រាជធានីភ្នំពេញ ៖ ខ្ញុំត្រៀមខ្លួនរង់ចាំធ្វើការយ៉ាងជិតស្និទ្ធជាមួយលោកជំទាវ ដើម្បីបម្រើបុព្វហេតុផលប្រយោជន៍ប្រទេសជាតិ និងប្រជាជនយើងទាំង២ និងដោះស្រាយរាល់បញ្ហាដោយសន្តិវិធីដែលនឹងលើកស្ទួយភាពសុខដុម រវាងប្រជាជាតិយើង ព្រមទាំងរួមចំណែកថែរក្សាសន្តិភាព ស្ថិរភាព និងវិបុលភាពក្នុងតំបន់។ នេះជាខ្លឹមសារលិខិតអបអរសាទររបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផ្ញើជូនលោកជំទាវយីងឡាក់ ស៊ីណាវ៉ាត្រា នាយករដ្ឋមន្ត្រីថៃ កាលពីថ្ងៃទី៨ សីហា ២០១១ កន្លងមកនេះ ។
នៅក្នុងសារលិខិតដដែលបានសរសេរថា តាងនាមរាជរដ្ឋាភិបាល និងប្រជាជនកម្ពុជា ខ្ញុំមានសេចក្តីសោមនស្សរីករាយសូមសម្តែងនូវអំណរសាទរយ៉ាងស្មោះស្ម័គ្របំផុតជូនចំពោះលោកជំទាវ ក្នុងឱកាសដែលសភាតំណាងរាស្ត្រថៃបានបោះឆ្នោតអនុម័តឱ្យលោកជំទាវជានាយករដ្ឋមន្ត្រីនៃព្រះរាជាណាចក្រថៃ។ ខ្ញុំមានសុទិដ្ឋិនិយមយ៉ាងខ្លាំង ដោយមានការប្តេជ្ញារួមគ្នា លោកជំទាវ និងខ្ញុំពិតជានឹងអាចស្តារឡើងវិញនូវចំណងមិត្តភាពជាប្រពៃណីបងប្អូន ជាអ្នកជិតខាងល្អ និងមានកិច្ចសហប្រតិបត្តិការប្រកបដោយផ្លែផ្កា រវាងប្រជាជនយើងទាំងពីរ។
ខ្ញុំត្រៀមខ្លួនរង់ចាំការធ្វើការងារយ៉ាងជិតស្និទ្ធជាមួយលោកជំទាវ ដើម្បីបម្រើបុព្វហេតុផលប្រយោជន៍ប្រទេសជាតិ និងប្រជាជនយើងទាំងពីរ និងដោះស្រាយរាល់បញ្ហាដោយសន្តិវិធី ដែលនឹងលើកស្ទួយភាពសុខដុមរវាងប្រជាជាតិយើង ព្រមទាំងរួមចំណែកដល់សន្តិភាព ស្ថិរភាព និងវិបុលភាពក្នុងតំបន់។ ខ្ញុំសូមលោកជំទាវមេត្តាទទួលនូវការរាប់អានដ៏ខ្ពង់ខ្ពស់អំពីខ្ញុំ និងសូមជូនស័ព្ទសាធុការពរបវរមហាប្រសើរ សូមឱ្យលោកជំទាវ ទទួលបានជោគជ័យកាន់តែធំធេងក្នុងភារកិច្ចដ៏ឧត្ដុង្គឧត្តមនាពេលខាងមុខ ដើម្បីនាំមកនូវសុភមង្គល និងភាពសម្បូររុងរឿងជូនប្រទេស និងប្រជាជនថៃ ។
សូមបញ្ជាក់ថា លោកស្រីយីងឡាក់ ស៊ីណាវ៉ាត្រា អតីតជាអ្នកជំនួញស្រស់ស្អាតម្នាក់ ស្ថិតក្នុងវ័យ៤៤ឆ្នាំ បានក្លាយជាបេក្ខនារីតែម្នាក់គត់ដែលទទួលការគាំទ្រពីសមាជិកសភាដល់ទៅ២៩០រូបក្នុងចំណោមសមាជិកសភាថ្មីទាំង៤៩៦រូបដែលចូលរួមបោះឆ្នោតអនុម័តជ្រើសតាំងនាយករដ្ឋមន្ត្រី។ នេះជាការប្រកាសផ្លូវការរបស់ប្រធានសភាថ្មីថៃ។ តួលេខនេះគឺជិតស្មើនឹងចំនួនសមាជិកសភានៃក្រុមចម្រុះមានសមាជិកសភា៣០០រូបដែលគណបក្សភឿថៃជាអ្នកឈ្នះឆ្នោតសភាបង្កើតឡើងជាមួយគណបក្ស៥ទៀត។
បណ្តាសមាជិកសភានៃគណបក្សប្រជាធិបតេយ្យរបស់នាយករដ្ឋមន្ត្រីចាំផ្ទះលោកអាប់ភីស៊ីត វេចាជីវ៉ា ដែលក្លាយជាគណបក្សប្រឆាំងបានបោះឆ្នោតអនុប្បវាទយ៉ាងច្រើន។ លោកស្រីយីងឡាក់ មានអ្នកបោះឆ្នោតប្រឆាំងជំទាស់តែ៣សម្លេង ហើយអនុប្បវាទមានដល់១៩៧សម្លេង។
លោកស្រីយីងឡាក់ ស៊ីណាវ៉ាត្រា កាលពីថ្ងៃទី៨ សីហា បានដឹកនាំគណៈរដ្ឋមន្ត្រីចូលបង្គំគាល់ព្រះមហាក្សត្រ ហើយត្រូវបានព្រះមហាក្សត្រថៃឡាយព្រះហស្តលេខាឱ្យចូលកាន់តំណែងជាផ្លូវការ។ លោកស្រីយីងឡាក់បានដឹកនាំគណបក្សភឿថៃសម្រេចបានជ័យជំនះយ៉ាងធំធេងក្នុងការបោះឆ្នោតសភាថៃកាលពីថ្ងៃទី៣ កក្កដា កន្លងមកនេះ។
ការប្រឈមសំខាន់របស់នាយករដ្ឋមន្ត្រីថ្មីរូបនេះរួមមានដូចជាការខំប្រឹងធ្វើឱ្យមានស្ថិរភាពឡើងវិញក្នុងប្រទេសថៃ ទប់ស្កាត់-ដោះស្រាយការធ្វើបាតុកម្មធំៗ ដែលកើតមានចាប់តាំងពីរដ្ឋប្រហារផ្តួលរំលំបងប្រុសលោកស្រីកាលពីខែកញ្ញា ឆ្នាំ២០០៦មក ៕
ចែករំលែកព័តមាននេះ