នគរបាលក្រុងស្ទឹងត្រែង បំបែ.កសំណុំរឿងគ្រឿងញៀ.ន និងឃាត់ខ្លួនជនសង្ស័យ ៤នាក់ បញ្ជូនទៅឃុំខ្លួននៅពន្ធនាគារ
- ស្ទឹងត្រែង
ខេត្តស្ទឹងត្រែង៖ កម្លាំងជំនាញនៃការិយាល័យប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលក្រុងស្ទឹងត្រែង បើកប្រតិបត្តិការស្រាវជ្រាវ និងបង្ក្រាបករណីជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀនជាបន្តបន្ទាប់នៅ ០៣គោលដៅផ្សេងគ្នា ដោយឃាត់ខ្លួនជនសង្ស័យចំនួន ៤នាក់ រួមទាំងវត្ថុតាង និងបានបញ្ជូនទៅតុលាការដើម្បីអនុវត្តតាមនីតិវិធីច្បាប់នេះបើតាមការអោយដឹងពីនគរបាលជំនាញកាលពីព្រឹកថ្ងៃទី២២ កក្តដា ២០២៦។
ប្រតិបត្តិការនេះបានធ្វើឡើងកាលពីថ្ងៃទី១៥ ខែកក្កដា ឆ្នាំ២០២៦ ដោយបានសម្រេចផលនៅចំណុចភូមិស្ពានថ្ម និងភូមិហាងខូបាន ក្នុងក្រុងស្ទឹងត្រែង ខេត្តស្ទឹងត្រែង។ ជនសង្ស័យទាំង ៤នាក់ដែលត្រូវឃាត់ខ្លួនរួមមាន៖១.ឈ្មោះ ដោ ឧត្តម ភេទប្រុស អាយុ២៩ឆ្នាំ ទីលំនៅភូមិហាងខូបាន សង្កាត់សាមគ្គី(ត្រូវជាមេក្លោងក្នុងអំពើជួញដូរ រក្សាទុក និងប្រើប្រាស់) ២.ឈ្មោះ កែវ ម៉េន ភេទប្រុស អាយុ៥៣ឆ្នាំ ទីលំនៅភូមិស្ពានថ្ម សង្កាត់ស្ទឹងត្រែង (ករណីសមគំនិតជួញដូរ និងប្រើប្រាស់) ឈ្មោះ ម៉េន វុត្ថា ភេទប្រុស អាយុ១៧ឆ្នាំ ទីលំនៅភូមិស្ពានថ្ម សង្កាត់ស្ទឹងត្រែង (ករណីសមគំនិតជួញដូរ និងប្រើប្រាស់)៤.ឈ្មោះ អ៊ុង សោភ័ណទេវី ភេទស្រី អាយុ៤០ឆ្នាំ ជនជាតិខ្មែរ មុខរបរ មិនពិតប្រាកដ ទីលំនៅបច្ចុប្បន្នភូមិកណ្តាល សង្កាត់ស្ទឹងត្រែង ក្រុង/ខេត្តស្ទឹងត្រែង (ករណីជួញដូរ និងប្រើប្រាស់)។
យោងតាមការបញ្ជាក់ពីមន្ត្រីជំនាញ ការឈានទៅដល់ការចាប់ខ្លួនមេក្លោងឈ្មោះ ដោ ឧត្តម គឺកើតចេញពីការសាកសួរ និងចម្លើយសារភាពរបស់ក្រុមអ្នកប្រើប្រាស់ដែលត្រូវឃាត់ខ្លួនមុននេះ។ ក្នុងនោះកម្លាំងសមត្ថកិច្ចក៏រឹបអូសបានវត្ថុតាងសារធាតុញៀនមួយចំនួនដែលជាភស្តុតាងជាក់ស្តែងផងដែរ។
បច្ចុប្បន្ន ក្រោយបញ្ចប់ការសាកសួរនិងកសាងសំណុំរឿងតាមនីតិវិធី នគរបាលក្រុងស្ទឹងត្រែងបានបញ្ជូនជនសង្ស័យទាំង ៤នាក់ទៅកាន់អយ្យការអមសាលាដំបូងខេត្តស្ទឹងត្រែង ហើយចៅក្រមស៊ើបសួរបានសម្រេចចេញដីកាឃុំខ្លួនពួកគេជាបណ្តោះអាសន្ននៅក្នុងពន្ធនាគារ ដើម្បីធានារក្សាសន្តិសុខ និងសណ្តាប់ធ្នាប់ជូនប្រជាពលរដ្ឋក្នុងមូលដ្ឋាន៕
ចែករំលែកព័តមាននេះ