លោកស្រី Tayane Dalazen មេធាវី និងជាអ្នកល្បីឈ្មោះលើបណ្តាញសង្គមជនជាតិប្រេស៊ីលម្នាក់ អាយុ៣៧ឆ្នាំ បានចែករំលែករឿងរ៉ាវដ៏រន្ធត់មួយ បន្ទាប់ពីត្រូវត្រីឆ្លាមខាំភ្លៅ ពេលកំពុងមុជទឹកកម្សាន្ត ។ នេះបើយោងតាមការចុះផ្សាយរបស់ BBC News ។
ហេតុការណ៍នេះ បានកើតឡើងកាលពីខែមេសានៅលើឆ្នេរសមុទ្រប្រេស៊ីល ។ លោកស្រី Dalazen បានឃើញភាពមិនប្រក្រតី ដោយមានត្រីឆ្លាមជាច្រើននៅលើផ្ទៃទឹក ។ ក្រោយមក ទើបដឹងថា អ្នករៀបចំដំណើរកម្សាន្តបានដាក់ចំណីឱ្យត្រីឆ្លាមស៊ី ដើម្បីទាក់ទាញពួកវាឱ្យមកជិតភ្ញៀវទេសចរ ។
ពេលកំពុងស្ថិតក្នុងទឹក លោកស្រីស្រាប់តែមានអារម្មណ៍ថា មានសម្ពាធខ្លាំង និងការឈឺចាប់យ៉ាងខ្លាំងនៅនឹងភ្លៅ ។ ត្រីឆ្លាមប្រវែងជាងពីរម៉ែត្របានខាំជាប់ភ្លៅរបស់លោកស្រី ។ជំនួសឱ្យការរើបម្រះដែលធ្វើឱ្យស្ថានការណ៍កាន់តែអាក្រក់ លោកស្រីបានព្យាយាមនៅស្ងៀម ព្រោះដឹងច្បាស់ថា ខ្លួនមិនអាចប្រយុទ្ធឈ្នះសត្វសមុទ្រនោះបានឡើយ ។ បន្ទាប់ពីជាប់ក្រោមទឹកអស់រយៈពេលជាច្រើនវិនាទី ត្រីឆ្លាមក៏បានលែង ហើយលោកស្រីក៏គេចខ្លួនបានដោយសុវត្ថិភាព ។
វីដេអូនៃហេតុការណ៍នេះ ត្រូវបានលោកស្រីបង្ហោះតាមអ៊ីនធើរណេត និងទទួលបានការទស្សនារាប់សិបលានដង ។ ទោះបីជាលោកស្រីបញ្ជាក់ថា មិនបានប៉ះពាល់ ឬញុះញង់ត្រីឆ្លាមផ្ទាល់ក៏ដោយ ក៏លោកស្រីបានទទួលស្គាល់ថា ខ្លួននៅជិតសត្វនោះជ្រុលពេកដែរ ។
ចែករំលែកព័តមាននេះ