សង្គ្រាមអ៊ុយក្រែន ៖ បាតុកម្មនានាបានផ្ទុះឡើង កាលពីថ្ងៃទី១៦ កក្កដា នៅតាមទីក្រុងជាច្រើនរបស់អ៊ុយក្រែន ពិសេសនៅក្រុងគៀវ ក្រោយការដកតំណែងរដ្ឋមន្ត្រីការពារប្រទេសវ័យក្មេងដ៏មានប្រជាប្រិយភាពរបស់ប្រទេសនេះ លោកមីខាអ៊ីលឡូហ្វេដូរ៉ូវអាយុ៣៥ឆ្នាំ ដែលលោកទើបកាន់តំណែងនោះបាន៦ខែប៉ុណ្ណោះ ។
រដ្ឋមន្ត្រីវ័យក្មេងរូបនេះ មុនចាកចេញបានថ្លែងវាយប្រហារអគ្គមេបញ្ជាការកងទ័ពអ៊ុយក្រែន ឧត្ដមសេនីយ អូឡេកសាន់ដ្រ៍សៀស្គី ។ លោកថា រាល់ការផ្ដួចផ្ដើមគំនិតដែលយើងបានស្នើត្រូវបានប្លុកចោល ហើយឧត្ដមសេនីយសៀស្គី មិនបានត្រៀមឲ្យលោកអ្នកបានឃើញផ្ទាល់ភ្នែក និងនិយាយដោយចំហបញ្ហាទាំងនេះឡើយ ។
តាមពិតទៅ ទំនាស់កើតមានដោយសារប្រធានាធិបតីលោកវ៉ូឡូឌីមៀរហ្សេឡេនស្គី តែងតាំងលោកស័រហ្គីអ៊ីកូរេតស្គី អាយុ៤៨ឆ្នាំ ជានាយករដ្ឋមន្ត្រីថ្មី ក្រោយនាយករដ្ឋមន្ត្រីមុននេះលាលែង ។ លោកជាប្រមុខសហគ្រាសរដ្ឋNAFTOGAZ មានបទពិសោធន៍នយោបាយតិចតួច តែចាត់ទុកថាជាអ្នកបច្ចេកទេស ដែលអាចគ្រប់គ្រងវិបត្តិ ពិសេសក្នុងផ្នែកថាមពលដែលរងការវាយប្រហារធ្ងន់ធ្ងរពីសំណាក់រុស្ស៊ី ។
ដោយប្រឆាំងនឹងការដកតំណែងរដ្ឋមន្ត្រីការពារប្រទេសរូបនេះ មេបញ្ជាការរងកងទ័ពអាកាសអ៊ុយក្រែនបានសុំលាលែងពីតំណែង។ លោកវរសេនីយឯងប៉ាវឡូអេលីហ្សារ៉ូវដែលគេស្គាល់ថា ជាអ្នកបង្កើតអង្គភាពដ្រូនដ៏ល្បី បានបរិហារការដកតំណែងរដ្ឋមន្ត្រីការពារប្រទេស ដែលលោកចាត់ទុកថានឹងនាំឲ្យប៉ះពាល់ដល់សមត្ថភាពការពារប្រទេស។ លោកជាអ្នកឯកទេសខាងវិស័យដ្រូន។
ដោយឡែក និយាយពីចំនួនសាកសពទាហានអ៊ុយក្រែនដែលស្លាប់ក្នុងទីលានប្រយុទ្ធ ប្រទេសនេះអះអាងនាថ្ងៃទី១៦ កក្កដា ថា តាំងពីដើមឆ្នាំនេះ មកសាកសពទាហានអ៊ុយក្រែនដែលរុស្ស៊ី ប្រគល់ឲ្យមានដល់ជាង៤០០០នាក់ហើយ ៕
ចែករំលែកព័តមាននេះ