តាមទីភ្នាក់ងារព័ត៌មាន AFP ផ្សាយថា ធនាគារកណ្តាលរបស់កូរ៉េខាងត្បូងបានទិញមាសជាលើកដំបូងក្នុងអំឡុងពេល១៣ឆ្នាំកន្លងមក ដើម្បីបង្កើតឱ្យមានប្រាក់ទុនតម្កល់បរទេសជាច្រើនផ្នែកដោយមុននេះមានតែប្រាក់ដុល្លារអាមេរិក ។ ការទិញមាសជាលើកដំបូងនេះមានចំនួន២៥តោន ពីទីផ្សារពិភពលោក ក្នុងអំឡុងពេលពីខែមិថុនា ដល់កក្កដាកន្លងមក ធ្វើឱ្យកូរ៉េខាងត្បូងមានមាសសម្រាប់តម្កល់កើនឡើងចំនួន៣៩,៤តោន ។
លោកហុង ថេកគី នាយកគ្រប់គ្រងទុនតម្កល់ ឬទុនបម្រុងរបស់ធនាគារកណ្តាលកូរ៉េខាងត្បូងបានបញ្ជាក់ប្រាប់ទីភ្នាក់ងារ «ដោនចូន ញូវវ៉ាយ» ថា ការទិញមាសអាចជួយទប់ទល់ទីផ្សារហិរញ្ញវត្ថុពិភពលោកដែលប្រែប្រួល និងបង្កើនជំនឿចិត្តអ្នកវិនិយោគទុនក្នុងកូរ៉េខាងត្បូងនៅពេលមានវិបត្តិសេដ្ឋកិច្ចកើតឡើង ។
ទោះជាយ៉ាងណាក៏ដោយលោកហុង ថេកគី នៅមិនទាន់បង្ហាញពីការយល់ឃើញថា ប្រទេសកូរ៉េខាងត្បូងត្រូវការទិញមាសបន្ថែមបន្តទៀតឬអត់? សម្រាប់ពេលនេះ គឺជាលើកដំបូងដែលធនាគារកណ្តាលរបស់កូរេ៉ខាងត្បូងទិញមាសចាប់តាំងពីធនាគារខាងលើធ្លាប់ប្រមូលទិញពីប្រជាជនកូរ៉េក្នុងពេលកើតវិបត្តិហិរញ្ញវត្ថុក្នុងអាស៊ីខាងកើត កាលពីឆ្នាំ ១៩៩៧-១៩៩៨ ។ កាលណោះជនជាតិកូរ៉េខាងត្បូងម្នាក់ៗបានប្រមែប្រមូលមាសពីក្រុមគ្រួសាររបស់ពួកគេសម្រាប់ជួយឱ្យប្រទេសឆ្លងផុតពីវិបត្តិ និងចាប់តាំងពីកើតវិបត្តិសេដ្ឋកិច្ចនៅទូទាំងពិភពលោក កាលពីឆ្នាំ២០០៨ មាសបានទទួលចំណាប់អារម្មណ៍ពីធនាគារអន្តរជាតិកាន់តែច្រើន ធ្វើឱ្យតម្លៃមាសកើនខ្ពស់យ៉ាងឆាប់រហ័ស ។
គួរបញ្ជាក់ថា ធនាគារកូរ៉េខាងត្បូងមានទុនតម្កល់ ឬទុនបម្រុងដំណាច់ខែកក្កដាកន្លងមកចំនួន៣១១.០៣០លានដុល្លារអាមរិក គឺជាចំនួនមួយដែលខ្ពស់ជាប្រវត្តិសាស្ត្រ ៕
ចែករំលែកព័តមាននេះ