អ្នកជំងឺទឹកនោមផ្អែមទាំងឡាយមិនត្រូវធ្វេសប្រហែសទុកឱ្យសម្ពាធឈាមឡើងខ្ពស់នោះទេ ពីព្រោះថា វាងាយនឹងរងនូវហានិភ័យច្រើន ដូចជាដាច់សរសៃឈាមក្នុងខួរក្បាល មានបញ្ហាបេះដូង ស្ទះ ខ្សោយ ឬអាចឈានទៅគាំងក៏ថាបាន។
ជាធម្មតាសម្ពាធឈាមរបស់អ្នកអាចមានកម្រិតត្រឹម 140/90mmhg (មីល្លីម៉ែត្របារ៉ត) មានន័យថា ថតលើនៃបេះដូងត្រូវមានសម្ពាធឈាមត្រឹម១៤០ និងថតក្រោម៩០ ហើយប្រសិនបើអ្នកមានសម្ពាធឈាមលើសពីនេះវិញ គឺជាសញ្ញាមួយបង្ហាញថា ភាពធ្ងន់ធ្ងរចាប់ផ្តើមកើតឡើងលើសរីរាង្គរបស់អ្នកហើយ ។ មិនពិបាកយល់ទេ ការដែលអ្នកកំពុងកើតជំងឺទឹកនោមផ្អែមស្រាប់នោះ លុះសម្ពាធចាប់ផ្តើមឡើងខ្ពស់ថែមទៀតវាហាក់ដូចបន្ថែមជំងឺដល់រូបអ្នកអ៊ីចឹង។
អ្នកគួរយល់ថា នៅពេលបេះដូងរបស់អ្នកលោត គឺវាចាប់ផ្តើមបូមឈាមទៅក្នុងសរសៃឈាមសព្វសារពាង្គ ដែលពេលនោះវាបង្កឱ្យមានសម្ពាធឈាមហូរតាមរយៈសរសៃទៅតាមចង្វាក់បេះដូង ហើយប្រសិនបើអ្នកមានជំងឺទឹកនោមផ្អែម វានឹងធ្វើឱ្យបេះដូងរបស់អ្នកចុះខ្សោយ ឆាប់ស្ទះ ឬឈានទៅគាំង មួយវិញទៀត អាចប៉ះពាល់ ឬដាច់សរសៃឈាមក្នុងខួរក្បាល៕
ចែករំលែកព័តមាននេះ