជាទូទៅបញ្ចេញម៉ូដែលកំពូលរបស់ខ្លួននៅដើមឆ្នាំ។ វាក៏អាចជួយឱ្យ Apple រៀបចំយុទ្ធនាការទីផ្សារ និងធនធានផលិតកម្មបានប្រសើរឡើង ខណៈត្រកូល iPhone កាន់តែមានម៉ូដែលច្រើន។

ចំណែក ​iPhone 18 Pro និង Pro Max​ ត្រូវបានរំពឹងថា អាចមានតម្លៃខ្ពស់ជាងជំនាន់បច្ចុប្បន្នប្រមាណ ​២៥០ ទៅ ៣០០ដុល្លារ​ ដោយសារថ្លៃផលិតបន្ទះឈីបបច្ចេកវិទ្យា 2-nanometer និងការកើនឡើងនៃតម្លៃអង្គចងចាំ DRAM និង NAND Flash។

ការកើនឡើងនៃតម្រូវការបន្ទះឈីបសម្រាប់ហេដ្ឋារចនាសម្ព័ន្ធ ​AI​ ទូទាំងពិភពលោក ក៏ត្រូវបានគេរំពឹងថា នឹងបង្កើនសម្ពាធលើការផ្គត់ផ្គង់គ្រឿងបន្លាស់សម្រាប់ឧស្សាហកម្មស្មាតហ្វូនផងដែរ។

ទោះជាយ៉ាងណា ព័ត៌មានខាងលើនៅតែជាការរាយការណ៍ និងការព្យាករណ៍ពីប្រភពក្នុងឧស្សាហកម្ម មិនមែនជាការប្រកាសផ្លូវការរបស់ Apple អំពីកាលវិភាគ iPhone 18 នៅឡើយទេ៕

​