តារាចម្រៀង បាន មុន្នីល័ក្ខ ចេញមុខបកស្រាយជុំវិញករណីបុរសម្នាក់ បង្ហោះសារ និងរូបភាព អះអាងថាមានទំនាក់ទំនងស្នេហាជាមួយនាង
- ភ្នំពេញ
រាជធានីភ្នំពេញ ៖ តារាចម្រៀង បាន មុន្នីល័ក្ខ បានចេញមុខបកស្រាយប្រាប់មហាជនចំពោះករណីបុរសម្នាក់ដែលតែងតែបង្ហោះរូបភាពរបស់នាងលើបណ្តាញដោយភ្ជាប់សំណេរដោយអះអាងថា រូបនាងមានទាក់ទំនងស្នេហ៍ ឬជាភរិយាជាដើម ។ល។
បញ្ជៀសការយល់ច្រឡំ តារាស្រីរូបនេះបានគូសបញ្ជាក់ថា ការលើកឡើងពីបុរសដែលមានឈ្មោះក្នុងគណនេយ្យហ្វេសប៊ុក Sokhom Penn នេះ គឺមិនមែនជាការពិតឡើយ ត្បិតនាង និងបុរសរូបនេះមិនដែលស្គាល់គ្នាពីមុនមកនោះឡើយ ខណះពេលដែលនាងចាត់ទុកសកម្មភាពនេះធ្វើអោយប៉ះពាល់សេចក្តីថ្លៃថ្នូរ និងកិត្តិយសរបស់នាង ហើយបង្កអោយមានការយល់ច្រឡំពីសំណាក់មហាជន ។
ជាមួយនឹងការចេញមុខបដិសេធនាពេលនេះ បាន មុន្នីល័ក្ខ ក៏បានធ្វើការព្រមានទៅកាន់បុរសរូបនេះអោយលុបចោលទាំងអស់រាល់អ្វីដែលបានបង្ហោះពាក់ព័ន្ធរូបនាងដែលមិនពិត បើមិនដូច្នេះទេនាងនឹងមានវិធានការតាមផ្លូវច្បាប់ ។
តាមរយះបណ្តាញសង្គមតារាចម្រៀងនាង បាន មុន្នីល័ក្ខ បានបង្ហោះសំណេរថា នាងខ្ញុំសូមចេញមុខធ្វើការបំភ្លឺជុំវិញការផុសរូបភាព និងសារមួយចំនួននៅលើបណ្តាញសង្គមដោយគណនី/Fbឈ្មោះ “Sokhom Penn” ដែលបានយករូបថតរបស់នាងខ្ញុំទៅបង្ហោះ និងសរសេរខ្លឹមសារប្រឌិតបង្កើតរឿងមិនពិតថាមានទំនាក់ទំនងស្នេហា ឬជាគូស្នេហ៍ជាមួយរូបនាងខ្ញុំ។
នាងខ្ញុំសូមបញ្ជាក់យ៉ាងច្បាស់ៗថា៖ “នាងខ្ញុំ និងម្ចាស់គណនី/Fbខាងលើ មិនដែលស្គាល់គ្នាតាំងពីមុនមកទេ ហើយក៏គ្មានទំនាក់ទំនងអ្វីទាល់តែសោះ”។
នាងបន្តថា ការសរសេរ និងយករូបភាពនាងខ្ញុំទៅបង្ហោះបែបនេះ គឺជារឿងមិនពិតទាំងស្រុង និងបានធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយស ថ្លៃថ្នូរ និងអារម្មណ៍របស់នាងខ្ញុំ ព្រមទាំងធ្វើឲ្យមហាជនមានការយល់ច្រឡំ។
នាងបញ្ជាក់ថា កន្លងមក Admin Page របស់នាងខ្ញុំធ្លាប់បានធ្វើការទាក់ទងទៅកាន់ម្ចាស់ទំព័រ ខាងលើរួចមកហើយ ដើម្បីស្នើសុំឲ្យលុបចេញ និងបញ្ឈប់សកម្មភាពរំលោភសិទ្ធិបុគ្គលបែបនេះ។ យ៉ាងណាមិញ គាត់នៅតែបន្តសកម្មភាពដដែលៗ។
អាស្រ័យហេតុនេះ នាងខ្ញុំសូម៖
១-សំណូមពរយ៉ាងទទូចដល់ក្រុមគ្រួសារ ឬសាច់ញាតិរបស់លោក អ៊ុំ/ម្ចាស់គណនី Sokhom Penn មេត្តាជួយអន្តរាគមន៍ ណែនាំ ឬមើលថែទាំគាត់ផង ប្រសិនជានៅក្នុងករណីគាត់មានបញ្ហាសុខភាពស្មារតី ឬអសមត្ថភាពក្នុងការគ្រប់គ្រងសកម្មភាពលើបណ្តាញសង្គម ដើម្បីចៀសវាងការបង្កផលប៉ះពាល់ដល់អ្នកដទៃបន្តទៀត។
២-ស្នើឲ្យលុបរាល់រូបភាព និងសារប្រឌិតទាំងនោះចេញជាបន្ទាន់។
ប្រសិនបើនៅតែបន្តរំលោភបំពាន និងបង្ហោះព័ត៌មានមិនពិតដែលបង្កការខូចខាតដល់កិត្តិយសនាងខ្ញុំទៀតនោះ នាងខ្ញុំនឹងចាត់វិធានការតាមផ្លូវច្បាប់ជាធរមានដោយមិនលើកលែងឡើយ។
សូមអរគុណដល់ប្រិយមិត្ត និងបងប្អូនទាំងអស់ដែលបានយល់ស្រប និងតែងតែជួយបារម្ភ និងគាំទ្រនាងខ្ញុំកន្លងមក ៕
ចែករំលែកព័តមាននេះ