រាជធានីភ្នំពេញ ៖ កាលពីព្រឹកថ្ងៃទី១ សីហា កន្លងមក នៅក្នុងសាលប្រជុំក្នុងសាកលវិទ្យាល័យពុទ្ធិសាស្ត្រស្ថិតក្នុងសង្កាត់បឹងរាំង ខណ្ឌដូនពេញមានប្រារព្ធពិធីបើកវគ្គបណ្តុះបណ្តាលស្តីពី តើវិស្វករត្រូវរៀបចំខ្លួនយ៉ាងដូចម្តេច ដើម្បីក្លាយជាអ្នកគ្រប់គ្រងគម្រោង» ក្រោមអធិបតីភាពលោកប្រាក់ មិន អគ្គលេខាធិការគណៈវិស្វករកម្ពុជា។ ចូលរួមក្នុងពិធីនោះ មានលោកសុខ ពុទ្ធិវុធ សាកលវិទ្យាធិការនៃសាកលវិទ្យាល័យពុទ្ធិសាស្ត្រ លោក Frankie Chong Kwet Hin ជនជាតិម៉ាឡេស៊ី IEM Training Center ជាអ្នកបង្រៀន ព្រមទាំងសិក្ខាកាមដែលអញ្ជើញមកពីស្ថាប័ននានា ដែលជាសមាជិក សមាជិកា នៃគណៈវិស្វករកម្ពុជា ដែលអញ្ជើញមកពីបណ្តាខេត្ត-ក្រុងទូទាំងប្រទេស។
លោកសុខ ពុទ្ធិវុធ សាកលវិទ្យាធិការនៃសាកលវិទ្យាល័យពុទ្ធិសាស្ត្រ និងជាគណៈគ្រប់គ្រងវគ្គបណ្តុះបណ្តាលមានប្រសាសន៍ថា សាកលវិទ្យាល័យពុទ្ធិសាស្ត្រជាគ្រឹះស្ថានឧត្តមសិក្សាដែលមានតួនាទីរួមចំណែកបង្កើតធនធានបញ្ញវ័ន្តជាតិប្រកបដោសម្បទាគ្រប់គ្រាន់ទាំងចំណេះដឹង ចំណេះធ្វើ និងគុណធម៌។ សាកលវិទ្យាល័យបានធ្វើសហប្រតិបត្តិការជាមួយគ្រឹះស្ថានឧត្តមសិក្សាអន្តរជាតិល្បីៗមួយចំនួន ពីបណ្តាប្រទេសរីកចម្រើនលើសាកលលោក។ ដោយឡែកដើម្បីធានាបានភាពជោគជ័យក្នុងសេដ្ឋកិច្ចទីផ្សារពិសេសសមាហរណកម្មក្នុងតំបន់អាស៊ាន វិស័យសេវាកម្ម វិស្វកម្ម សាកលវិទ្យាល័យពុទ្ធិសាស្ត្របានធ្វើកិច្ចព្រមព្រៀងជាមួយគណៈវិស្វករកម្ពុជា និងរិតចំណងសហប្រតិបត្តិការនេះមានដំណើរការល្អ ប្រកបដោយប្រសិទ្ធភាពខ្ពស់នាពេលបច្ចុប្បន្ន និងទៅអនាគត។
លោកសុខ ពុទ្ធិវុធ បានស្វាគមន៍យ៉ាងកក់ក្តៅចំពោះទំនាក់ទំនងសហប្រតិបត្តិការមុំចង្ក្រាននៃស្ថាប័នទាំងបីរួមមានគណៈវិស្វករកម្ពុជា (B.E.C) សាកលវិទ្យាល័យពុទ្ធិសាស្ត្រ (U.P) និង IEM Training Center នៃប្រទេសម៉ាឡេស៊ី។
លោកប្រាក់ មិន អគ្គលេខាធិការនៃគណៈវិស្វករកម្ពុជាបានប្រកាសបើកវគ្គបណ្តុះបណ្តាលបញ្ជាក់ថា ការបើកវគ្គបណ្តុះបណ្តាលទៅតាមទស្សនវិស័យ និងគោលការណ៍នៃការបង្កើតចំណេះដឹងថ្មីៗ ពង្រឹងគុណភាពធនធានវិស្វករដល់វិស្វករជាសមាជិក សមាជិកានៃគណៈវិស្វករកម្ពុជា។ លោកសុំគាំទ្រចំពោះសម្តីលោកសុខ ពុទ្ធិវុធ ដែលបានចូលរួមសហការជាមួយគណៈវិស្វករកម្ពុជា ដើម្បីពង្រឹងគុណភាព ធនធានបញ្ញវ័ន្ត ជាវិស្វករកម្ពុជាឱ្យមានបច្ចេកវិទ្យាទំនើប និងបទពិសោធន៍ថ្មីបន្ថែមទៀត។ ជាក់ស្តែងដូចជាវគ្គបណ្តុះបណ្តាលនាពេលនេះជាសក្ខីភាព និងដើម្បីធានាបាននូវការអភិវឌ្ឍន៍ដោយចីរភាពក្នុងបរិបទកម្ពុជាក្រោមការដឹកនាំដ៏ឈ្លាសវៃ និងទទួលខុសត្រូវខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលបានអនុវត្តជាជំហានៗ និងដោយជោគជ័យនូវយុទ្ធសាស្ត្រចតុកោណរបស់រាជរដ្ឋាភិបាលក្នុងនោះមានការកសាងសមត្ថភាពធនធានមនុស្សជាកត្តាចម្បង។ លោកបានថ្លែងអំណរគុណដល់លោកវិស្វករ Frankie Chong Kwet Hin ដែលបានជួយបង្ហាត់បង្រៀន និងបំភ្លឺឱ្យបានច្បាស់បន្ថែមទៀតក្នុងរយៈពេល២ថ្ងៃនេះ។
បន្ទាប់មកលោកប្រាក់ មិន បានបញ្ជាក់បន្ថែមថា នៅក្នុងគណៈវិស្វករកម្ពុជាកន្លងមក លោកបានបិទប្រកាសផ្សព្វផ្សាយដល់បញ្ញវ័ន្តទូទាំងប្រទេសអញ្ជើញមកចុះឈ្មោះចូលក្នុងបញ្ជីជាសមាជិក សមាជិកានៃគណៈវិស្វករកម្ពុជាតាមទូរទស្សន៍ តាមសារព័ត៌មានកោះសន្តិភាព រស្មីកម្ពុជា ដើម្បីប្រមូលអ្នកដែលមានចំណេះដឹង ព្រោះប្រទេសជាតិដែលមានភាពរីកចម្រើនលូតលាស់ និងអភិវឌ្ឍន៍ជឿនលឿនទៅមុខអាស្រ័យដោយប្រទេសនេះ មានអ្នកចេះដឹងច្រើន។
គណៈវិស្វករកម្ពុជាសង្ឃឹមទុកជាមុនថា ប្រជាពលរដ្ឋទាំងអស់ដែលមានចំណេះដឹងខ្ពស់ៗ គឺមិនយកចំណេះវិជ្ជារបស់ខ្លួនទៅបោះបង់ចោលនោះទេ៕
ចែករំលែកព័តមាននេះ