អបអរសាទរ! ក្រុមបាល់ទះបុរសកម្ពុជាបានវិលត្រឡប់មកដល់មាតុប្រទេសវិញហើយ
- ភ្នំពេញ
រាជធានីភ្នំពេញ ៖ ក្រុមបាល់ទះបុរសកម្ពុជាបានវិលត្រឡប់មកដល់មាតុប្រទេសវិញហើយកាលពីរសៀលថ្ងៃទី២៧ ខែកក្កដា បន្ទាប់
ពីបានទៅបំពេញបេសកកម្មប្រកួតពានរង្វាន់6th SEA V.Cup2026 នៅប្រទេសហ្វីលីពីននិងប្រទេសឥណ្ឌូណេស៊ីអស់រយៈពេលជាច្រើនថ្ងៃ និងបាននាំមកជាមួយនូវជ័យជម្នះយ៉ាងត្រចះត្រចង់ជូនជាតិមាតុភូមិ។
គួររម្លឹកថា ក្រុមប្រតិភូកីឡាបាល់ទះកម្ពុជាបានចូលរួមបំពេញបេសកកម្មប្រកួតក្នុងក្របខណ្ឌពានរង្វាន់អាស៊ាន6th SEA V.Cup2026ក្នុងជុំទី១ នៅទីក្រុងCandonប្រទេសហ្វីលីពីនដែលបានប្រព្រឹត្តទៅចាប់ពីថ្ងៃទី១៥ ដល់ថ្ងៃទី១៩ ខែកក្កដា ដណ្ដើមបានមេដាយមាស។
ពេលចូលរួមប្រកួតក្នុងជុំទី២នៃព្រឹត្តិការណ៍ដដែលនៅទីក្រុង Jakarta ប្រទេសឥណ្ឌូណេស៊ីចាប់ពីថ្ងៃទី២២ ដល់ថ្ងៃទី២៦ខែ កក្កដា ទទួលបានចំណាត់ថ្នាក់លេខ៤។
ឯកឧត្តមអភិសន្តិបណ្ឌិតស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាបាល់ទះកម្ពុជា និងលោកជំទាវ កែវសួនសុភី បានអញ្ជើញទៅទទួលស្វាគមន៍យ៉ាងកក់ក្ដៅ និងលើកទឹកចិត្តផ្ទាល់ការវិលត្រឡប់មកវិញរបស់ក្រុមប្រតិភូកីឡាបាល់ទះកម្ពុជានៅឯអាកាសយានដ្ឋានអន្តរជាតិមរតកតេជោកាលពីរសៀលថ្ងៃទី២៧ ខែកក្កដា។រីឯក្បួនដង្ហែបានធ្វើឡើងយ៉ាងអធិកអធមពីអាកាសយានដ្ឋានមរតកតេជោចូលមករាជធានីភ្នំពេញឆ្លងកាត់តាមដងផ្លូវសំខាន់ៗរួមមាន៖ តាមបណ្ដោយមហាវិថីសម្ដេចហ៊ុន សែន(ផ្លូវ៦០ម៉ែត្រ) ឆ្ពោះមកវិមានឯករាជ្យ កោះពេជ្រ ព្រះបរមរាជវាំង ហ្គ្រេនភ្នំពេញ និងបញ្ចប់នៅទីតាំងហ្វឹកហាត់ក្រុមជម្រើសជាតិវិសាខានៅត្រឹមវេលាម៉ោង៨និង៣០នាទីយប់។
សម្រាប់ការទៅចូលរួមប្រកួតបាល់ទះដណ្ដើមពានរង្វាន់អាស៊ានលើកទី៦នៅប្រទេសហ្វីលីពីនក្នុងជើងទី១ក្រុមបាល់ទះបុរសកម្ពុជាពិតជាធ្វើបានល្អខ្លាំងណាស់ ក្រោយពីបានយកឈ្នះលើក្រុមខ្លាំងៗម្ចាស់ផ្ទះហ្វីលីពីនក្នុងលទ្ធផល៣សិតទល់២សិត និងយកឈ្នះលើក្រុមប្រទេសថៃ៣សិតទល់១សិត និងការប្រកួតចុងក្រោយបានយកឈ្នះលើក្រុមប្រទេសឥណ្ឌូណេស៊ីជាមួយនឹងលទ្ធផល៣សិតទល់២សិតរហូតដណ្ដើមបានមេដាយមាស។
រីឯការប្រកួតជុំទី២នៅប្រទេសឥណ្ឌូណេស៊ីវិញគេសង្កេតឃើញថា ក្រុមបាល់ទះបុរសកម្ពុជាបានប្រឹងប្រែងប្រកួតអស់ពីសមត្ថភាពតែម្ដង។
ប៉ុន្តែដោយការប្រកួតជាប់ៗគ្នាពេកធ្វើឱ្យកីឡាករកម្ពុជាធ្លាក់កម្លាំងបន្តិចរហូតចាញ់អស់២ប្រកួតឈ្នះ១ប្រកួត ដណ្ដើមបានត្រឹមចំណាត់ថ្នាក់លេខ៤ប៉ុណ្ណោះ។ ទោះជាយ៉ាងណា ទាំងថ្នាក់ដឹកនាំ និងប្រជាពលរដ្ឋកម្ពុជាទូទាំងប្រទេសមានការសាទរយ៉ាងខ្លាំង ព្រោះការដណ្ដើមបានមេដាយមាសកាលពីជើងទី១នៅប្រទេសហ្វីលីពីន បានចារជាប្រវត្តិសាស្ត្រសម្រាប់ក្រុមជម្រើសជាតិបាល់ទះបុរសកម្ពុជា បន្ទាប់ពីខកខានអស់រយៈពេលជាច្រើនឆ្នាំមកនេះ។
ថ្លែងឱ្យដឹងនៅក្នុងឱកាសទទួលក្រុមប្រតិភូកីឡាបាល់ទះកម្ពុជា ឯកឧត្តមអភិសន្តិបណ្ឌិតស សុខា និងភិយា ជួសមុខឱ្យមហាគ្រួសារបាល់ទះកម្ពុជា សូមថ្លែងអំណរគុណដល់ក្រុមប្រតិភូ ក្រុមការងារគ្រូបង្វឹក និងប្អូនៗកីឡាករដែលខិតខំប្រឹងប្រែងប្រកួតលើឆាកអន្តរជាតិរហូតដណ្ដើមបានជ័យជម្នះជូនជាតិមាតុភូមិ ៕
ចែករំលែកព័តមាននេះ