អន្តរជាតិ ៖ តម្លៃប្រេងឆៅអន្តរជាតិបានកើនឡើងជាង ១% នៅព្រឹកថ្ងៃទី១៧ ខែកក្កដា ឆ្នាំ២០២៦ បន្ទាប់ពីសហរដ្ឋអាមេរិក និងប្រទេសអ៊ីរ៉ង់បានបង្កើនការវាយប្រហារដាក់គ្នាទៅវិញទៅមកនៅទូទាំងតំបន់ឈូងសមុទ្រ បានធ្វើឱ្យបទឈប់បាញ់រវាងភាគីទាំងពីរត្រូវរលាយ នាំឱ្យលំហូរប្រេងចេញពីច្រកសមុទ្រហ័រមូស (Hormuz) ធ្លាក់ចុះខ្លាំង។ ទន្ទឹមនឹងនេះ អ៊ីរ៉ង់ក៏បានស្នើឱ្យចលនាហ៊ូទី (Houthi) ត្រៀមលក្ខណៈជាស្រេច ដើម្បីបិទផ្លូវនាំចេញនៅសមុទ្រក្រហមផងដែរ។ នេះបើតាមប្រភពពី Reuters បានចេញផ្សាយ។
តម្លៃប្រេងឆៅ Brent ស្តង់ដាអន្តរជាតិបានកើនឡើង ១,០៥ ដុល្លារអាមេរិក ឬប្រហែល ១,២៥% ឡើងដល់ ៨៥,២៨ ដុល្លារអាមេរិកក្នុង១បារ៉ែល គិតត្រឹមម៉ោង ៨ ព្រឹក (ម៉ោងនៅកម្ពុជា)។ រីឯប្រេងឆៅរបស់សហរដ្ឋអាមេរិក West Texas Intermediate (WTI) បានកើនឡើង ១,០៣ ដុល្លារ ឬ ១,៣% ឡើងដល់ ៧៩,៩៨ ដុល្លារក្នុង១បារ៉ែល។ ការជួញដូរប្រេងឆៅទាំងពីរបានហក់ឡើងជិត ១២% ក្នុងសប្តាហ៍នេះ។
ជាលើកដំបូងចាប់តាំងពីអនុស្សរណៈនៃការយោគយល់គ្នា (MoU) បានផ្អាកការប្រយុទ្ធគ្នាកាលពីខែមុន ប៉ុន្តែថ្មីៗនេះ សហរដ្ឋអាមេរិកបានបើកការវាយប្រហារតាមផ្លូវអាកាសទ្រង់ទ្រាយធំ២លើកក្នុងរយៈពេលតែ១ថ្ងៃ កាលពីថ្ងៃទី១៥ ខែកក្កដា ដោយភាគច្រើនលើគោលដៅនានា ជិតឆ្នេរសមុទ្រភាគខាងត្បូងប្រទេសអ៊ីរ៉ង់ និងបានបន្តវាយប្រហារទៀត កាលពីថ្ងៃទី១៦ ខែកក្កដា កន្លងទៅ។
នៅក្នុងសេចក្តីថ្លែងការណ៍មួយ បញ្ជាការដ្ឋានកណ្តាលសហរដ្ឋអាមេរិក (CENTCOM) បានឱ្យដឹងថា កងកម្លាំងអាមេរិកបានចាប់ផ្តើមរលកនៃការវាយប្រហារថ្មីប្រឆាំងប្រទេសអ៊ីរ៉ង់ជាយប់ទី៦ជាប់ៗគ្នា ដើម្បីបន្តបន្ទច់បង្អាក់សមត្ថភាពយោធារបស់ប្រទេសនេះ។ ជាការឆ្លើយតប អ៊ីរ៉ង់ក៏បានវាយបកវិញដោយប្រើប្រាស់មីស៊ីល និងដ្រូន សំដៅលើមូលដ្ឋានទ័ពអាមេរិកក្នុងបណ្តាប្រទេសជិតខាង រួមទាំងការវាយប្រហារដ៏ខ្លាំងក្លាលើមូលដ្ឋានទ័ពអាកាសមួយកន្លែងក្នុងប្រទេសហ្សកដានី។
យ៉ាងណាមិញ អ្វីដែលរឹតតែបង្កើនការបារម្ភខ្លាំងលើការផ្គត់ផ្គង់ប្រេងឆៅនោះគឺ មេដឹកនាំអ៊ីរ៉ង់បានប្រាប់ក្រុមសម្ព័ន្ធមិត្តហ៊ូទីរបស់ខ្លួនឱ្យត្រៀមលក្ខណៈបិទផ្លូវដឹកប្រេងតាមសមុទ្រក្រហម ប្រសិនបើសហរដ្ឋអាមេរិកវាយប្រហារលើហេដ្ឋារចនាសម្ព័ន្ធថាមពលអ៊ីរ៉ង់៕
ចែករំលែកព័តមាននេះ