រាជធានីភ្នំពេញ ៖ កម្មករ កម្មការិនីជាង២,០០០នាក់ ដែលបម្រើការងារនៅក្នុងរោងចក្រផលិតកាបូប «ជេអេស លេឌើរ ខលលិកសិន ភ្នំពេញ ឯ.ក» (រោងចក្រទី២) ដែលមានទីតាំងស្ថិតនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ បានប្រមូលផ្ដុំគ្នា ធ្វើកូដកម្មនៅខាងមុខរោងចក្រ កាលពីវេលាព្រឹកថ្ងៃទី០៣ ខែសីហា ឆ្នាំ២០២៦ ។
កម្មករបាននិយាយថា រោងចក្រនេះ គឺជារោងចក្រផលិតកាបូប ដែលមានកម្មករជាង២ពាន់នាក់ កំពុងបម្រើការងានៅក្នុងនោះ ហើយភាគច្រើនជាស្ត្រី រីឯការធ្វើកូដកម្មខាងលើនោះ គឺដើម្បីតវ៉ាទាមទារដកអ្នកគ្រប់គ្រងរោងចក្រជនជាតិកូរ៉េចេញ តែម្ដង។ ព្រោះតែអ្នកគ្រប់គ្រងរោងចក្ររូបនោះ បានប្រើពាក្យសម្ដីមិនសមរម្យ និងជេរប្រមាថដាក់កម្មករ ធ្វើឲ្យពួកគាត់មិនអាចទទួលយកបាន នូវសម្ដីអសុរសនោះបានឡើយ ហើយពួកគាត់ក៏មានការទាមទារ នូវលក្ខខណ្ឌការងារមួយចំនួនផ្សេងទៀតផងដែរ ។
នគរបាលបានប្រាប់ថា កម្មករបានប្រមូលផ្តុំគ្នាធ្វើកូដកម្មទាមទារលក្ខខណ្ឌខាងលើនោះដោយសន្តិវិធីប៉ុណ្ណោះ ពុំមានអំពើហិង្សាកើតឡើងនោះទេ ពួកគាត់បានទាមទារឱ្យមន្ត្រីក្រសួងការងារ និងបណ្តុះបណ្តាលវិជ្ជាជីវៈ ព្រមទាំងអាជ្ញាធរ និងស្ថាប័នពាក់ព័ន្ធនានា ជួយដោះស្រាយជូនពួកគាត់។ ដោយឡែកនៅក្នុងរោងចក្រនោះ បច្ចុប្បន្នមានសហជីពចំនួន៤ ក្នុងនោះទី១.សហជីពអភិវឌ្ឍន៍ចលនាការងារកម្ពុជា នៃក្រុមហ៊ុន ជេអេស លេនើរ ខនលិកសិន ភ្នំពេញ សាខាទី២ ។ ទី២.សហជីព ស្មារតីកម្មករខ្មែរ ក្រុមហ៊ុន ជេអេស លេនើរ ខលលិកសិន ភ្នំពេញ ឯ.ក សាខាទី២ ។ ទី៣.សហជីពឯករាជ្យនៃរោងចក្រ ជេអេស លេខើរ ខលលិកសិន ភ្នំពេញ ឯ.ក ទី២ ។ និងទី៤.សហជីពកម្ពុជានៃក្រុមហ៊ុន ជេអេសលេនើរ ខល លិកសិន ភ្នំពេញ ឯ.ក រោងចក្រទី២ ។
នគរបាលបានប្រាប់បន្តថា នាយករោងចក្រឈ្មោះ HWANG SANGHA ភេទប្រុស សញ្ជាតិកូរ៉េខាងត្បូង កាន់លិខិតឆ្លងដែនលេខ M… សញ្ជាតិកូរ៉េខាងត្បូង ស្នាក់នៅក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ រីឯអ្នកគ្រប់គ្រង ដែលរងការថ្នាំងថ្នាក់ពីកម្មករនោះឈ្មោះ WANG EUMLEE ។ បន្ទាប់ពីទទួលបានដំណឹងថា កម្មករ កម្មការិនីរោងចក្រខាងលើធ្វើកូដកម្មបែបនេះ មន្ត្រីក្រសួងការងារ និងបណ្តុះបណ្តាលវិជ្ជាជីវៈ ព្រមទាំងមន្ត្រីមន្ទីរការងារ និងបណ្តុះបណ្តាលវិជ្ជាជីវៈរាជធានីភ្នំពេញ និងអាជ្ញាធរមូលដ្ឋាន បានចុះទៅធ្វើការសម្របសម្រួល ជួបដោះស្រាយជាមួយកម្មករ និងតំណាងរោងចក្រ ដើម្បីពន្លត់កំហឹងកម្មករ កុំឲ្យបន្តធ្វើកូដកម្មបន្តទៀត ។
នគរបាលបានបញ្ជាក់ប្រាប់បន្ថែមថា ចំពោះលទ្ធផល នៃការដោះស្រាយបញ្ចប់វិវាទនោះបានឯកភាពគ្នាដូចខាងក្រោម៖
១-លោក WANG EUMLEE (អ្នកគ្រប់គ្រង) សន្យាថា កែប្រែពាក្យសម្តី និងឥរិយាបទមិនសមរម្យរបស់ខ្លួន ឱ្យបានល្អប្រសើរ និងមិនធ្វើឱ្យប៉ះពាល់ដល់កម្មករនិយោជិតទៀតទេ ក្នុងករណីមិនកែប្រែ គាត់សុខចិត្តចុះចេញពីតំណែង ។
២-ក្រុមហ៊ុនឯកភាពប្តូរកន្លែងម៉ាស៊ីនកាត់ពុម្ពជ័រទៅកន្លែងចាស់វិញ ដើម្បីកុំឱ្យបង្កមានក្លិនប៉ះពាល់ ដល់សុខភាពកម្មករនិយោជិតក្នុងអំឡុងពេល២សប្តាហ៍ ឱ្យបានមុនថ្ងៃទី១៦ ខែសីហា ឆ្នាំ២០២៦ និងជូននាយកដ្ឋាន ពេទ្យការងារចុះធ្វើអធិការកិច្ច ។
៣-ក្រុមហ៊ុនឯកភាពមិនរើសអើង សហជីព ប្រតិភូបុគ្គលិក តំណាងកម្មករនិយោជិត និងរៀបចំការងារឱ្យកម្មករនិយោជិតស្របតាមច្បាប់ស្តីពីការងារ កិច្ចសន្យាការងារ និងបទបញ្ជាផ្ទៃក្នុងរបស់ក្រុមហ៊ុន ។
៤-លោក ពៅ វីរៈ (ជាងភ្លើង) យល់ព្រមចូលបម្រើការងារជាធម្មតាតាមតួនាទី ភារកិច្ចខ្លួន ក្នុងករណីក្រុមហ៊ុន រកឃើញថាមិនព្រមបម្រើការងារតាមភារកិច្ចខ្លួន ក្រុមហ៊ុននឹងចាត់វិធានការអនុវត្តតាមបទបញ្ជាផ្ទៃក្នុងក្រុមហ៊ុន និង ច្បាប់ស្តីពីការងារ ។
៥-កម្មករនិយោជិតសន្យាប្រឹងប្រែងបំពេញការងារតាមតួនាទី ភារកិច្ច គោរពបទបញ្ជាផ្ទៃក្នុងសហគ្រាស និងច្បាប់ស្តីពីការងារ។ កម្មករនិយោជិតឯកភាពបញ្ចប់វិវាទ និងមិនដឹកនាំធ្វើកូដកម្ម ដោយរាល់បញ្ហាដែលកើតមាន ត្រូវមកពិភាក្សាគ្នានៅថ្នាក់សហគ្រាសតាមសន្តិវិធី ដោយមិនធ្វើឱ្យប៉ះពាល់ដល់ខ្សែច្រវ៉ាក់ផលិតកម្ម។
៦-ភាគីនិយោជក និងបងប្អូនកម្មករនិយោជិត ធានាអនុវត្តត្រឹមត្រូវស្របតាមផ្លូវច្បាប់ស្តីពីការងារ និងលិខិត បទដ្ឋានគតិយុត្តពាក់ព័ន្ធ ក្នុងករណីភាគីណាមួយអនុវត្តល្មើសច្បាប់ និងមិនអនុវត្តតាមកិច្ចព្រមព្រៀង ភាគីទាំងពីរ ត្រូវទទួលខុសត្រូវចំពោះមុខច្បាប់ជាធរមាន ។
៧-បងប្អូនកម្មករនិយោជិតឯកភាពចូលបម្រើការងារធម្មតាវិញ នៅថ្ងៃទី៤ ខែសីហា ឆ្នាំ២០២៦ និងមិនមាន ការគុំគួនគ្នាទៅថ្ងៃក្រោយ ៕
ចែករំលែកព័តមាននេះ